قازاقتىڭ فاريزاسى دۇنيەدەن ءوتتى

فاريزا وڭعارسىنوۆا 1939 جىلعى 5 جەلتوقساندا گۋرەۆ (قازىرگى اتىراۋ) وبلىسى نوۆوبوگات اۋدانىنا قاراستى ماناش اۋىلىندا تۋعان.

ەڭبەك جولىن 1961 جىلى گۋرەۆ مەملەكەتتىك پەداگوگيكالىق ينستيتۋتىنىڭ ءتىل-ادەبيەت فاكۋلتەتىن ءبىتىرىپ, بالىقشى اۋدانىنىڭ ەركىنقالا, وكتيابردىڭ 40 جىلدىعى اتىنداعى قازاق مەكتەپتەرىندە ۇستازدىق ەتۋدەن باستادى. 1966-1968 جىلدارى وبلىستىق «كوممۋنيستىك ەڭبەك» گازەتىندە ادەبي قىزمەتكەر بولىپ ىستەدى. اقىننىڭ قالىڭ جۇرتشىلىققا كەڭىنەن تانىلۋى ونىڭ 1968-1970 جىلدارى رەسپۋبليكالىق «لەنينشىل جاس» گازەتىنىڭ باتىس وبلىستارداعى مەنشىكتى ءتىلشىسى بولعان كەزىندە قالىپتاستى. سوندىقتان ول 1970 جىلى بىردەن رەسپۋبليكالىق «قازاقستان پيونەرى» گازەتىنە باس رەداكتور بولىپ كەلدى. 1978 جىلى جاڭادان اشىلعان «پيونەر» جۋرنالىنىڭ ىرگەسىن باسشى رەتىندە ءوز قولىمەن كوتەردى. كەيىن تاپ وسىلاي «اق جەلكەن» جۋرنالىن ومىرگە كەلتىردى.

فاريزا وڭعارسىنوۆا تاۋەلسىز ەلىمىزدىڭ قوعامدىق ومىرىنە دە بەلسەنە ارالاستى. ول 1996-2004 جىلدارى پارلامەنت ءماجىلىسىنىڭ دەپۋتاتى بولىپ سايلاندى.

اقىننىڭ العاشقى ولەڭدەرى ءباسپاسوز بەتتەرىندە 1958 جىلدان باستاپ جارىققا شىعا باستادى. ونىڭ ءار جىلدارى 20-دان استام ولەڭدەر جيناقتارى, وچەركتەرى, تاڭدامالى شىعارمالارى, ء«بىزدىڭ كامشات» اتتى پوۆەسى, اۋدارمالارى «جازۋشى», «جالىن», «مولودايا گۆارديا» باسپالارىنان جارىق كوردى. ورىس, تۋىسقان رەسپۋبليكالار اقىندارىنىڭ, چيلي اقىنى پ. نەرۋدانىڭ جىرلارىن, كەيبىر درامالىق شىعارمالاردى قازاق تىلىنە اۋداردى. ال 1984 جىلى ء«ۇيىم - مەنىڭ وتانىم», «ماڭعىستاۋ مونولوگتارى», «رەۆوليۋتسيا جانە مەن» اتتى ولەڭدەر توپتامالارى ءۇشىن قازاق كسر مەملەكەتتىك سىيلىعىنىڭ لاۋرەاتى اتاندى.

ومىردەن قازاق اقىن قىزدارى كوشباسىلارىنىڭ ءبىرى بولعان اسا تالانتتى اقىن كەتىپ بارادى. وقىرمان قاۋىمنىڭ ونىڭ شىعارماشىلىعىنان كۇتەرى ءالى دە كوپ ەدى. بىراق تاعدىردىڭ ءىسى وسىلاي بولدى.

سوندىقتان ەندىگى ايتارىمىز: جاتقان جەرىڭىز جايلى, توپىراعىڭىز تورقا بولسىن, قازاقتىڭ ايبىندى اقىن قىزى!

«ەگەمەن قازاقستان».