مەملەكەت باسشىسى نۇرسۇلتان نازارباەۆ ەقىۇ-نىڭ ءىس باسىنداعى توراعاسىنىڭ ارناۋلى وكىلى جانىبەك كارىبجانوۆتى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
ج.كارىبجانوۆ پرەزيدەنتكە ءوزىنىڭ قىرعىزستانعا ساپارىنىڭ قورىتىندىسى تۋرالى باياندادى. ەقىۇ-نىڭ ميسسياسى ورىن العان قاقتىعىستاردىڭ ودان ءارى وربۋىنە جول بەرمەۋ, تۇراقتىلىقتى قامتاماسىز ەتۋ جانە وسى ەلدەگى ساياسي جاعدايدىڭ ۋشىعۋى جاعدايىندا ادام قۇقىقتارىن ساقتاۋ بولدى.
– قىرعىزستاننىڭ ۋاقىتشا ۇكىمەتى كونستيتۋتسيا نەگىزىندە جۇمىس ىستەپ, قولدانىستاعى زاڭداردى ساقتاپ, ەلدىڭ الەۋمەتتىك-ەكونوميكالىق جاعدايىن جاقسارتۋدى قامتاماسىز ەتۋى قاجەت. سونىڭ نەگىزىندە حالىقتىڭ ءومىر ءسۇرۋ دەڭگەيىن كوتەرۋ قامتاماسىز ەتىلەدى, – دەدى ج.كارىبجانوۆ.
* * *
مەملەكەت باسشىسى نۇرسۇلتان نازارباەۆ قازاقستان رەسپۋبليكاسىنىڭ باس پروكۋرورى قايرات ءماميدى قابىلدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
ق.ءمامي پرەزيدەنتكە ەلىمىزدەگى زاڭدىلىقتىڭ جاي-كۇيى جانە ۆەدومستۆونىڭ اعىمداعى جىلعى ءۇش ايداعى جۇمىس قورىتىندىلارى تۋرالى باياندادى. ەسەپتى كەزەڭ ىشىندە قىلمىس 10 پايىزعا وسكەن. مۇنداي جاعداي جاسالعان قىلمىستاردىڭ سانىنىڭ ءوسۋىنىڭ ەسەبىنەن ەمەس, ەسەپكە الۋ-تىركەۋ ءتارتىبىن قاتايتقاننان سوڭ ورىن الىپ وتىر. سونىڭ ءبىر ايعاعى, اۋىر جانە ورتاشا دارەجەدەگى قىلمىستار دەڭگەيى تومەندەگەنى بايقالۋدا.
اڭگىمەلەسۋ بارىسىندا سونداي-اق ەلىمىزدەگى سۋ قويمالارىنىڭ قازىرگى جاعدايىنا تەكسەرىس جۇرگىزۋ تۋرالى ءسوز بولدى.
بۇگىنگى كۇنى, پرەزيدەنتتىڭ تاپسىرماسى بويىنشا, پروكۋراتۋرا تاراپىنان وزگە ۋاكىلەتتى ورگاندارمەن بىرلەسىپ, ەلىمىزدەگى بارلىق سۋ قويمالارىنا قاتاڭ باقىلاۋ قولعا الىنىپ, تەكسەرىس جۇرگىزىلدى, – دەدى ق.ءمامي.