مىستى شاھار جەزقازعاندا ەرەكشە قاجەتتىلىكتەرى بار بالالارعا دەگەن قامقور كوزقاراس قۋانتادى. مىسالى, تاياۋدا عانا وسى قالاداعى مەديتسينالىق ورتالىق بازاسىندا وڭالتۋ ورتالىعى اشىلىپ, بۇرىننان بەرگى قوردالانعان كوپتەگەن ماسەلەنىڭ وڭ شەشىم تابۋىنا يگى ىقپالىن تيگىزە باستادى.
بۇل يگىلىكتى ىستەن «قازاقمىس» سىندى الپاۋىت كاسىپورىن دا تىس قالمادى. اتاپ ايتقاندا, كورپوراتسيا ءۇي-جايدى جوندەۋگە, زاماناۋي جابدىقتار ساتىپ الۋعا, سونىمەن بىرگە مەديتسينالىق پەرسونالدى وقىتۋ مەن بىلىكتىلىگىن ارتتىرۋعا قاجەتتى قوماقتى قاراجات ءبولدى.
اتالعان ورتالىقتا 18 جاسقا دەيىنگى ەرەكشە قاجەتتىلىكتەرى بار بالالار وڭالتۋدان وتە الادى. بۇل جەردە ەمدەلۋشى بالالاردىڭ اتا-انالارىنىڭ قايدا جۇمىس ىستەيتىنى ماڭىزدى ەمەس. ال 18 جاستان اسقان ءتۋابىتتى مۇگەدەكتىگى بار ەمدەلۋشىلەردىڭ اتا-انالارى مىندەتتى تۇردە «قازاقمىس» كورپوراتسياسىندا ەڭبەك ەتۋى ءتيىس. نەگە دەسەڭىز, ولاردى وڭالتۋعا جۇمسالاتىن شىعىننىڭ ءبارىن كومپانيا ءوز موينىنا الادى.
جەزقازعانداعى وڭالتۋ ورتالىعى جاقىن جانە الىس شەتەلدەردە وندىرىلگەن زاماناۋي قۇرال-اسپاپتارمەن جابدىقتالعان. اتاپ ايتقاندا, گەرمانيادان اكەلىنگەن «موتومەد» رەابيليتاتسيالىق ترەناجەرى, ۆەرتيكاليزاتور, «كەنگۋرۋ» ءموبيلدى قۇرىلعىسى, تىرەك-قيمىل اپپاراتى بۇزىلعان بالالارعا ارنالعان نەيروورتوپەديالىق ساۋىقتىرۋ پنەۆموكوستيۋمى ەم الۋشىلارعا قالتقىسىز قىزمەت ەتەدى. سونىمەن بىرگە ورتالىقتا تۇزەتۋ كابينەتتەرى اشىلعان. ال جاڭا بۋىن كومپيۋتەرلىك توموگرافى بۇعان دەيىنگى كوپتەگەن ماسەلەنىڭ شەشىم تابۋىنا سەپتىگىن تيگىزۋدە.
قاراعاندى وبلىسى,جەزقازعان قالاسى