ستۋدەنتتەرگە ارنالعان باسسەين

– جاقىندا تالدىقورعان قالاسىندا وليمپيادالىق ۇلگىدەگى جابىق باسسەين اشىلعان ەدى. جاتتىعۋعا 3 مىڭنان اسا بالا جازىلىپ, مىڭنان استامى ءجۇزۋ ۇيىرمەسىندە دايىندالۋدا. جاتتىق­تىرۋ­شىلار قۇرامىن كەڭەيتۋ جاعى قاراس­تىرىلۋدا. ەلباسى تاپسىرماسى اياسىندا ايماقتا 13 دەنە شىنىقتىرۋ-ساۋىقتىرۋ كەشەنى قولدانۋعا بەرىلدى. تاعى تورتەۋىنىڭ جانە 150 ۆوركاۋت-نىسان قۇرىلىسى جۇرگىزىلۋدە. ەندى ستۋدەنتتەرگە ارنالعان ءجۇزۋ باسسەينى پايدالانۋعا بەرىلدى. باسسەين بۇقارالىق سپورتتى دامىتۋ جانە سالاۋاتتى ءومىر سالتىن ناسيحاتتاۋ ماقساتىندا سالىندى, – دەيدى وبلىس اكىمىنىڭ ورىنباسارى باتىرجان بايجۇمانوۆ.

ول ۋنيۆەرسيتەت باسشىلىعىنا وقۋ ­سا­پاسىنىڭ جوعارىلىعى, وقۋ عيما­را­تىنىڭ ماتەريالدىق-تەحنيكالىق با­زا­­­­سىنىڭ جاڭارتۋ باعىتىنداعى جۇ­مىس­­تارى ءۇشىن العىسىن ءبىلدىردى. ءوز كە­زە­گىندە ۋنيۆەرسيتەت رەكتورى قۋات باي­­مىرزاەۆ وبلىس اكىمى قولداۋىمەن سا­لىن­عان ستۋدەنتتەرگە ارنالعان زاماناۋي جاتاقحانانىڭ ارقاسىندا جەتىسۋ ۋني­ۆەر­سيتەتى رەسپۋبليكا بويىنشا ستۋ­دەنت­تەردى الەۋمەتتىك قامتۋ بويىن­شا ءبىرىنشى ورىن يەلەنگەنىن ايتتى. سونداي-اق ول وبلىس اكىمىنە ۋنيۆەرسيتەتكە كورسەتىلىپ جاتقان كومەك ءۇشىن العىسىن ءبىلدىردى. ال ستۋدەنتتەر اتىنان ءسوز العان دەنە شىنىقتىرۋ جانە سپورت فاكۋلتەتىنىڭ 4-كۋرس ستۋدەنتى, كوركەم گيمناستيكادان سپورت شەبەرى ديانا بەيسەنوۆا ريزا­شىلىعىن جەتكى­زىپ, باسسەيننىڭ اشىلۋى ستۋدەنتتەردىڭ سپورتقا دەن قويۋىنا سەرپىن بەرەتىنىن جەتكىزدى.

جابىق باسسەيننىڭ جالپى كولەمى 3 644,20 شارشى مەتردى قۇرايدى. نىسان قۇرىلىس تالاپتارىنا جانە سانيتار­لىق-ەپيدەميالىق ستاندارتتارعا ساي سالىنعان. باسسەينگە كىرەتىن جەكە كىرە­بەرىس, كيىم اۋىستىراتىن ورىن, ساۋنا, ۆاننا, جاتتىقتىرۋشى مەن جۇمىس­شى­لارعا ارنالعان بولمە, سپورت ينۆەنتا­رىن تازالاپ, ساقتاۋعا ارنالعان ارنايى بولمە, دەزينفەكتسيالىق زاتتار – بار­لىعىمەن قامتىلعان. اكىمشىلىك جانە مەدي­تسينالىق كابينەتتەر دە بار. ودان بو­لەك سۋدى تەستىلەۋدەن وتكىزۋگە ارنالعان زەرتحانامەن قامتىلعان.

جالپى, ۋنيۆەرسيتەت قابىرعاسىندا 6 مىڭنان اسا ستۋدەنت ءبىلىم الىپ جاتىر. ونىڭ ىشىندە 450 جاس وبلىس اكىمى گرانتىنىڭ يەگەرى.

الماتى وبلىسى