شىمكەنت قالاسىنىڭ اۋەجايىندا جەكە دەرەكتەردى راستاۋ ءۇشىن eGov mobile قوسىمشاسى ارقىلى تسيفرلى جەكە كۋالىكتى پايدالانۋعا بولادى. بۇعان دەيىن مۇنداي قىزمەت نۇر-سۇلتان, الماتى جانە اقتوبە قالالارىنىڭ اۋەجايلارىندا قولجەتىمدى بولاتىن.
يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتىنىڭ مالىمەتىنشە, اۋەجايدا تسيفرلى جەكە كۋالىكتى پايدالانۋ ءۇشىن eGov mobile قوسىمشاسىندا اۆتورلاندىرىلعان پايدالانۋشى «تسيفرلى قۇجاتتار» بولىمىنە كىرىپ, تىزىمنەن جەكە كۋالىكتى تاڭداۋ قاجەت. اۋەجايدىڭ تىركەۋ بولىمىندە, سونداي-اق ۇشۋ الدىنداعى تەكسەرۋدەن ءوتۋ كەزىندە سەرۆيستە جاسالعان QR-كودى بار سمارتفوننىڭ ەكرانىن كورسەتۋ قاجەت.
ىشكى رەيستەردە تسيفرلى جەكە كۋالىكتى پايدالانۋ مۇمكىندىگى يندۋستريا جانە ينفراقۇرىلىمدىق دامۋ مينيسترلىگى, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى, «قازاقستاننىڭ اۆياتسيالىق اكىمشىلىگى» اق, وتاندىق اۋە كومپانيالارى مەن اۋەجايلارىنىڭ جانە «ۇلتتىق اقپاراتتىق تەحنولوگيالار» اق-نىڭ جۇيەلەردى ينتەگراتسيالاۋ بويىنشا بىرلەسكەن كۇش-جىگەرىنىڭ ناتيجەسىندە پايدا بولدى.
تسيفرلى قۇجاتتار قىزمەتى پيلوتتىق رەجىمدە جۇمىس ىستەيدى جانە ازىرگە نۇر-سۇلتان, الماتى, اقتوبە جانە شىمكەنت قالالارى اراسىندا قولجەتىمدى. وسى اۋەجايلار قىزمەتىن پايدالانۋدى جوسپارلاپ وتىرعان جولاۋشىلاردىڭ قاناتقاقتى جوبا كەزىندە جەكە كۋالىگىنىڭ تۇپنۇسقاسىن دا وزىمەن بىرگە الىپ جۇرگەنى ءجون بولادى.