پرەمەر-ءمينيستردىڭ ورىنباسارى ەرالى توعجانوۆتىڭ توراعالىعىمەن مەملەكەتتىك ورگانداردىڭ باسشىلارى مەن ەلىمىزدىڭ جەتەكشى عالىمدارىنىڭ قاتىسۋىمەن بيولوگيالىق قاۋىپسىزدىك ماسەلەلەرى جونىندەگى كەڭەس وتىرىسى ءوتتى, دەپ حابارلادى ۇكىمەت باسشىسىنىڭ ءباسپاسوز قىزمەتى.
كەڭەستە ەلىمىزدىڭ بيوقاۋىپسىزدىگىن قامتاماسىز ەتۋ ماسەلەلەرى بويىنشا مەملەكەت باسشىسىنىڭ قازاقستان حالقىنا جولداۋىندا قويىلعان مىندەتتەر تالقىلاندى. سونداي-اق «نازارباەۆ ۋنيۆەرسيتەت» دببۇ, «ينفەكتسياعا قارسى پرەپاراتتار عىلىمي ورتالىعى» اق, «فيتوحيميا» حولدينگى, «د.ۆ.سوكولسكي اتىنداعى وتىن, كاتاليز جانە ەلەكتروحيميا ينستيتۋتى» اق, «ميكروبيولوگيا جانە ۆيرۋسولوگيا عىلىمي-وندىرىستىك ورتالىعى» جشس جانە ت.ب. ورتالىقتار جۇرگىزىپ جاتقان COVID-19-عا قارسى وتاندىق دارىلىك زاتتاردى ازىرلەۋ ماسەلەسى تالقىلاندى.
كەڭەس وتىرىسىنىڭ قورىتىندىسى بويىنشا ە.توعجانوۆ ەپيدەميالىق سىن-تەگەۋرىندەرگە قارسى قاۋىپسىزدىكتى قامتاماسىز ەتۋ سالاسىندا عىلىمي-زەرتتەۋ جانە يننوۆاتسيالىق قىزمەتتىڭ تيىمدىلىگىن كۇشەيتۋ جونىندە ۇسىنىستار ازىرلەۋ جونىندەگى جۇمىس توبىن قۇرۋ, عىلىمي-زەرتتەۋ جانە يننوۆاتسيالىق جۇمىستاردى ىسكە اسىرۋ جونىندەگى كەشەندى جوسپار ازىرلەۋ, ەپيدەميالىق قاۋىپسىزدىكتى قامتاماسىز ەتۋگە جانە ينفەكتسيالىق اۋرۋلارعا قارسى دارىلىك پرەپاراتتاردىڭ جاڭا تۇرلەرىن ازىرلەۋگە باعىتتالعان عىلىمي جانە يننوۆاتسيالىق جوبالاردى نىسانالى قارجىلاندىرۋدى قامتاماسىز ەتۋ جونىندە ۇسىنىستار ەنگىزۋ, بيولوگيالىق قاۋىپسىزدىك سالاسىنداعى وتاندىق عىلىمي ينستيتۋتتاردىڭ عىلىمي-كادرلىق, ماتەريالدىق-تەحنيكالىق الەۋەتىن دامىتۋ جونىندەگى ناقتى ۇسىنىستاردى تالداۋ جانە ەنگىزۋ سەكىلدى بىرقاتار تاپسىرما بەردى.