قارت مايدانگەرلەردى قابىلدادى. جامبىل وبلىسىنىڭ اكىمى قانات بوزىمباەۆ جەڭىستىڭ 65 جىلدىعىنا بايلانىستى استانا مەن ماسكەۋ قالالارىندا وتەتىن سالتاناتتى شەرۋگە قاتىسۋ قۇرمەتىنە يە بولعان ءبىر توپ قارت مايدانگەردى قابىلدادى.
– ەلباسى ن.نازارباەۆ سوعىس جانە تىل ارداگەرلەرىنە قامقورلىق جاساۋدى ۇنەمى نازاردا ۇستاپ كەلەدى. سوندىقتان ءار ارداگەرگە رەسپۋبليكالىق بيۋدجەتتەن 65 مىڭ تەڭگەدەن ءبولىنىپ وتىر. بۇعان وبلىستىق بيۋدجەتتەن 14 مىڭ تەڭگە قوسىلادى. اۋداننان دا قارجى قاراستىرىلادى. بۇدان بولەك 27 سوعىس ارداگەرى جەڭىس كۇنى قارساڭىندا تاراز قالاسىندا پايدالانۋعا بەرىلگەن جاڭا پاتەرلەردىڭ كىلتىنە يە بولادى, – دەدى وبلىس باسشىسى. سونداي-اق, اكىم ارداگەرلەردىڭ استانا مەن ماسكەۋگە بارىپ-كەلۋىنىڭ مۇقيات ۇيىمداستىرىلىپ, ولاردىڭ ۇستىندەگى كيىم ۇلگىلەرىنىڭ دە بىرىڭعاي بولۋىن قاداعالاۋدى قۇنتتاۋدى تاپسىردى.
كوسەمالى ساتتىباي ۇلى. جامبىل وبلىسى.
كوڭىلدىڭ حوشى بولعان كەزدەسۋلەر. جەڭىستىڭ 65 جىلدىعىنا وراي كۇن قۇرعاتپاي ءوتىپ جاتقان ءتۇرلى شارالاردىڭ اراسىندا ل.تولستوي اتىنداعى وبلىستىق كىتاپحانا ۇيىمداستىرعان كىتاپ ونكۇندىگى اكتسياسى جۇرتشىلىقتىڭ نازارىن ەرەكشە اۋداردى. اپتا باسىندا وتكەن ء“بىز جەڭىسكە بىرگە جەتتىك” كىتاپ كورمەسىنەن باستاپ, اكتسيا شەڭبەرىندەگى شارالاردىڭ بارلىعى دا سوعىس تاقىرىبىنا ارنالدى. اسىرەسە, كىتاپحاناداعى سوعىس ارداگەرلەرىمەن بولعان كەزدەسۋلەر, “ب.مومىش ۇلى–اتى اڭىزعا اينالعان ادام”, “سوعىس جىلدارى اندەرىنىڭ كەشى” اتتى كەشتەردىڭ ارقايسىسى بىرنەشە ساعاتقا سوزىلدى. كىتاپ وقىمايدى, كومپيۋتەرگە تاۋەلدى, باتىستىڭ جەڭىل مۋزىكاسىنا اۋەس دەگەن بۇگىنگى جاستار وكىلدەرى اعا ۇرپاق اڭگىمەسىن جىلاپ وتىرىپ تىڭدادى. اڭگىمە ۇرپاق اراسىنداعى بايلانىستى ۇزبەۋ ەكەنىن وسى كەشتەر تاعى دا ەسكەرتكەندەي بولدى.
ءنازيرا جارىمبەتوۆا, قوستاناي.
ءبىز – جەڭىس مۇراگەرلەرىمىز. وبلىستا جەڭىستىڭ 65 جىلدىعىنا وراي ارداگەرلەر مەن ولاردىڭ ۇيىمىنا قوسىمشا قولداۋ كورسەتۋ ماقساتىندا قايىرىمدىلىق اكتسياسى ءجۇرىپ جاتىر. وتان ءۇشىن وت كەشكەن مايدانگەرلەرگە ۇكىمەت, وبلىس, اۋدان تاراپىنان بولەك سىي تارتۋ – ازاماتتىقتىڭ, ەرلىكتىڭ قۇنىن ءبىلدىرۋ, وسكەلەڭ ۇرپاققا تاربيە. سوزاق اۋدانىنىڭ اكىمى سوزاقباي ابدىقۇلوۆ دەمەۋشىلەر ەسەبىنەن ارداگەرلەرگە ءبىر-ءبىر تۇلپار مىنگىزسە, قايىرىمدىلىق اكتسياسىندا ماقتاارال اۋدانى الدا كەلەدى. ال, “نۇر وتان” حدپ وقو فيليالى توراعاسىنىڭ ءبىرىنشى ورىنباسارى ۇلاسبەك سادىبەكوۆتىڭ باستاماسىمەن مەرەكەگە وراي سوعىس ارداگەرلەرىمەن كەزدەسۋلەر وتكىزىلۋدە. قازىعۇرت اۋدانىندا ءۇيى جوق ءبىر مايدانگەرگە ءۇي سالىپ بەرىلىپ جاتىر.
باقتيار تايجان, وڭتۇستىك قازاقستان وبلىسى.
سىر ارداگەرلەرى ەلوردادا بولدى. سىر ايماعىندا تۇراتىن سوعىس, تىل, ەڭبەك ارداگەرلەرىنىڭ العاشقى توبى استانا قالاسىنا ساياحاتتا بولىپ قايتتى. ولاردىڭ بارلىق سانى 300 بولسا, ءاربىر توپ 50 ادامنان 6 رەت ساپارعا شىقپاق. ەلورداعا ساپارلاپ قايتقان العاشقى توپتىڭ قۇرامىندا 25 قىزىلوردالىق, 25 قارماقشىلىق ارداگەر بار. ساپار الدىندا ارداگەرلەردى وبلىس اكىمى ب.قۋاندىقوۆ قابىلداپ, ولارعا جولدامالار تابىستاپ, ءسات ساپار تىلەدى. سىر وڭىرىنەن بارعان قوناقتار “اباي” قوناق ۇيىنە ورنالاستىرىلىپ, ەلوردامىزدىڭ تاريحي-مادەني ورىندارىنا ەكسكۋرسيا جاسادى.
ەركىن ءابىل, قىزىلوردا.
جول قۇرىلىسى پارتيا باقىلاۋىندا. “نۇر وتان” حدپ عاسىر جوباسى بولىپ وتىرعان “باتىس ەۋروپا-باتىس قىتاي” حالىقارالىق ترانزيتتىك ءدالىزىنىڭ قازاقستان اۋماعىنان وتەتىن بولىگىنىڭ قۇرىلىسىنا پارتيالىق باقىلاۋ ۇيىمداستىرۋدى قولعا الدى. وسى ماسەلەگە بايلانىستى پارتيانىڭ وبلىستىق فيليالىندا وتكەن جيىندا پارلامەنت سەناتىنىڭ دەپۋتاتى ەدىلباي يمانقۇلوۆ وبلىستا جوبانىڭ جۇزەگە اسىرىلۋ بارىسى جايىندا وبەكتيۆتى اقپاراتتاردى دايىنداۋ ءۇشىن پارتيانىڭ فيليالى جانىنان اۋماقتىق كوميسسيا, قۇرىلىس وبەكتىلەرىندە پارتيالىق باقىلاۋ توپتارى قۇرىلعانىن مالىمدەدى. اۆتوموبيل جولدارى كوميتەتى اقتوبە وبلىستىق دەپارتامەنتىنىڭ باستىعى باعلان بايماعامبەتوۆ اتالعان حالىقارالىق كولىك ءدالىزىنىڭ 621 شاقىرىمى اقتوبە وبلىسى اۋماعىنا كىرەتىنىن ايتا كەلىپ, وسى كەزگە دەيىن اتقارىلعان جۇمىستاردان حاباردار ەتتى. ونىڭ ايتۋىنشا, قازىر وسى جوبا بويىنشا 480 ادام ەڭبەك ەتەدى, ال جۇمىس قىزعان كەزدە ولاردىڭ سانى 1 مىڭعا جەتەدى.
ساتىبالدى ءساۋىرباي, اقتوبە وبلىسى.
نەمىس تىلىندەگى كىتاپتار كەلدى. بيىل قازاقستاندا گەرمانيا جىلى بولىپ جاريالانعانى ءمالىم. وسىعان وراي ج.مولداعاليەۆ اتىنداعى وبلىستىق عىلىمي-امبەباپ كىتاپحاناسىندا نەمىس تىلىندەگى جاڭا كىتاپتار مەن كومپاكت-ديسكىلەردىڭ تانىستىرىلىمى بولدى. اتالمىش كىتاپتار گەرمانيادان نەمىس ەلشىلىگى ارقىلى اكەلىنگەن. راسىمگە جينالعاندار كىتاپحانا قورىنداعى سيرەك كەزدەسەتىن شەتەل ادەبيەتتەرىمەن دە تانىستى. اتالمىش قوردىڭ باس كىتاپحاناشىسى رايسا ابۋعاليەۆانىڭ ايتۋىنشا, قوردا مىڭعا جۋىق اسا قۇندى كىتاپتار ساقتالىپ وتىر, تاياۋدا ولاردىڭ ەلەكتروندى نۇسقاسى جاسالماق. سونىمەن قاتار, كىتاپحانادا شەتەل ادەبيەتى ءۇشىن ارنايى ءبولىم اشىلعان. تانىستىرىلىم كەزىندە م.وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىنىڭ ستۋدەنتتەرى نەمىس اقىندارىنىڭ ولەڭدەرىن وقىپ, ءان شىرقادى. “جايكترۋبتەح” جشس ديرەكتورى حولگەر نۋمريح ورالدا ارنايى كلۋب اشۋدى جوسپارلاپ جۇرگەنىن, وسى جەردە نەمىس ءتىلىن وقىپ-ۇيرەنۋگە بولاتىنىن اتاپ ءوتىپ, گەرمانيادان تاپسىرىس بويىنشا كەلەتىن جاڭا كىتاپتاردى كىتاپحاناعا تارتۋ ەتەتىنىن جەتكىزدى.
تەمىر قۇسايىن, ورال.
كىشكەنە نۇريسلامدى يالتا كۇتەدى. بەس جاسار بۇل بالدىرعاننىڭ ەسىمى قازىر ايماققا ءمالىم بولىپ تۇر. اتىنىڭ الىسقا ايان بولۋى ونەرىنىڭ ارقاسى. جاڭاارقا اۋدانىنىڭ ورتالىعىنداعى “ەر توستىك” بالالار باقشاسىنىڭ تاربيەلەنۋشىسى جاقىندا استانادا وتكەن “اق كوگەرشىن” ءىV حالىقارالىق بايقاۋعا قاتىسقان بولاتىن. 5-تەن 12 جاسقا دەيىنگى جەتكىنشەكتەر اراسىنداعى نوميناتسيا بويىنشا جەڭىمپاز اتانعان ءبۇلدىرشىن. “بولاشاق جۇلدىزدار” اتتى اۋداندىق, وبلىستىق, ودان قالا بەردى حالىقارالىق دەڭگەيدەگى بايقاۋدا ساحنالىق سۇيكىمدىلىگىمەن, جاس شاماسىنا قاراماي تاپقىرلىعىمەن, ءبۇر جارا باستاعان تالانتىمەن باۋراعان بالا ەندى يالتادا وتەتىن “جۇلدىزدى ايۋ-تاۋ” بايقاۋىنا شاقىرىلىپ وتىر. وسىنداي قۇرمەتكە قۋانىشتى نۇريسلام تىلتىش بۇل كۇندە وعان دايىندىق ۇستىندە.
ايقىن نەسىپباي. قاراعاندى وبلىسى, جاڭاارقا اۋدانى.