دەيدى جول ازابىن تارتىپ جۇرگەن قوستانايلىقتار
قوستانايدان ەلىمىزدىڭ ءوڭتۇستىگىنە قاراي “قوستاناي–الماتى” پويىزى عانا جۇرەدى. مۇنىڭ ءوزى شۋ ستانساسىنا توقتاعاننان كەيىن ەلىمىزدىڭ وڭتۇستىك-شىعىسىنا قاراي كەتەدى. ال جولاۋشىعا قوستانايدان ەلىمىزدىڭ ءوڭتۇستىگىندە جاتقان تاراز, شىمكەنت نەمەسە قىزىلوردا قالالارىنا جەتۋ ءۇشىن 2,5 تاۋلىك ۋاقىت كەرەك. ولار الدىمەن استانا قالاسىنا جەتىپ الادى. ودان “پاۆلودار–سارىاعاش”, “كوكشەتاۋ-قىزىلوردا”, “استانا-سارىاعاش” پويىزدارىنىڭ جۇرەتىن ۋاقىتىنا دەيىن سارعايىپ كۇتەدى. جولاۋشىنىڭ التىن ۋاقىتى اۋىسىپ مىنگەن پويىزدى كۇتۋمەن كەتەدى.
– ەل بولعان سوڭ وڭتۇستىك وبلىستاردا بىرەۋدىڭ باۋىرى, بالاسى, بىرەۋدىڭ قۇدا-جەكجاتى بار. جاقسىلىق-جاماندىقتا ارالاسپاي, بارىس-كەلىس جاساماي تۇرمايمىز. سوندا جولدىڭ ۇزاقتىعىنىڭ ۇستىنە پويىزعا اۋىسىپ ءمىنۋ, كۇتۋ سياقتى جول قيىندىقتارى شارشاتادى,–دەيدى قوستاناي قالاسىنىڭ تۇرعىنى بەكقۇل سادىقوۆ.
ەلىمىزدىڭ وڭتۇستىگىندەگى وبلىستاردان قوستاناي قالاسى مەن وبلىس اۋداندارىندا وڭتۇستىكتەن كەلىپ جۇمىسقا ورنالاسىپ نەمەسە ورتا جانە شاعىن بيزنەسپەن اينالىسىپ, بالا-شاعاسىن اسىراپ جۇرگەن ازاماتتار از ەمەس. ونىڭ سىرتىندا وزبەكستاننان وبلىسقا قونىس اۋدارعان ورالمانداردىڭ دا تۋىپ-ءوسكەن جەرىندە اعايىندارى قالعان. وڭتۇستىك وبلىستارعا تىكەلەي پويىزدىڭ جوقتىعى جول قيىندىعىن ەسەلەپ جىبەرەدى.
– وڭتۇستىك قازاقستان وبلىسىنداعى اۋىلىما ۋاقىتىندا جەتىپ بارا الماعاندىقتان, انام قايتقاندا ءبىر ۋىس توپىراق تا سالا المادىم, – دەيدى تاعى ءبىر قوستانايلىق ازامات. – پويىزعا قوستانايدان وتىرىپ, شىمكەنتتەن تۇسكەنىمدە اۋدانعا دا تەزىرەك جەتەر ەدىم. ەكى پويىزعا اۋىسىپ ءمىنىپ جۇرگەنىمدە ۋاقىتتىڭ ءبارى ءوتىپ كەتتى.
مىنە, وسىنداي اڭگىمەنى قوستانايدا ءجيى ەستۋگە بولادى. تۇرعىنداردىڭ وتىنىشىنەن كەيىن 2007 جىلى قوستاناي-سارىاعاش باعىتىنداعى جولاۋشىلار پويىزى جۇرەتىندىگى تۋرالى جەرگىلىكتى گازەتتەردە حابارلاندىرىلعان بولاتىن. بىراق جۇرتتىڭ قۋانىشى كوپكە ۇزاعان جوق, وسى ۋادەنىڭ سوڭى سيىرقۇيىمشاقتانىپ, تەك قاڭقۋ ءسوز سياقتى بولدى دا قالدى. جاقىندا وبلىستاعى وڭتۇستىكتىك ءۇش مىڭ ازاماتتىڭ اتىنان پرەمەر-مينيستر كارىم ماسىموۆكە جولدانعان ءوتىنىشكە “قازاقستان تەمىر جولى” ۇك” اكتسيونەرلىك قوعامىنان جاۋاپ كەلگەن بولاتىن. وندا تىركەمە جانە جولدا توقتاماي, تىكەلەي قاتىنايتىن ۆاگوندار الەۋمەتتىك باعىتتار قاتارىنا كىرمەگەندىكتەن, ولارعا رەسپۋبليكالىق بيۋدجەتتەن سۋبسيديا بولىنبەيتىندىگى ايتىلعان. سونداي-اق وندا “جولاۋشىلار تاسىمالى” اق-تىڭ قوستاناي-سارىاعاش باعىتى بويىنشا تىكەلەي قاتىنايتىن ۆاگوندار تاعايىنداۋعا مۇمكىندىگى جوق ەكەنى ايتىلعان, ويتكەنى بۇل كاسىپورىن ءۇشىن شىعىندى ءىس بولىپ تابىلادى.
– قوستانايدان وڭتۇستىك جاققا قاراي ءبىر-ەكى ۆاگون تىركەۋ سونداي ءبىر شەشىمى تابىلمايتىن, مۇمكىندىگى جوق ماسەلە ەمەس سەكىلدى. مىسالى, قوستانايدان جۇرەتىن “قاراعاندى-قوستاناي” پويىزى استاناعا تاڭعى 4 ساعات 40 مينوتتە كەلەدى. ال استانا-سارىاعاش پويىزى ساعات 6-دا جۇرەدى. قوستانايدان كەلگەن پويىزدىڭ ۆاگونىن وسىعان تىركەي سالۋ قانشالىقتى قيىن شارۋا ەمەس, –دەيدى قوستانايلىق بەكقۇل سادىقوۆ.
“جولاۋشىلار تاسىمالى” اق باسشىلىعى جاۋابىندا “جولاۋشىلار پويىزدارىنىڭ قۇرامىنا قوستاناي-قاراعاندى, قوستاناي-الماتى جانە كوكشەتاۋ-قىزىلوردا باعىتتارى بويىنشا ۆاگوندار جولاۋشىلار اعىنى كوبەيگەن جاعدايدا پاركتەگى مۇمكىندىككە قاراي ەسكەرىلەتىندىگىن ايتقان. ول مۇمكىندىكتىڭ قاشان بولارىن كىم ءبىلسىن, ال قوستانايلىقتار وڭتۇستىك وڭىرگە قاراي جولعا شىققان سايىن ساعىنىپ بارىپ, سارىلىپ قايتادى.
ءنازيرا جارىمبەتوۆا,قوستاناي وبلىسى.