قاي وڭىردە بولماسىن ارتىنا ءىز قالدىرعان ازاماتتار بارشىلىق. ەلىنە ەڭبەگىمەن ەلەنگەن, ۇلاعاتىمەن ۇرپاقتارىنىڭ ىستىق ىقىلاسىنا بولەنگەن مۇنداي ازاماتتاردىڭ ومىردەن وتكەنمەن, كوڭىلدەن كەتپەيتىنى دە سوندىقتان. جاقىندا اقشي اۋىلىنداعى م.تولەگەنوۆ اتىنداعى ورتا مەكتەپتە بۇرىنعىلاردان گورى وزگەشە ءبىر شارا ۇيىمداستىرىلدى.
وسى ءبىلىم ۇياسىندا قازاق كسر حالىق اعارتۋ ءىسىنىڭ وزىق قىزمەتكەرى سەيىتقالي قوجابەكوۆتى ەسكە الۋعا ارنالعان گەوگرافيا پانىنەن 5-11 سىنىپ وقۋشىلارى اراسىندا مەكتەپىشىلىك وليمپيادا وتكىزىلدى. ونىڭ وزگەشەلىگى سول – بۇل وڭىردە ءبىلىم شۋاعىن شاشقان ۇستازدىڭ ۇلاعاتىن كەيىنگى ۇرپاق جادىندا جاڭعىرتۋ ارقىلى جاستاردىڭ ءبىلىم-عىلىمعا دەگەن ىنتاسىن ارتتىرۋعا باعىتتالعانى. وليمپيادانىڭ سالتاناتتى اشىلۋىندا ۇلاعاتتى ۇستاز تۋرالى ەستەلىكتەر ايتىلدى, «ونەگەلى جاننىڭ ءومىر جولى» دەگەن شاعىن بەينەبايان كورسەتىلدى, «ۇستاز تاعىلىمى» اتتى كورمە ۇيىمداستىرىلدى. وقۋشىلار بۇل شارالاردان سەيىتقالي قوجابەكوۆتىڭ ەڭبەك جولىن №5 سۋلىقوپا اۋىلدىق كەڭەسىندە حاتشى بولىپ باستاعانىن, تىمابۇلاق ورتالاۋ مەكتەبىندە وقىتۋشى بولعانىن, ءبىر عانا قىزىل پارتيزان ورتالاۋ مەكتەبىندە وتىز جىلداي ۇستازدىق ەتكەنىن, اقتوبە پەداگوگيكالىق ۋچيليششەسىن, ن.بايعانين اتىنداعى اقتوبە وقىتۋشىلار ينستيتۋتىن تامامداعانىن جانە ۇلى وتان سوعىسىنىڭ ارداگەرى ەكەنىن ءبىلدى.
پاندىك وليمپياداعا 36 وقۋشى قاتىستى. وليمپيادا جەڭىمپازدارى مەن جۇلدەگەرلەرى اتانعان ون سەگىز وقۋشى ءبىرىنشى, ەكىنشى جانە ءۇشىنشى دارەجەلى ديپلومدارمەن جانە س.قوجابەكوۆتىڭ قىزى دانيا مەكتەپباەۆا باستاعان ۇرپاقتارى دايىنداعان باعالى سىيلىقتارمەن ماراپاتتالدى. ۇرپاقتارى مەكتەپكە دە سىي-سياپات جاسادى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى,
ىرعىز اۋدانى.