پرەزيدەنتتىڭ مەملەكەتىمىزدىڭ قورعانىس قابىلەتىن نىعايتۋ قاجەتتىگى تۋرالى ايتقان سوزدەرى دە وتە ماڭىزدى. قاۋىپ-قاتەرلەرگە دەن قويۋدىڭ جەدەلدىگىن ارتتىرۋ مەملەكەتتىك ماڭىزى بار باسىمدىق بولىپ قالۋى قاجەت.
اۋعانستانداعى قازىرگى جاعدايدى بۇكىل الەم كورىپ, ءبىلىپ وتىر. اۋعانستان – گەوگرافيالىق تۇرعىدان بىزگە جاقىن ەل. سوندىقتان دا بىزدەگى باستى مىندەت – قىراعىلىقتى جوعالتپاۋ جانە قاۋىپسىزدىگىمىزدى نىعايتۋ بولىپ سانالادى. ماڭىزدى قۇجاتتا وسى ماسەلەگە ارنايى نازار اۋدارعان مەملەكەت باسشىسى ەلىمىزدىڭ سىرتقى قاۋىپ-قاتەرلەر مەن وقيعالارعا, جاعدايدىڭ ۋشىعۋىنا تاس-ءتۇيىن دايىن بولۋ كەرەكتىگىنە ەرەكشە ءمان بەرىپ وتىر.
بۇل ەلدە بولىپ جاتقان وقيعالار قازاقستانعا تىكەلەي قاۋىپ توندىرمەيدى. بىراق بەلگىلى ءبىر قاتەر تۋعىزارى ءسوزسىز. ءبىز اۋعانستانداعى جاعدايعا قاتىستى حالىقتىڭ الاڭداۋشىلىعىن كورىپ وتىرمىز. قوعامدا مازاسىزدىق وسە تۇسپەسە, ءالى دە سەيىلە قويعان جوق. ال ەگەر حالىقارالىق جاعداي ۋشىعىپ كەتسە, ءبىزدىڭ كۇشتىك قۇرىلىمدارىمىز كەز كەلگەن جاعدايعا بارىنشا دايىن بولۋى كەرەك. الەمدى الاڭداتقان بۇل جايت كۇشتىك قۇرىلىمدارىمىزدىڭ بارلىق بولىمشەلەرىنە بەلگىلى ءبىر مىندەتتەر جۇكتەيدى.
جاھاندىق شيەلەنىستىڭ ۋشىعىپ بارا جاتقانىن ەسكەرە وتىرىپ, مەملەكەت باسشىسى قورعانىس ونەركاسىبى كەشەنى مەن اسكەري دوكترينانى قايتا جۇكتەۋ مىندەتىن قويىپ وتىر. سونداي-اق اسكەري قىزمەتشىلەردىڭ ازاماتتىق ماماندىقتاردى يگەرۋى دە نازاردان تىس قالمايدى.
قورعانىس مينيسترلىگىنىڭ الدىنا بىرقاتار مىندەتتەر قويعان پرەزيدەنت قارۋلى كۇشتەردى دامىتۋدىڭ 2030 جىلعا دەيىنگى تۇجىرىمداماسىنىڭ بارلىق باسىمدىقتارىن تولىق كولەمدە ىسكە اسىرۋدى تاپسىردى. سونىمەن قاتار مەملەكەت باسشىسى اسكەري قاۋىپسىزدىك قاتەرلەرىنە جەدەل دەن قويۋ ءۇشىن باسقارۋ ورگاندارىن دايارلاۋ جونىندەگى ءىس-شارالاردى جالعاستىرۋ ماسەلەسىنە دە باسا نازار اۋداردى.
جوعارعى باس قولباسشى بارلىق وق-دارىلەر قويمالارىندا قاۋىپسىزدىكتى قامتاماسىز ەتۋ ءۇشىن قاتاڭ شارالار قابىلداۋدى جانە ەلدى مەكەندەردەن الىس جەردە زاماناۋي ساقتاۋ نىساندارىنىڭ قۇرىلىسىن تەزدەتۋدى تالاپ ەتتى. ءتيىستى قاراجات «قاۋىپسىز ەل» ۇلتتىق جوباسى شەڭبەرىندە قاراستىرىلۋعا ءتيىس.
سەناتورلار جولداۋدا ايتىلعان باسىمدىقتار مەن ناقتى مىندەتتەردى ىسكە اسىرۋ ءۇشىن بەلسەندى جۇمىس ىستەيتىن بولادى.
نۇرجان نۇرسيپاتوۆ,
پارلامەنت سەناتىنىڭ دەپۋتاتى, حالىقارالىق قاتىناستار, قورعانىس جانە قاۋىپسىزدىك كوميتەتىنىڭ حاتشىسى