ەلوردادا ءورت جيىلەپ كەتتى. ۇستىمىزدەگى جىلدىڭ تەك سوڭعى ءۇش ايىندا عانا 222 ءورت تىركەلدى, وندا 11 ادام قايتىس بولدى. شىعىن 9418 مىڭ تەڭگەنى قۇرايدى. وتكەن جىلدىڭ وسى كەزەڭىمەن سالىستىرعاندا, ءورت 51 پايىزعا, ادام ءولىمى 5 پايىزعا وسكەنى بايقالادى. وسىعان بايلانىستى ايتارىمىز, ءبىزدى بارىنەن بۇرىن ءتىلسىز جاۋ جالماعان ادام سانىنىڭ كوپتىگى الاڭداتادى. جىلدىڭ باسىندا ەلوردانىڭ پرومىشلەننىي ايماعىندا 1952 ج. تۋعان ازاماتشا ت. ەمبەرگەنوۆا جانە 1953 ج. تۋعان ازاماتشا ش.جولداسباەۆا ورتتەن وپات بولدى. 25 اقپاندا اقان سەرى كوشەسى بويىندا ورنالاسقان تۇرعىن ۇيدە ءورت شىعىپ, ناتيجەسىندە 5 ادام – 1975 ج. تۋعان ازاماتشا ي. شايدۋلينا جانە ونىڭ ءتورت بالاسى قايتىس بولدى. 27 ناۋرىزدا وسىنداي تۇرعىن ۇيدە بولعان ورتتەن 1968 ج. تۋعان ازاماتشا گ. چايكينا جانە 1999 ج. تۋعان ازامات ب. قايكەنوۆ كوز جۇمدى.
وسىنداي جانە باسقا دا كوپتەگەن ورتتەردىڭ شىعۋ سەبەبى پەشتى پايدالانۋ كەزىندە جالپى ءورت قاۋىپسىزدىگىنىڭ ساقتالماۋى, ەلەكتر جۇيەلەرى, ەلەكتر قوندىرعىلارىن جوندەۋ جانە تەحنيكالىق پايدالانۋ ەرەجەلەرىنىڭ بۇزىلۋى, سونداي-اق ولاردىڭ ابدەن توزۋى بولىپ تابىلادى. مىنە, سوندىقتان دا ءورتتىڭ باستى بولىگى ازاماتتاردىڭ قاراپايىم ءورت قاۋىپسىزدىگى ەرەجەلەرىن بىلمەۋى مەن ونى ەلەمەۋشىلىك سەبەبىنە بايلانىستى تۇرعىن ءۇي سەكتورلارىندا ءجيى ورىن الادى.
سەرىك بەيسەمبەكوۆ, الماتى اۋدانىنىڭ تجب اعا ينجەنەرى.