كەشە پالاتالاردىڭ بىرلەسكەن وتىرىسىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ VII شاقىرىلىمداعى پارلامەنتتىڭ ەكىنشى سەسسياسىنىڭ اشىلۋىن جاريالادى, دەپ حابارلادى ءماجىلىستىڭ ءباسپاسوز قىزمەتى.
جاڭا سەسسيا رەسمي اشىلعاننان كەيىن ەلىمىزدىڭ ءانۇرانى ورىندالدى. پارلامەنتتىك سەسسيانى اشقان مەملەكەت باسشىسى قاسىم-جومارت توقاەۆ قازاقستان حالقىنا «حالىق بىرلىگى جانە جۇيەلى رەفورمالار – ەل وركەندەۋىنىڭ بەرىك نەگىزى» اتتى جولداۋىن جاريالاپ, قازاقستاننىڭ الداعى دامۋ ستراتەگياسىن ايقىنداپ بەردى.
قاسىم-جومارت توقاەۆ پاندەميادان كەيىنگى كەزەڭدەگى ەلدى ودان ءارى دامىتۋعا, دەنساۋلىق ساقتاۋ جۇيەسىنىڭ تيىمدىلىگىن ارتتىرۋعا, ساپالى بىلىممەن قامتۋعا, وڭىرلىك ساياساتتى جەتىلدىرۋگە, ەڭبەك نارىعىندا ءتيىمدى ەكوجۇيە قۇرۋعا, ساياسي جاڭعىرۋعا, ادام قۇقىعىن قورعاۋ مەن ۇلتتى ۇيىستىرۋعا باعىتتالعان باستامالارىن جاريالادى.
پرەزيدەنت قازاقستان حالقىنا جولداۋىن ەل تاۋەلسىزدىگىنىڭ 30 جىلدىعىنا ارنالعان سوزدەرىمەن باستادى.
– بيىل ەگەمەن ەل بولعانىمىزعا 30 جىل تولىپ وتىر. تاۋەلسىزدىك – ءبىزدىڭ ەڭ قاستەرلى قۇندىلىعىمىز. قازاقستاننىڭ تۇڭعىش پرەزيدەنتى – ەلباسىنىڭ دارا ساياساتىنىڭ ارقاسىندا تابىستى ەل رەتىندە بۇكىل الەمگە تانىمال بولدىق. ەڭ باستى جەتىستىگىمىز – ءبىرتۇتاس ەل بولىپ, جاڭا مەملەكەت قۇردىق, – دەدى پرەزيدەنت.
ق.توقاەۆ سونداي-اق ءوزىنىڭ سوزىندە ىرگەمىزدى بەكىتىپ, ەڭسەمىزدى تىكتەگەنىمىزدى, حالىقارالىق قوعامداستىقتىڭ بەلدى مۇشەسىنە اينالعانىمىزدى, تۇراقتى قوعام قالىپتاستىرىپ, ورنىقتى دامۋ جولىنا تۇسكەنىمىزدى اتاپ كورسەتتى.
– مەملەكەتتىلىگىمىزدى نىعايتۋ ءۇشىن ءبىر ەل بولىپ ەڭبەك ەتىپ جاتىرمىز. ەگەمەندىك دەگەنىمىز – جالاڭ ۇران مەن جالىندى ءسوز ەمەس. ءبىز ءۇشىن ەڭ ماڭىزدىسى – ءار ازاماتتىڭ تاۋەلسىزدىك يگىلىگىن سەزىنە الۋى. ونىڭ باستى كورىنىسى – ەلدەگى بەيبىت ءومىر, قوعامداعى تۇراقتىلىق پەن تىنىشتىق. سونداي-اق حالىقتىڭ تۇرمىس ساپاسىنىڭ جاقسارۋى جانە جاستاردىڭ بولاشاققا نىق سەنىممەن قاراۋى. بارلىق باستامامىز وسىعان باعىتتالۋدا, – دەدى پرەزيدەنت.
مەملەكەت باسشىسى جولداۋدىڭ نەگىزگى باسىمدىقتارىن ايقىنداپ, قازاقستاندىقتاردىڭ ءال-اۋقاتىن ارتتىرۋ – ءوزىنىڭ پرەزيدەنت رەتىندەگى باستى ماقساتى ەكەنىن اتاپ ءوتتى. بۇل ماقساتقا جەتۋ ءۇشىن 5 نەگىزگى باستاما ايتىلدى.
بىرىنشىدەن, قاسىم-جومارت توقاەۆ 2022 جىلدىڭ 1 قاڭتارىنان باستاپ ەڭ تومەنگى جالاقى مولشەرىن 42 500 تەڭگەدەن 60 مىڭ تەڭگەگە دەيىن كوبەيتۋ تۋرالى شەشىمىن جاريا ەتتى. بۇل شارا 1 ملن ادامدى تىكەلەي قامتيتىن بولسا, ەڭبەك ەتىپ جۇرگەن بارلىق ازاماتقا جاناما تۇردە اسەر ەتەدى.
ەكىنشىدەن, سوڭعى 10 جىلدا كاسىپورىن يەلەرىنىڭ تابىسىنان 60 پايىزعا ارتتا قالىپ كەلگەن ەڭبەكاقى قورىن كوتەرۋ قاجەتتىگىن ايتتى. وسى ورايدا, ۇكىمەتكە جۇمىسشىلاردىڭ جالاقىسىن كوتەرۋ ءۇشىن بيزنەستى ىنتالاندىرۋ شارالارىن ازىرلەۋدى تاپسىردى. جۇمىسشىلارىنىڭ جالاقىلارىن وسىرگەن جۇمىس بەرۋشىلەرگە ساتىپ الۋلاردا جەڭىلدىك قاراستىرىلىپ, مەملەكەتتىك قولداۋدا باسىمدىق بەرىلەدى.
ۇشىنشىدەن, مەملەكەت باسشىسى ميكرو جانە شاعىن كاسىپكەرلىكتىڭ ەڭبەكاقى تولەۋ قورىنان الىناتىن بىرىڭعاي تولەم كولەمىن 34 پايىزدان 25 پايىزعا دەيىن تومەندەتۋدى ۇسىندى. بۇل بيزنەستىڭ مىڭداعان قىزمەتكەرىن «كولەڭكەلى اينالىمنان» شىعارۋعا, زەينەتاقى, الەۋمەتتىك جانە مەديتسينالىق ساقتاندىرۋ جۇيەلەرىنىڭ تولىق قاتىسۋشىسى بولۋىنا ىقپال ەتەدى.
تورتىنشىدەن, پرەزيدەنت 2022 جىلدان 2025 جىلعا دەيىن مادەنيەت قىزمەتكەرلەرىنىڭ, مۇراعاتشىلاردىڭ, كىتاپحاناشىلاردىڭ, تەحنيكالىق قىزمەتكەرلەردىڭ, قورىقشىلاردىڭ, كولىك جۇرگىزۋشىلەرىنىڭ جانە باسقالاردىڭ جالاقىسىن جىل سايىن ورتا ەسەپپەن 20 پايىزعا ءوسىرۋدى تاپسىردى. بۇل باستامانىڭ يگىلىگىن تۇتاستاي العاندا تاعى 600 مىڭ قازاقستاندىق كورەدى.
بەسىنشىدەن, قاسىم-جومارت توقاەۆ زەينەتاقى قورىنداعى جيناقتىڭ الۋعا بولاتىن بولىگىن «وتباسى بانكتەگى» ەسەپشوتقا اۋدارىپ, سول ارقىلى باسپانا ساتىپ الۋعا رۇقسات بەرۋ كەرەك دەپ سانايدى. ونىڭ ايتۋىنشا, بۇل قارجىنى دۇرىس جيناپ, ساۋاتتى پايدالانۋ داعدىسىنا ۇيرەتەدى.
پرەزيدەنت بىرلەسكەن وتىرىسقا قاتىسقان پارلامەنت دەپۋتاتتارىنا ءاربىر زاڭ جوباسىنىڭ قىر-سىرىنا تەرەڭ ءۇڭىلىپ, ونى ساپالى دايىنداۋعا شاقىردى. حالىقتىڭ مۇددەسىن قورعاۋ جولىندا ءاردايىم تاباندىلىق تانىتۋى كەرەك ەكەنىنە ەرەكشە توقتالدى. مەملەكەت باسشىسىنىڭ ايتۋىنشا, ءاربىر شەشىم ەلدىڭ سۇرانىسىن دا, مەملەكەتتىڭ مۇمكىندىگىن دە ەسكەرە وتىرىپ قابىلدانۋى قاجەت.
قاسىم-جومارت توقاەۆ ءسوز سوڭىندا مەملەكەتتىك اپپاراتتىڭ ءتيىمدى جۇمىس ىستەۋى قاجەت ەكەنىن ەسكە سالدى.
– مەملەكەت باسشىسىنىڭ ساياساتىنا كۇمانمەن قارايتىندار, جۇمىسىن اتقارا المايتىندار, ۋاقىت وتكىزىپ بوسقا وتىراتىندار مەن پرەزيدەنتتىڭ تاپسىرمالارىن ورىنداۋدان جالتاراتىندار بولسا, قىزمەت ورىندارىن بوساتۋلارى كەرەك. ءبىز قازىر دامۋىمىزدىڭ شەشۋشى كەزەڭىنە قادام باستىق. مەملەكەتتىك اپپارات ءبىرتۇتاس مەحانيزمدەي جۇمىلىپ جۇمىس ىستەۋگە مىندەتتى. تەك سوندا عانا ءبىز ماقساتىمىزعا جەتە الامىز, – دەدى پرەزيدەنت.