كەشە پرەمەر-مينيستر كارىم ءماسىموۆتىڭ توراعالىعىمەن ۇكىمەتتە كەزەكتى سەلەكتورلىق كەڭەس بولىپ ءوتتى. وندا ء“بىر تەرەزە” قاعيداتى بويىنشا حالىققا قىزمەت كورسەتۋ ورتالىقتارىنىڭ (حقكو) جۇمىسى جانە 2010 جىلعى “جول كارتاسىن” ءىس جۇزىنە اسىرۋ ماسەلەلەرى قارالدى.
“قازاقستان رەسپۋبليكاسى ءادىلەت مينيسترلىگى تىركەۋ قىزمەتى جانە قۇقىقتىق قىزمەت كورسەتۋ كوميتەتىنىڭ حالىققا قىزمەت كورسەتۋ ورتالىقتارى مەملەكەتتىك مەكەمەلەرىن جەرگىلىكتى اتقارۋشى ورگانداردىڭ قاراماعىنا بەرۋ تۋرالى” 2010 جىلعى 15 قاڭتارداعى ۇكىمەت قاۋلىسىنان كەيىن ەلىمىزدە جۇمىس ىستەپ تۇرعان بارلىق حقكو-لار جەرگىلىكتى اتقارۋشى ورگانداردىڭ قاراماعىنا بەرىلگەن بولاتىن. سەلەكتورلىق كەڭەستە بايانداما جاساعان ادىلەت ءمينيسترى راشيد ءتۇسىپبەكوۆ قازىر حقكو-لارعا قىزمەت كورسەتۋ ماسەلەلەرى بويىنشا ادىستەمەلىك جانە قۇقىقتىق كومەك كورسەتۋ شارالارى عانا مينيسترلىككە جۇكتەلگەنىن اتاپ كورسەتتى.
وڭىرلەردەگى حقكو-لاردىڭ جۇمىسىن ودان ءارى جانداندىرۋ ماقساتىندا “2010-2012 جىلدارعا ارنالعان رەسپۋبليكالىق بيۋدجەت تۋرالى” زاڭعا سايكەس اعىمداعى جىلى وبلىستىق بيۋدجەتتەرگە جالپى كولەمى 7 ميلليارد تەڭگەدەن استام ماقساتتى ترانسفەرتتەر بولىنگەن. كەڭەس بارىسىندا وبلىس اكىمدىكتەرىنىڭ حقكو-لاردىڭ سانىن كوبەيتۋ باعىتىندا اتقارىپ جاتقان وڭ ىستەرى اتاپ كورسەتىلدى. ءماسەلەن, جەرگىلىكتى اتقارۋشى ورگانداردىڭ قۇزىرىنا بەرىلگەن كەزدە ولاردىڭ سانى 316 بولسا, بۇگىندە ولاردىڭ سانى 335-كە جەتكەن. سەلەكتورلىق كەڭەستە حقكو-لاردىڭ جۇمىسىنداعى جەرگىلىكتى جەرلەردە تۇرعىندارعا جەدەل دە ساپالى قىزمەت كورسەتۋدە ورىن العان پروبلەمالار جان-جاقتى تىلگە تيەك ەتىلدى.
كۇن تارتىبىندەگى ەكىنشى ماسەلە بويىنشا, ەڭبەك جانە حالىقتى الەۋمەتتىك قورعاۋ ءمينيسترى گۇلشارا ابدىقالىقوۆا بايانداما جاسادى. مەملەكەت باسشىسىنىڭ تاپسىرماسىمەن داعدارىس جىلدارىندا ءوزىنىڭ تيىمدىلىگىن كورسەتكەن “جول كارتاسى” باعدارلاماسىنىڭ شارالارىن 2010 جىلى دا جالعاستىرۋ تۋرالى شەشىم قابىلدانعان بولاتىن. وسىعان بايلانىستى 2010 جىلعى “جول كارتاسىنا” رەسپۋبليكالىق بيۋدجەتتەن 100 ملرد. تەڭگە قارجى ءبولىندى. جەرگىلىكتى بيۋدجەتتەر قوسىمشا 43,4 ملرد. تەڭگە قارجى ءبولۋ ماسەلەسىن قاراستىرىپ وتىر. ماڭعىستاۋ وبلىسى جەرگىلىكتى بيۋدجەتتەن تاعى دا 1 ملرد. تەڭگە قاراستىرۋ مۇمكىندىگىن تاپتى. 2010 جىلعى “جول كارتاسى” باعىتتارى بويىنشا بارلىعى 3224 جوبا جۇزەگە اسىرىلماق. وسى جوبالار اۋقىمىندا اتقارىلاتىن جوندەۋ جۇمىستارىنا 127,6 مىڭ ادام جۇمىسقا تارتىلماق.
وتكەن جىلدىڭ سوڭىندا ەلىمىزدەگى جۇمىسسىزدار سانى 532 مىڭ ادام بولىپ, جۇمىسسىزدىق دەڭگەيى 6,3 پايىزدى قۇراسا, وسى جىلدىڭ ءبىرىنشى توقسانىنىڭ سوڭىندا جۇمىسسىزدىق دەڭگەيى 6,1 پايىزعا دەيىن تومەندەگەن. 2010 جىلعى الەۋمەتتىك جۇمىس ورىندارى مەن جاستار تاجىريبەسى باعدارلامالارى شەڭبەرىندە شامامەن 53 مىڭ ۋاقىتشا جۇمىس ورنىن اشۋعا 6,3 ملرد. تەڭگە قارجى كوزدەلگەن. بۇل باعىتتاعى كەشەندى شارالار ءوڭىرلەردە بيىلعى جىلدىڭ باسىندا-اق قولعا الىنعان. 6512 جۇمىس بەرۋشىمەن 20424 جۇمىس ورىندارىن اشۋ تۋرالى كەلىسىم-شارت جاسالدى. قازىردىڭ وزىندە الەۋمەتتىك جۇمىس ورىندارى مەن جاستار تاجىريبەسى باعدارلامالارى بويىنشا حالىقتىڭ نىسانالى توپتارى قاتارىنان 17,7 مىڭ ادام جۇمىسقا ورنالاستىرىلدى. ولاردىڭ ىشىندە 4,5 مىڭ ادام حالىقتىڭ از قامتاماسىز ەتىلگەن توپتارىنىڭ اراسىنان قۇرالدى.
سەلەكتورلىق كەڭەستى ۇكىمەت باسشىسى كارىم ءماسىموۆ قورىتىندىلاپ, قارالعان ماسەلەلەر بويىنشا ورىن العان پروبلەمالاردى شەشۋگە ءتيىستى ورگاندارعا ءبىر اي مەرزىم بەرەتىنىن ەسكەرتتى. ماۋسىم ايىنىڭ باسىندا بۇگىنگى كۇن تارتىبىندە قارالعان ماسەلەلەردى قايتادان ۇكىمەت وتىرىسىندا تالقىلاۋ تۋرالى تاپسىرما بەردى. ەلباسىنىڭ تىكەلەي تاپسىرماسىمەن بيىل ءبىز “جول كارتاسى” باعدارلاماسىن ودان ءارى جالعاستىرۋدامىز, بۇل – حالقىمىزدىڭ جاعدايىن جاقسارتۋدان تۋىنداعان يگى شەشىم. سوندىقتان وسى ماقساتقا ءبولىنگەن بيۋدجەت قارجىسىنىڭ بارىنشا ءتيىمدى جۇمسالۋىن قاداعالاۋدى تاپسىرامىن, – دەدى پرەمەر-مينيستر.
سونىمەن بىرگە ك.ءماسىموۆ كوكتەمگى سۋ تاسقىنىنان زارداپ شەككەن شىعىس قازاقستان وبلىسىنا كومەك كورسەتۋ ماقساتىندا ءاربىر وبلىس 50 ميلليون تەڭگە قارجى اۋدارۋى قاجەتتىگىن اتاپ كورسەتتى. وتكەن اپتادا, دەدى ودان ءارى ۇكىمەت باسشىسى, قىرعىز رەسپۋبليكاسى ۋاقىتشا ۇكىمەتىنىڭ وكىلدەرى گۋمانيتارلىق كومەك سۇراپ كەلگەنىن بىلەسىزدەر. ەلباسىنىڭ تاپسىرماسىمەن باۋىرلاس قىرعىز ەلىنە گۋمانيتارلىق كومەك رەتىندە 3 مىڭ توننا جانار-جاعارماي بەرۋ ۇيعارىلدى.
جىلقىباي جاعىپار ۇلى.