ەلباسىنىڭ اتىنا اتىراۋ مۇناي جانە گاز ينستيتۋتىنىڭ ستۋدەنتتەرىنەن جەدەلحات كەلىپ ءتۇستى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
اتالعان ينستيتۋتتا اقىلى نەگىزدە ءبىلىم الىپ كەلگەن 50 ستۋدەنتتىڭ ءبىلىم بەرۋ گرانتتارىنا قول جەتكىزگەنىن ۇلكەن قۋانىشپەن حابارلاعان اۆتورلار جەدەلحاتتا بىلاي دەپ جازعان: “اسا مارتەبەلى نۇرسۇلتان ءابىش ۇلى! ءوزىڭىزدىڭ باستاماڭىزبەن جاستارعا جوعارى ءبىلىم بەرۋ بويىنشا جاسالىپ وتىرعان قامقورلىقتى بىزدەر وسى شارالاردان ناقتى سەزىنىپ وتىرمىز. ءبىز ءوز كەزەگىمىزدە سىزگە الداعى ۋاقىتتا دا وسى سەنىمدى اقتاپ, ساپالى ءبىلىم الىپ, ارقاشان ەلىمىزدىڭ سانالى ازاماتتارىنىڭ قاتارىنان تابىلامىز دەپ ۋادە بەرەمىز.
اتىراۋ مۇناي جانە گاز ينستيتۋتىندا ءبىلىم الىپ جاتقان بارشا ستۋدەنتتەر اتىنان سىزگە زور ريزاشىلىعىمىزدى بىلدىرەمىز جانە تاۋەلسىز ەلىمىزدىڭ جارقىن كەلەشەگى ءۇشىن اتقارىپ جاتقان ىستەرىڭىزگە تولىمدى تابىستار تىلەيمىز”.