ۇلى جەڭىس مەرەكەسى جاقىنداعان سايىن اتقارىلعان شارالار دا سان-سالالىعىمەن سيپاتتالا تۇسۋدە. ۇرىس دالالارىندا 90 مىڭنان استام سولتۇستىكقازاقستاندىق جاۋمەن شايقاسسا, 53-ءى كەڭەس وداعىنىڭ باتىرى اتانعان, ال 11-ءى “داڭق” وردەنىنىڭ تولىق يەگەرى بولعان. سولاردان كوزى تىرىلەرى 900-دەي عانا. ەلباسىنىڭ تاپسىرماسىنا سايكەس وبلىستا 24 مىڭعا جۋىق سوعىس ارداگەرى مەن تىل ەڭبەككەرلەرىنە جان-جاقتى قۇرمەت كورسەتۋ ەرەكشە ەكپىن الدى. وبلىس اكىمى سەرىك ءبىلالوۆ ءبىر توپ سوعىس, ەڭبەك ارداگەرلەرىن قابىلداپ, مەرەكەلىك مەدالداردى سالتاناتتى تۇردە تابىس ەتتى. ونى ءبىرىنشى بولىپ ساپار دۇيسەنوۆ, پەتر گلاكوۆ, كۇلكە اۋباكىروۆا, مۇقاتاي ايتباەۆ الدى. ايماق باسشىسى جەڭىستىڭ 65 جىلدىعىن مەرەكەلەۋ حالىقتىق مەيرامعا اينالاتىنىن, بىردە-ءبىر مايدانگەر نازاردان تىس قالمايتىنىن ايتا كەلىپ, استانا مەن ماسكەۋ قالالارىندا وتەتىن مەرەكەلىك شارالارعا ارنايى دەلەگاتسيانىڭ جاساقتالعانىن جەتكىزدى.
وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باستىعى اسقار ساقىپكەرەەۆ سوعىس ارداگەرلەرى مەن مۇگەدەكتەرىنە, ولارعا تەڭەستىرىلگەندەر مەن تىل ەڭبەككەرلەرىنە رەسپۋبليكادان جانە جەرگىلىكتى جەردەن بەرىلەتىن بىرجولعى جاردەماقىنىڭ مەرەكەگە دەيىن ءتيىستى ەسەپ-شوتتارعا اۋدارىلاتىنىن, باسقا دا قارجىلىق قولداۋ-جەڭىلدىكتەردىڭ قاراستىرىلاتىنىن مالىمدەدى.
ءومىر ەسقالي, سولتۇستىك قازاقستان وبلىسى.