ينتەرنەت كەڭىستىگى ارقىلى تەرروريزم, ءدىني ەكسترەميزم, دەسترۋكتيۆتى ءدىني اعىمدار يدەولوگياسى كەڭ ەتەك جايىپ تۇرعانى بەلگىلى. اسىرەسە, جاستاردىڭ اراسىندا جات اعىمعا جارماسا كەتەتىندەر بارى كوڭىلگە كىربىڭ ۇيالاتادى. وسىنداي كەلەڭسىزدىكتىڭ الدىن الۋ ماقساتىندا الماتى وبلىسىندا ىقپالدى ىستەر اتقارىلۋ ۇستىندە.
بۇگىندە جەتىسۋ وڭىرىندە بۇل جۇمىس 3 باعىت بويىنشا جۇرگىزىلۋدە. ءبىرىنشى باعىت – الەۋمەتتىك جەلىدەگى پاراقشالار مەن YouTube كانالىندا قارسى ناسيحات, اقپاراتتىق ءتۇسىندىرۋ جۇمىستارىن جۇرگىزۋ بولسا, كەلەسىسى – دەسترۋكتيۆتى سيپاتتاعى كونتەنت قولدانۋشىلارىمەن بايلانىس. ال ءۇشىنشى باعىت – «كيبەرقاداعالاۋ» جۇيەسى ارقىلى زاڭعا قايشى, دەسترۋكتيۆتى سيپاتى بار كونتەنتتەردى بۇعاتتاۋ.
بۇل باعىتتا وبلىستىڭ ءدىن ىستەرى باسقارماسىنىڭ جانە وعان قاراستى قۇرىلىمدىق ورتالىقتاردىڭ Facebook, Vkontakte, Instagram, الەۋمەتتىك جەلىلەرىندەگى ء«دىن ىستەرى ورتالىعى», dinisteri_almobl جانە 17 اۋدان, 3 قالاداعى مامانداردىڭ رەسمي پاراقشالارىندا ءۇou tube كانالدارىندا جىل باسىنان 8800 ماتەريال جاريالانعان. ونىڭ 495-ءى ماقالا, 855-ءى بەينەبايان, 183-ءى دەموتيۆاتور, 7265-ءى اقپاراتتىق ماتەريال.
وبلىستىق ءدىن ىستەرى باسقارماسىنىڭ باسشىسى باۋىرجان نيەتتىڭ ايتۋىنشا, جىل باسىنان وبلىستىق «جەتىسۋ» تەلەارناسى الاڭىندا «نۇر-مۇباراك» ۋنيۆەرسيتەتى جانىنداعى «ەكسترەميزمگە قارسى ءىس-قيمىل ورتالىعىنىڭ» ديرەكتورى تيمۋر ءنۇسىپحان ۇلىنىڭ جۇرگىزۋىمەن «بۇگىنگى ءدىن» اۆتورلىق رۋحاني-تانىمدىق باعدارلاماسى ءتۇسىرىلىپ, كورسەتىلۋدە. بۇگىنگە دەيىن اتالعان باعدارلاماعا سۇحباتقا «نۇر-مۇباراك» ۋنيۆەرسيتەتىنىڭ پرورەكتورى ق.قۇرمانباەۆ, ءابۋ حانيفا عىلىمي-زەرتتەۋ ورتالىعىنىڭ زەرتەۋشى-عالىمى ا.ادىلباەۆ, فيلوسوفيا عىلىمدارىنىڭ كانديداتى, دوتسەنت ج.ساندىباەۆ, نۇر-مۇباراك ەيمۋ-ءنىڭ وقىتۋشىسى, يسلامتانۋ عىلىمىنان PhD اسقار اكىمحانوۆ, بۇرىنعى باس ءمۇفتي راتبەك قاجى نىسانباي ۇلى سىندى ءدىن سالاسىنىڭ قايراتكەرلەرى شاقىرىلعان.
سونداي-اق قۇرىلىمدىق ورتالىقتىڭ جەكە ستۋدياسىندا بەكىتىلگەن جوسپارعا سايكەس «نۇر-مۇباراك» ۋنيۆەرسيتەتىنىڭ ۇستازدارىن, پروفەسسورلىق قۇرامىن, راتت مۇشەلەرىن «دىنساقشى» باعدارلاماسىنا تارتا وتىرىپ ءتۇرلى تاقىرىپتاردى قامتىعان 26 ءتۇسىرىلىم جۇرگىزىلىپ, الەۋمەتتىك جەلىلەردەگى پاراقشالارعا جۇكتەلگەن. ءۇش جىل قاتارىنان وڭىرگە بەلگىلى جۋرناليست جۇماحمەت جايلاۋبايدىڭ جەكە اۆتورلىق جۇمىسى اياسىندا «عيبرات» باعدارلاماسى تۇراقتى جۇمىس ىستەپ كەلەدى. اتالعان باعدارلاماعا سايكەس 11 تاقىرىپتىق ءتۇسىرىلىم جاسالىپ, بارلىق رەسمي پاراقشالار ارقىلى تۇرعىندار نازارىنا ۇسىنىلۋدا.
باسقارما تاراپىنان ءوز مەنشىگىندەگى 2416 كىتاپ قورى بار جەكە كىتاپحانانى Bookscan ءمودۋلى ارقىلى ونلاين فورماتتا وقىرمانعا ۇسىنۋ جۇمىستارى جۇرگىزىلۋدە.
جۇرگىزىلگەن مونيتورينگ جۇمىستارىنىڭ ناتيجەسىندە Instagram الەۋمەتتىك جەلىسىندە تەرىس ءدىني اعىمداردىڭ يدەولوگياسىنا قىزىعۋشىلىق تانىتقان 38 581 عالامتور تىركەلۋشىسى انىقتالدى. ال «ۆكونتاكتە» الەۋمەتتىك جەلىسىندە ءدال وسىنداي توپتارعا تىركەلگەن 32 217 ادام 2020 جىلدىڭ باسىندا انىقتالعان بولسا, جۇرگىزىلگەن جۇمىس ناتيجەسىندە بۇگىنگى كۇنى ولاردىڭ سانى 15 416 ادامعا, ياعني 52,3% دەيىن ازايدى.
– «ۆكونتاكتە» الەۋمەتتىك جەلىسىندەگى جەكە پاراقشالاردا دەسترۋكتيۆتى ءدىني اعىم يدەولوگياسىن بەلسەندى تۇردە ناسيحاتتاعانى ءۇشىن وبلىستىڭ 4 ازاماتىنا اكىمشىلىك قۇقىق بۇزۋشىلىق تۋرالى كودەكستىڭ 453 بابى, 2 تارماعىن بۇزۋ فاكتىلەرى بويىنشا 20 ايلىق ەسەپتىك كورسەتكىش مولشەرىندە جالپى سومماسى 232 000 تەنگە ايىپۇل سالىندى. بۇدان بولەك, باسقارما تاراپىنان تاعى 7 ازاماتتىڭ جەكە پاراقشاسى باقىلاۋعا الىنىپ, ءتيىستى ساراپتاما قورىتىندىسىن الۋ ماقساتىندا ءدىن ىستەرى كوميتەتىنە قۇجاتتار جولداندى. ساراپتاما قورىتىندىسىنا ساي اكىمشىلىك ءىس قوزعاۋ كوزدەلۋدە, – دەيدى باۋىرجان نيەت.
بۇگىنگى كۇنگە دەيىن, «كيبەرقاداعالاۋ» جۇيەسى ارقىلى ماماندار تاراپىنان الەۋمەتتىك جەلىلەردەگى تەرىس يدەولوگيانى ناسيحاتتاۋشى 7869 ماتەريال مەن سىلتەمە انىقتالىپ, ساراپتاماعا جىبەرىلگەن. «كيبەرقاداعالاۋ» جۇيەسىنە سىلتەمە جۇكتەۋ قارقىنى بويىنشا الماتى وبلىسى ءدىن ىستەرى باسقارماسى رەسپۋبليكا بويىنشا جاقسى كورسەتكىشكە قول جەتكىزىپ وتىر.