ۇلى جەڭىستىڭ 65 جىلدىعى قارساڭىندا بۇگىندە قۇجاتتار مەن جاڭا تاريح ورتالىعى دەپ اتالاتىن قالالىق مۇراعاتتان سۇراپىل سوعىس جىلدارىنان سىر شەرتەتىن ءتۇرلى دەرەكتەر وقتىن-وقتىن تابىلىپ قالىپ جاتىر.ايتالىق, ءبىر دەرەك سەمەيلىك كەنجەبەك ءشاكەنوۆ دنەپردەن وتكەندەگى كوزسىز ەرلىگى ءۇشىن كەڭەس وداعىنىڭ باتىرى اتاعىن 1944 جىلى كەڭەس اسكەرىنىڭ كۇنى قارساڭىندا العاندىعىن ايعاقتايدى. ال ەكىنشى ءبىر دەرەك كەلەر جىلعى ءداپ وسىنداي مەرەكە كۇنى سەمەيلىك جەرلەستەرىن تاعى ءبىر كەڭەس وداعىنىڭ باتىرى ۆاسيلي شۋلياتنيكوۆتىڭ قۇتتىقتاعانى جونىندە سىر شەرتەدى.
تاۋەلسىز ەلىمىز ەگەمەندىككە قول جەتكىزگەننەن بەرگى جەردە بىزدە وتان قورعاۋشىلار كۇنى باسقا كۇنگە اۋىستىرىلعانى بارشامىزعا ءمالىم. سولاي دەي تۇرعانمەن, تاريحتىڭ اتى تاريح. سوندىقتان وتكەندى دە ءبىرجولاتا سىزىپ تاستاۋعا بولمايدى.
ەندى جوعارىدا اتالعان ورتالىقتان تابىلعان مىنا ءبىر دەرەككە كوڭىل اۋدارايىق. مايدانگەر ناسىر كەنباەۆ 1943 جىلى ەلدەگى قالىڭدىعى ءاتينا قاسىمبەكوۆاعا كەزەكتى ءبىر حاتىن جولداماي ما. وكىنىشكە قاراي, ول حات يەسىنىڭ قولىنا تيمەي جوعالىپ كەتەدى. بۇل ەكى ارالىقتا مايدانگەر سوعىستان امان-ەسەن ورالىپ, ءسۇيگەن جارىنا قوسىلادى. سودان ارادا ۇزاق ونداعان جىلدار وتكەن سوڭ ۇلى وتان سوعىسى تۋرالى تەلەديداردان حابار كورىپ وتىرعان ناسىر اقساقال ءوزىنىڭ قولىمەن جازىلعان الگى حاتتى كورىپ قالادى. وسىعان دەيىن دە, سودان كەيىن دە تالاي كورمەگە قويىلعان حاتتىڭ ءتۇپ نۇسقاسى اقىرى حات يەلەرىنىڭ قولىنا تيەدى.
بۇگىنگى كۇنى جاستارى توقسانعا جاقىنداپ قالعان ناسىر اقساقال مەن ءاتينا اجە بالالار, نەمەرە- شوبەرەلەرىمەن, اعايىن-تۋىستارىمەن بىرگە جەڭىستىڭ 65 جىلدىعىن قارسى الۋعا قامدانىپ وتىر.
داۋلەت سەيسەن ۇلى,سەمەي.