قۇقىق قورعاۋ جۇيەسىن رەفورمالاۋ جونىندەگى جۇمىس توبى پرەزيدەنت جولداۋىن ىسكە اسىرۋعا كىرىستى, دەپ حابارلادى مەملەكەت باسشىسىنىڭ ءباسپاسوز قىزمەتى.
قۇقىق قورعاۋ جۇيەسىن رەفورمالاۋ جونىندەگى جۇمىس توبىنىڭ وتىرىسى بارىسىندا مەملەكەت باسشىسىنىڭ «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى قازاقستان حالقىنا جولداۋىندا ايتىلعان تاپسىرمالارىن ىسكە اسىرۋ مەحانيزمى تالقىلاندى.جيىنعا باس پروكۋراتۋرانىڭ, ۇلتتىق قاۋىپسىزدىك كوميتەتىنىڭ, سىبايلاس جەمقورلىققا قارسى ءىس-قيمىل اگەنتتىگىنىڭ, قارجى مونيتورينگى اگەنتتىگىنىڭ, ىشكى ىستەر مينيسترلىگىنىڭ باسشىلارى, قوعام وكىلدەرى مەن جەتەكشى قۇقىقتانۋشىلار, اتاپ ايتقاندا, قايىربەك سۇلەيمەنوۆ, يگور روگوۆ, ەرعالي مەرزادينوۆ, مارات قوعاموۆ, يسيدور بورچاشۆيلي, تالعات نارىكباەۆ جانە ت.ب. قاتىستى.قازاقستان رەسپۋبليكاسى قاۋىپسىزدىك كەڭەسىنىڭ حاتشىسى – جۇمىس توبىنىڭ جەتەكشىسى اسەت يسەكەشەۆ وتىرىستا قۇقىق قورعاۋ قىزمەتىن دايەكتى جاڭعىرتۋ جونىندەگى ستراتەگيالىق باعىتتى جالعاستىرۋ قاجەتتىگىن اتاپ ءوتتى.«باستى مىندەتتەردىڭ ءبىرى – ادام قۇقىعىن قورعاۋ. بۇل رەتتە قىلمىستىق پروتسەستىڭ ءۇش بۋىندى مودەلىن ەنگىزۋ ناتيجەسىندە بولعان وڭ وزگەرىستەر اتاپ ءوتىلدى, سونداي-اق قۇقىق قورعاۋ جۇيەسىن ورتا مەرزىمدى كەزەڭدە رەفورمالاۋدىڭ باعىتتارى بەلگىلەندى. سونىمەن قاتار جۋىق ارادا شەشۋدى قاجەت ەتەتىن ناقتى مىندەتتەر جۇكتەلدى», دەدى اسەت يسەكەشەۆ.اتاپ ايتقاندا, قۇقىق قورعاۋ ورگاندارى ەسىرتكىنىڭ زاڭسىز اينالىمىنا جانە الاياقتىققا قارسى كۇرەسكە, كامەلەتكە تولماعاندارعا قاتىستى جىنىستىق سيپاتتاعى قىلمىستاردىڭ الدىن الۋعا ەرەكشە نازار اۋدارۋى قاجەت.وتىرىس بارىسىندا مەيلىنشە ءساتتى وتكەن حالىقارالىق تاجىريبەلەردەن مىسالدار كەلتىرىلدى. ولار وتاندىق جاعدايلاردا قولدانىلۋى مۇمكىن.قىلمىستىق زاڭنامانى ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىدەگى ەكىنشى فاكۋلتاتيۆتىك حاتتامانىڭ ەرەجەلەرىمەن ۇيلەستىرۋ ماسەلەلەرى جەكە قارالدى.بۇدان بولەك جۇمىس توبى قىلمىستىق پروتسەستىڭ وتاندىق مودەلىن ۇزدىك حالىقارالىق ستاندارتتارعا سايكەستەندىرۋ ءۇشىن ودان ءارى اتقارىلاتىن جۇمىستاردى پىسىقتاۋدا.اتاپ ايتقاندا, ايىپتاۋ اكتىلەرىن دايىنداۋ ساپاسىن ارتتىرۋعا باعىتتالعان زاڭنامالىق تۇزەتۋلەر ازىرلەندى. سونداي-اق پوليتسيا جۇمىسىنىڭ سەرۆيستىك مودەلىن ەنگىزۋ تۋرالى تاپسىرمانى ىسكە اسىرۋ جۇمىستارى جالعاسۋدا.وتىرىسقا قاتىسۋشىلار قۇقىق قورعاۋ جۇيەسىن رەفورمالاۋ تەتىكتەرىن جەتىلدىرۋ جونىندە ناقتى ۇسىنىستار ايتتى. قۇقىق قورعاۋ ورگاندارىنىڭ وكىلدەرى جولداۋدا بەلگىلەنگەن باعىتتار بويىنشا قابىلداناتىن شارالار تۋرالى باياندادى.تالقىلاۋ قورىتىندىسى بويىنشا جۇمىس توبىنىڭ جەتەكشىسى سالالىق ۆەدومستۆولارعا مەملەكەت باسشىسىنىڭ تاپسىرمالارىن ىسكە اسىرۋ ءتارتىبىن ايقىندايتىن ناقتى تاپسىرمالار بەردى.جيىن سوڭىندا قاۋىپسىزدىك كەڭەسىنىڭ حاتشىسى جۇرتشىلىق وكىلدەرىن اتقارىلىپ جاتقان جۇمىستارعا بەلسەندى اتسالىسۋعا شاقىردى.قۇقىق قورعاۋ ورگاندارىنىڭ جولداۋدا قامتىلعان تاپسىرمالاردى ازىرلەنگەن تاسىلدەرگە سايكەس ورىنداۋىن قاۋىپسىزدىك كەڭەسىنىڭ اپپاراتى باقىلايتىن بولادى.