كەشە قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى جانىنان قۇرىلعان قوعامدىق كەڭەستىڭ وتىرىسى ءوتىپ, الداعى بەس جىلعا ارنالعان سىبايلاس جەمقورلىققا قارسى ءىس-قيمىل باعدارلاماسىن ايقىندايتىن ستراتەگيالىق قۇجاتتى ازىرلەۋ تاسىلدەرى ۇسىنىلدى. بۇعان دەيىن مەملەكەت باسشىسى قازاقستان حالقىنا جولداۋىندا وسىعان بايلانىستى ءتيىستى تاپسىرما بەرگەن بولاتىن.
وتىرىستى اشقان قوعامدىق كەڭەس توراعاسى د.قىدىرالى ەل ءۇشىن جانە ونىڭ ءاربىر ازاماتى ءۇشىن وسىنداي ماڭىزدى اكتىنى دايىنداۋ كەڭەس قىزمەتىندەگى العاشقى جوبا ەكەنىن ايتتى. ول اتالعان قۇجاتتى ازىرلەۋ ازاماتتىق قوعام مەن حالىقتى كەڭىنەن تارتۋ ارقىلى جۇزەگە اسىرىلاتىنىن جەتكىزدى.
ءوز كەزەگىندە, سىبايلاس جەمقورلىققا قارسى قىزمەتتىڭ باسشىسى م. احمەتجانوۆ بۇل قۇجاتتىڭ حالىقتان شىعۋى كەرەك ەكەنىن اتاپ ءوتتى.
«سوندىقتان كەز كەلگەن ادام تۇجىرىمدامانى ازىرلەۋگە تىكەلەي قاتىسا الادى. بىزگە ەل ىشىنەن شىققان ۇسىنىستار وتە ماڭىزدى», دەدى ول. ۆەدومستۆو باسشىسىنىڭ ايتۋىنشا, قۇجات جوبالىق باسقارۋ اياسىندا ازىرلەنەتىن بولادى. ول مۇنداي ءتاسىلدىڭ قويىلعان مىندەتتى ساپالى ءارى مەرزىمىندە ورىنداۋعا مۇمكىندىك بەرەتىنىن ايتتى.
«پروتسەستىڭ قولايلىعى, بيۋروكراتياسىز ءتيىمدى كوممۋنيكاتسيالاردى قامتاماسىز ەتۋ ءۇشىن اگەنتتىك كومانداسى ۇلتتىق جوبا كەڭسەسىندە ورنالاسادى. ءبىزدىڭ قىزمەتكەرلەر ارقاشان وسى جەردە بولادى. وزدەرىڭىز كەلىپ, باسقا ساراپشىلاردى شاقىرا الاسىزدار. ۇسىنىستى ونلاين جولداۋعا بولادى», دەپ تۇيىندەدى م.احمەتجانوۆ.
وتىرىستا سونداي-اق ازاماتتاردان ءوتىنىش جيناۋ ءۇشىن ارنايى سايتتىڭ ەسكيزى (www.adal.com.kz) تانىستىرىلدى.
«ەگەمەن-اقپارات»