مەملەكەت باسشىسى قاسىم-جومارت توقاەۆ قازاقستان حالقىنا جولداۋىن جاريا ەتىپ, مەملەكەتتىڭ تيىمدىلىگىن جانە ازاماتتاردىڭ ءال-اۋقاتىن ارتتىرۋعا باعىتتالعان باستامالار مەن مىندەتتەردى اتاپ ءوتتى. قاسىم-جومارت كەمەل ۇلى ءبىلىم جانە عىلىم سالاسى بويىنشا دا بىرقاتار ماڭىزدى ءارى وزەكتى مىندەت جۇكتەدى. پرەزيدەنت جولداۋىندا كوزدەلگەن تاپسىرمالاردىڭ ۋاقتىلى جانە ساپالى ورىندالۋىن قامتاماسىز ەتۋ ءۇشىن بارلىق قاجەتتى شارا قابىلدانادى.
جولداۋدا ايتىلعانداي, ۋربانيزاتسيا جانە دەموگرافيالىق پروتسەستەرگە بايلانىستى 2025 جىلى مەكتەپتەردە قوسىمشا شامامەن 1 ملن ورىن قاجەت بولادى. بۇل ماسەلەنى شەشۋ ءۇشىن 1 مىڭ جاڭا مەكتەپ سالىنادى. وسى جىلدىڭ وزىندە 200 مەكتەپتى اشۋ جوسپارلانىپ وتىر.
وقۋشىلاردىڭ بىلىمىندەگى ولقىلىقتاردىڭ ورنىن تولتىرۋ جانە وقۋ باعدارلامالارىن بەيىمدەۋ بويىنشا شارالار جوسپارلانعان. سونىمەن قاتار 5 مىڭ مەكتەپتى جاڭعىرتۋ, پاندىك كابينەتتەرمەن جابدىقتاۋ, قوسىمشا ءبىلىم بەرۋگە مەملەكەتتىك تاپسىرىس ءبولۋ جوسپاردا بار. پەداگوگتەردىڭ بىلىكتىلىگىن ارتتىرۋعا ەرەكشە نازار اۋدارىلادى. الەم قارىشتاپ دامىپ كەلە جاتقان جاعدايدا بۇل وتە ماڭىزدى.
مەملەكەت باسشىسى الەۋمەتتىك وسال توپتاعى بالالاردى قولداۋعا ەرەكشە كوڭىل ءبولدى. ولارعا «تسيفرلى تالىمگەر» جوباسى اياسىندا قوسىمشا ساباقتار الۋ مۇمكىندىگى بەرىلەدى.
قاشىقتان وقىتۋعا قاراماستان, ءبىزدىڭ وقۋشىلارىمىز الەمدىك شىڭداردى باعىندىرىپ, حالىقارالىق وليمپيادالاردا وتكەن جىلدارداعى رەكوردتارىن جاڭارتتى. دارىندى بالالاردى قولداۋ ءۇشىن پرەزيدەنتتىڭ تاپسىرماسىنا سايكەس كونكۋرسقا قاتىسپاي-اق گرانتتار بەرۋ, سونداي-اق بىرجولعى اقشالاي سىيلىقاقىلار كوزدەلەتىن بولادى.
پرەزيدەنت سونداي-اق تولىق جيناقتالعان اۋىل مەكتەپتەرىن جان باسىنا شاققانداعى قارجىلاندىرۋعا كەزەڭ-كەزەڭمەن كوشىرۋ جونىندە شارالار قابىلداۋدى تاپسىردى.
ەستەرىڭىزگە سالا كەتەيىن, 2020 جىلدان باستاپ بارلىق قالالىق مەكتەپ جان باسىنا قارجىلاندىرۋعا كوشتى. بۇل شارا ءارتۇرلى وڭىرلەردە قارجىلاندىرۋدى تەڭەستىرۋ, ماتەريالدىق-تەحنيكالىق بازانى جاقسارتۋ, الىم-سالىقتارمەن بايلانىستى تاۋەكەلدەردى ەداۋىر تومەندەتۋ, مەكتەپتەردىڭ قارجىلىق دەربەستىگىن ارتتىرۋ جانە بيۋدجەت قاراجاتىن جۇمساۋ تيىمدىلىگىن جاقسارتۋعا مۇمكىندىك بەردى. بۇل باستاما ءبىلىم بەرۋ جانە جەكەمەنشىك مەكتەپتەر اشۋعا جەكە ينۆەستيتسيالاردى تارتۋدى ىنتالاندىردى.
جولداۋعا سايكەس عىلىم سالاسىندا دا ەلەۋلى وزگەرىستەر بولماق. مەملەكەت باسشىسى جىل سوڭىنا دەيىن عىلىم تۋرالى زاڭناماعا وزگەرىستەر ەنگىزۋدى تاپسىردى. تۇزەتۋلەر عالىمدارىمىز تۇراقتى جانە لايىقتى ەڭبەكاقى الۋىن قامتاماسىز ەتۋگە باعىتتالۋعا ءتيىس. ول ءۇشىن جەتەكشى عالىمداردىڭ جالاقىسى بازالىق قارجىلاندىرۋعا قوسىلۋى كەرەك.
ءبىز پرەزيدەنتتىڭ قازاقستان حالقىنا جولداۋىندا قويىلعان بارلىق مىندەتتى ىسكە اسىرۋ ءۇشىن جوسپارلى جانە جۇيەلى جۇمىس ىستەيتىن بولامىز.
اسحات ايماعامبەتوۆ,
ءبىلىم جانە عىلىم ءمينيسترى