دوستاستىق ەلدەرى مۇعالىمدەرىنىڭ ەلوردادا وتەتىن قۇرىلتايى مەنىڭ وي-ساناما سەرپىن بەرىپ وتىر. سەبەبى, تورتكۇل دۇنيەدەگى مەملەكەتتەردىڭ ىشىندە ادامداردىڭ اراسىنداعى بىرلىكتى تەك ءبىزدىڭ پرەزيدەنت نۇرسۇلتان نازارباەۆتىڭ عانا اۋزىنان ەستۋگە بولادى. ول ادامداردار اراسىنداعى دوستىقتى ايتىپ قويماي, سونىمەن بىرگە, سول دوستىقتىڭ اياسىندا ءار مەملەكەت ءوز مۇددەسىن ساقتاي وتىرىپ, ورتاق ءىستى كەڭەسىپ ىستەۋدى تاپسىرىپ كەلەدى. تمد مۇعالىمدەرىنىڭ مىنا سەزى وسى سوزىمە دالەل بولا الادى.
شىنى كەرەك, مەن كسرو زامانىندا بارلىق وداقتاس رەسپۋبليكالاردىڭ ۇستازدارىمەن تىعىز قارىم-قاتىناستا بولىپ, تاجىريبە الماسىپ جۇرەتىن ەدىم. كەيىن بۇل پىشاق كەسكەندەي تىيىلىپ قالعان بولاتىن. جالپى, ءبىلىم سالاسىنىڭ جاقسى ناتيجەلەرى شەكارا تاڭدامايدى. ۇلتتىق ۇلگىگە بەيىمدەپ, قولدانا بىلسەك, ودان كەلەر پايدا ءولشەۋسىز. مەن قازاق ءتىلى مەن ادەبيەتىن وقىتقاندا الەم ادەبيەتىنەن دە وقۋشىلاردى حاباردار ەتىپ وتىرامىن. الەمدىك ءبىلىم كەڭىستىگىنە شىقپاي, ءبىلىم سالاسىن بيىك دارەجەگە كوتەرۋ استە مۇمكىن ەمەس. قازىر قاراپ وتىرساڭ, ساباق بەرۋ تاسىلىنە وركەنيەتتى ەلدەردىڭ ءۇردىسى ەنگەنىن اڭعاراسىڭ.
ۇرپاق تاربيەسى وتباسىنان باستالادى دەيمىز. ال ءبىلىم وقۋشىعا بەرىلەتىن ساباقتىڭ نەگىزىندە جاتىر. تاربيە دە سولاي. ساباق جاقسى ءجۇرمەگەن جەردە ءبىلىم بولمايدى. كەيدە ءبىز وقۋشىلاردىڭ بىلىمسىزدىگىن وزىمىزدەن كورمەي, سولارعا يتەرە سالاتىنىمىز بار. بۇل دۇرىس ەمەس. تالانتسىز ۇرپاق جوق. تەك ۇل مەن قىزدىڭ بويىنداعى سول تالانتتى ءدال تاۋىپ باۋلىساق, باعى اشىلادى. جۇرەر جولى كەڭەيەدى.
تاعى ءبىر ايتايىن دەگەنىم, ءبىز قازىر تاۋەلسىز مەملەكەتپىز. ءبىر زاماندارى وزگەدەن ۇيرەنۋدى ادەتكە اينالدىرعانبىز. ەندى سۇلتانماحمۇت تورايعىروۆ ايتپاقشى, “بىزدەردە مىنانداي بار, مىنانداي بار” دەيتىن كەزەڭ كەلدى. وزگەدەن ۇيرەنە وتىرىپ, وزىمىزدەگى باردى كورسەتە ءبىلۋىمىز كەرەك. بىزدەن دە ءۇيرەنسىن. بارىمىزدى كورسىن, ىرگەلى ۇلت ەكەنىمىزدى تانىسىن. مەن بۇعان دا ءبىر مىسال كەلتىرسەم دەيمىن. ءوزىمىز ءار ءىسىن ۇكىلەپ جۇرگەن اقش-تا بولعانىمدا, ولار قازاق ەلىنىڭ ءبىلىم بەرۋ ادىسىنە, ادىستەمەسىنە قىزىعۋشىلىق تانىتىپ, مەكتەپتەرىنەن مۇعالىمدەر جيناپ, بىرنەشە كۇن ءدارىس وقىتتى. اسىرەسە, ۇلتتىق تاربيەدەگى ءبىزدىڭ حالىقتىق پەداگوگيكامىزعا ەرەكشە ىقىلاسپەن قارادى.
جالپى, تمد مەملەكەتتەرىنىڭ ءبىلىم قىزمەتكەرلەرى مەن مۇعالىمدەرىنە ارنالعان بۇل قۇرىلتاي ءبىر-ەكى كۇندىك جيىن عانا ەمەس, بولاشاقتا ەلدەر اراسىنداعى قارىم-قاتىناستى دامىتىپ, وقىتۋداعى ۇزدىك ءتاجىريبەلەردى ءار ەلدىڭ ۇلتتىق مەنتاليتەتىنە قاراي جەتىلدىرىپ وتىرۋدى جۇزەگە اسىراتىن, وزگە جۇرتتاردا دا مۇنداي قۇرىلتايدى وتكىزۋدى قولعا الىپ, ءسويتىپ بۇرىن بار ءداستۇردى جالعاستىرساق قۇبا-قۇپ بولار ەدى.
قانيپا بىتىباەۆا, قازاقستاننىڭ ەڭبەك سىڭىرگەن مۇعالىمى, كسرو مەملەكەتتىك سىيلىعىنىڭ لاۋرەاتى.
شىعىس قازاقستان وبلىسى.