26-30 ءساۋىر ارالىعىندا استانا قالاسىندا “قازاقستان رەسپۋبليكاسى پرەزيدەنتىنىڭ كۋبوگى” ءۇشىن جاسوسپىرىمدەر اراسىندا فۋتبولدان ءىىى حالىقارالىق تۋرنير ءوتىپ جاتىر. بۇل ءدۇبىرلى دودادا قازاقستان, وزبەكستان, تۇركيا, ءازىربايجان, رەسەي, سەربيا جانە قىتايدىڭ دارىندى جاس اياقدوپشىلارى جاسىل الاڭعا شىعادى. وسى ءتۋرنيردى وتكىزۋ شاراسىنىڭ باس ۇيىمداستىرۋشىلارى – قازاقستان فۋتبول فەدەراتسياسى مەن “نۇر وتان” حالىقتىق-دەموكراتيالىق پارتياسى وكىلدەرى جۋرناليستەرگە جيىن وتكىزدى.
“نۇر وتان” حدپ ورتالىق اپپاراتى جەتەكشىسىنىڭ ورىنباسارى ق. اقساقالوۆ ەلباسىمىزدىڭ جولداۋىنا سايكەس قازاقستان حالقىنىڭ سالاماتتى ءومىر سالتىن ناسيحاتتاۋ جانە قالىپتاستىرۋ – ءبىزدىڭ نەگىزگى باعىتتارىمىزدىڭ ءبىرى جانە ءۇشىنشى جىل قاتارىنان وتكىزىلگەلى وتىرعان پرەزيدەنت كۋبوگى ءۇشىن جاسوسپىرىمدەر اراسىنداعى دودا سونىڭ ءبىر كورىنىسى بولىپ تابىلادى, دەدى.
فۋتبول فەدەراتسياسىنىڭ ۆيتسە-پرەزيدەنتى ۆ. كاتكوۆتىڭ مالىمدەۋىنشە, وسى ايتۋلى تۋرنير بيىل العاش رەت “استانا-ارەنا” ستاديونىندا ۇيىمداستىرىلىپ وتىر. ءداستۇرلى دودا ەلىمىزدە 25 ساۋىردە اتالىپ وتەتىن فۋتبول كۇنىنە ورايلاستىرىلدى. ويتكەنى, 2002 جىلعى 25 ساۋىردە ەگەمەن ەلىمىز – قازاقستان ۋەفا-عا مۇشەلىككە وتكەن بولاتىن.
وسى تۋرنيردە ەلىمىزدىڭ نامىسىن “تسەسنا” فۋتبول مەكتەبىنىڭ تۇلەكتەرى قورعاپ ءجۇر. بيىلعى تۋرنير, سونداي-اق ءبىزدىڭ جاس فۋتبولشىلارىمىزدىڭ 2010/2011 جىلعى ەۋروپا چەمپيوناتىنا ىرىكتەۋ ويىندارىنا دايىندىقتىڭ كەزەكتى جاتتىعۋ سىناعى دا بولماق.
2009 جىلى “قازاقستان رەسپۋبليكاسى پرەزيدەنتىنىڭ كۋبوگى” ءتۋرنيرىنىڭ باس قادىرلى قوناعى رەتىندە فيفا پرەزيدەنتى ي. بلاتتەر كەلگەن ەدى. فيفا باسشىسى ءتۋرنيردىڭ وتكىزىلۋىنە جانە اتقارىلعان جۇمىستارعا جوعارى باعا بەرىپ, كوڭىلىنىڭ تولعانىن جەتكىزگەن-ءتىن. الماتى قالاسىندا وتكەن العاشقى تۋرنيردىڭ جەڭىمپازى تۇرىكتىڭ “بەشيكتاش” كلۋبىنىڭ فۋتبولشىلارى بولدى. ال 2009 جىلى كۋبوك “ولە برازيل” فۋتبول اكادەمياسىنىڭ كومانداسىنا بۇيىردى.
بيىلعى ءتۋرنيردىڭ سالتاناتتى اشىلۋى كەشە, ءساۋىردىڭ 26-سى كۇنى بولدى. اقتىق كەزدەسۋلەر 30 ءساۋىر كۇنى وتەدى.
ۇيىمداستىرۋشىلاردىڭ ماقساتى تەك جەڭىمپازداردى انىقتاۋ عانا ەمەس, جوعارىدا ايتقانىمىزداي, جاستار اراسىندا سالاماتتى ءومىر سالتىن ناسيحاتتاۋ جانە قالىپتاستىرۋ, قازاقستان قوناقتارىنا ەلىمىزدىڭ سالت-داستۇرلەرى مەن مادەنيەتىن تانىتۋ, سونىمەن قاتار, مەملەكەتارالىق دوستىق بايلانىستاردى نىعايتۋ بولىپ تابىلادى.
جاندوس مەديمانوۆ.