ورداباسىدا وڭ وزگەرىستەر كوپ
ەلباسىنىڭ حالىققا ارناعان ءاربىر جولداۋى ەلدىڭ تۇرمىستىق جاعدايىن كوتەرىپ, تىرشىلىگىنە دەم بەرىپ جاتقانى انىق. سول ەلدىڭ ىشىندە ءبىزدىڭ ورداباسى اۋدانىنىڭ تۇرعىندارى دا الەۋمەتتىك جاعدايىن تۇزەپ, بولاشاعىنا نىق سەنىممەن كوز تاستايدى. شىن مانىندە «قازاقستان-2050» ستراتەگياسى ەلدىڭ باعى مەن جولىن اشاتىن, قۇشاعى قۇت-بەرەكەگە تولى قۇجات ەكەنىن ەل سەزىنە باستادى.
ورداباسىدا وڭ وزگەرىستەر كوپ
ەلباسىنىڭ حالىققا ارناعان ءاربىر جولداۋى ەلدىڭ تۇرمىستىق جاعدايىن كوتەرىپ, تىرشىلىگىنە دەم بەرىپ جاتقانى انىق. سول ەلدىڭ ىشىندە ءبىزدىڭ ورداباسى اۋدانىنىڭ تۇرعىندارى دا الەۋمەتتىك جاعدايىن تۇزەپ, بولاشاعىنا نىق سەنىممەن كوز تاستايدى. شىن مانىندە «قازاقستان-2050» ستراتەگياسى ەلدىڭ باعى مەن جولىن اشاتىن, قۇشاعى قۇت-بەرەكەگە تولى قۇجات ەكەنىن ەل سەزىنە باستادى.
ءبىزدىڭ ورداباسى اۋداندىق ورتالىق اۋرۋحاناسىنىڭ عيماراتى سوناۋ 1964 جىلى سالىنعان ەكەن. ۇلكەن كۇرە جولدىڭ بويىندا جاپىرايىپ, ىرگەتاسى جەرگە كىرىپ كەتە جازداپ تۇرعان وسىناۋ عيماراتتى ءبىر اۋداننىڭ باس اۋرۋحاناسى دەپ ايتۋعا ۇيالعانىمىزدى دا جاسىرۋعا بولماس. ەلباسىمىز ن.نازارباەۆ جىل سايىنعى حالىققا ارناعان جولداۋىندا دەنساۋلىق ساقتاۋ سالاسىنا, اسىرەسە, اۋىلدىق جەرلەردەگى ەمدەۋ مەكەمەلەرىنىڭ ماتەريالدىق بازاسىن جاقسارتۋعا ايرىقشا نازار اۋدارىپ كەلە جاتقانىن باسا ايتۋىمىز كەرەك. مىنە, سونىڭ ارقاسىندا اۋدان ورتالىعىنان جاڭا اۋرۋحانا عيماراتى سالىنىپ, ونىڭ تۇساۋىن تەلەكوپىر ارقىلى نۇرسۇلتان ءابىش ۇلىنىڭ ءوزى كەسكەن بولاتىن. اۋماعى 5,3 گەكتاردى الىپ جاتقان وسىناۋ 250 توسەكتىك اۋرۋحانادا بۇگىندە 400-گە جۋىق ادام جۇمىس ىستەيدى.
اۋرۋحانا قازىرگى زاماناۋي مەديتسينالىق قۇرال-جابدىقتارمەن قامتاماسىز ەتىلگەن. ماماندار جاڭا ۇلگىدەگى اپپاراتتاردى تولىق مەڭگەرگەن. مامان دەمەكشى, قازىر اۋىلعا ديپلوممەن كەلىپ جاتقان جاس ماماندار كوپ. ارنايى باعدارلاما بويىنشا اۋىلعا كەلگەن 29 جاس مامانعا ءبىر جولعى جاردەماقى بەرىلىپ, ءۇي قۇرىلىسىنا جانە كوممۋنالدىق قىزمەتتەرىنە ارنايى قارجى قاراستىرىلدى. اۋىلداعى مەديتسينا قىزمەتىنىڭ جاقسارعانىنان بولار, سوڭعى ون ايدا اۋداندا ەشقانداي انا ءولىمى ورىن العان جوق.
ءيا, شىنىندا, ەڭ باستىسى, ەل امان بولسىن. ەلدىڭ ساۋلىعى, تىنىشتىعى, باقۋاتتى تىرشىلىگىنەن ارتىق نە بار؟ مىنە, ءبىزدىڭ ورداباسىلىقتار ءۇشىن «قازاقستان-2050» ستراتەگياسى وسىنداي قۋانىش, جاقسىلىق, يگى ىستەر اكەلىپ وتىر.
بولات ساعىمبەكوۆ,
ورداباسى اۋداندىق ورتالىق اۋرۋحاناسىنىڭ باس دارىگەرى.
وڭتۇستىك قازاقستان وبلىسى,
ورداباسى اۋدانى.
ۇرپاق تاربيەسى – ۇلت بولاشاعى
ەلباسىنىڭ جىل سايىنعى جولداۋلارى بىزگە نەگە قول جەتكىزدىك دەپ ءجۇرىپ وتكەن جولىمىزعا ساراپتاما جاساپ, الدا نە تۇر, نە ىستەۋىمىز كەرەك دەگەن ساۋالعا جاۋاپ تابۋىمىزعا كومەكتەسەدى. شەكسىز ۋاقىت كەڭىستىگىندە اعىپ وتكەن جىلدار جەتەگىندە بار-جوقتى تۇگەندەپ, الدى-ارتتى بەكەمدەپ الماسا, كوپ نارسەدەن ۇتىلۋىمىز, كوپ جاڭالىقتان كەش قالۋىمىز مۇمكىن. دەر كەزىندە قامدانىپ, ۋاقىت اعىمىنا ساي قيمىلداۋدان ۇتارىمىز كوپ. قازاقستاندىقتاردىڭ مەملەكەت باسشىسىنىڭ جولداۋلارىن اسىعا كۇتۋىن ەلىمىزدىڭ بۇگىنگى جەتكەن بيىگى مەن كەلەشەككە بارار جولى, ول جولدا جۇكتەلەر مىندەتتەر مەن تاپسىرمالاردى بىلۋگە ىنتىقتىق دەپ بىلەمىن.
قازاقستاننىڭ 2050 جىلعا قاراي الدىڭعى قاتارلى دامىعان 30 ەلدىڭ قاتارىنا ەنۋى ءۇشىن قاجەتتى مەجەلەردى بەلگىلەپ بەرگەن سوڭعى ستراتەگيالىق جولداۋدىڭ جاريا ەتىلگەنىنە دە جىل تولىپ قالىپتى. جولداۋدىڭ 4-ءشى بولىمىندە ايتىلعان قازاقستاندىقتاردىڭ الەۋەتتى تۇرمىسى, مىقتى دەنساۋلىق, تەرەڭ ءبىلىم بەرۋ ءىسى نىقتاپ قولعا الىندى. ءبىلىم بەرۋ سالاسىندا كاسىپتىك ءبىلىم بەرۋدى جەتىلدىرۋ, وقۋشىلاردىڭ كوپ ءتىل بىلۋىنە جاعداي جاساۋ قازىر ەلىمىز بويىنشا قولداۋعا يە جانە وسى باعىتتاردا ۇلكەن قوزعالىس بار. جاڭا زامانعا ساي جاڭاشا ءبىلىم بەرۋ كۇن تارتىبىنە قويىلعان كەزەڭدە ءبىزدىڭ «ورلەۋ» بىلىكتىلىكتى ارتتىرۋ ينستيتۋتى دا وزىندىك باعىت-باعدارىن تاۋىپ, بولاشاق قازاقستاننىڭ ءبىلىمدى ازاماتتارىن دايىنداۋعا ءوز ۇلەسىن قوسۋدا. نازارباەۆ زياتكەرلىك مەكتەپتەرى جانە پەداگوگيكالىق شەبەرلىك ورتالىعىمەن بىرگە وقىتۋدىڭ كەمبريدجدىك ءىس-ءتاجىريبەسىن قازاقستاندىق جۇيەمەن ساباقتاستىرا وتىرىپ وقىتۋ ءۇشىن مۇعالىمدەردى دايىنداۋ جولىندا جۇمىس اتقارىپ كەلەمىز. «ورلەۋگە» جۇكتەلگەن دەڭگەيلىك كۋرستاردان قازىر ماڭعىستاۋ وبلىسى بويىنشا جۇزدەگەن مۇعالىمدەر بىلىمدەرىن كوتەرىپ, ءىس-تاجىريبە جەتىلدىرىپ شىقتى.
جولداۋدا ايتىلعان ناشاقورلىققا قارسى كۇرەس – مۇعالىمدەر قىزمەتىنىڭ ءبىر تارماعى. الدىندا وتىرعان وقۋشىنىڭ ءبىلىمدى عانا ەمەس, اقىل-ەسى دۇرىس, وتانسۇيگىش, دەنى ساۋ ازامات بولىپ جەتىلۋى مۇعالىم ءۇشىن مىندەت. سوندىقتان, جولداۋدا ايتىلعان تاپسىرمالاردى باسشىلىققا الا وتىرىپ, ءوز جۇمىسىمىزدى جۇيەلى جۇرگىزە بەرەتىن بولامىز. ءاربىر سالا وزىنە جۇكتەلگەن مىندەتتى ويداعىداي ورىنداسا, ءبىز جارقىن بولاشاققا بىرگە جەتەمىز دەپ ويلايمىن.
ىرىسكۇل نۇر,
«ورلەۋ» بىلىكتىلىكتى ارتتىرۋ ۇلتتىق ورتالىعىنىڭ اعا وقىتۋشىسى.
ماڭعىستاۋ وبلىسى.
اۋىلدا قالاداعىداي جاعداي
ەلىمىزدىڭ ىلگەرىلەۋگە باعىت ۇستاعان ارشىندى قادامىن قاي سالادان دا بايقاۋعا بولادى. اۋىلدىڭ بولاشاعى جوق دەپ شاھارلى جەرلەرگە ۇدەرە كوشۋ توقتاعالى قاشان. كەرىسىنشە, اۋىلعا قايتا ورالۋدىڭ نىشانى بايقالادى. بۇل, شىنى كەرەك, ەلباسى ن.نازارباەۆتىڭ سارابدال دا ساليقالى ساياساتىنىڭ ارقاسىندا مۇمكىن بولىپ وتىرعانىن جالپى حالىق بىلەدى. ومىرلەرىندەگى جانە تۇرمىستارىنداعى وڭ وزگەرىستەردى مەملەكەت باسشىسىنىڭ ساياساتىمەن ساباقتاستىراتىنى دا سوندىقتان. «قازاقستان-2050» ستراتەگياسى بۇل باعىتتىڭ الدا دا جالعاساتىنىن, سونداي-اق, وسى كەزەڭدە قارقىندى دامۋدىڭ جولدارى ايقىندالعانىن دالەلدەپ بەردى. پرەزيدەنت ستراتەگيادا مەملەكەتتىك-جەكەمەنشىك ارىپتەستىگى پرينتسيپىنە نەگىزدەلگەن سەنىمدى ديالوگ قۇرۋ ءۇشىن بيزنەستى توپتاستىرۋدى جالعاستىرۋ كەرەكتىگىن العا تارتقان. بۇل تاپسىرمانىڭ ورىندالۋىنا بەلگىلەنگەن ۋاقىتتى كۇتپەي-اق, قازىردىڭ وزىندە قول جەتكىزە باستادىق. اۋىل بالالارىنىڭ يگىلىگى ءۇشىن 400 ميلليون تەڭگەدەن استام قارجىعا جاڭا بالاباقشا سالىپ, ونى مەملەكەت مەنشىگىنە تەگىن تاپسىرۋ ءوزىنىڭ تۋعان توپىراعى الدىنداعى ازاماتتىق پارىزى دەپ سانايتىن بەلگىلى كاسىپكەر يسلامبەك سالجانوۆ ونەگەسى كوپكە ۇلگىلى ءىس بولدى.
ەلباسى نۇرسۇلتان ءابىش ۇلى نازارباەۆتىڭ «قازاقستان-2050» ستراتەگياسىندا بەلگىلەنگەن بولاشاققا باعىتتالعان جاسامپاز تاپسىرمالارىنا وراي, قوبدا اۋىلىندا «كوركەيە بەر, تۋعان جەر!» اكتسياسى اياسىندا سالىنعان 150 ورىندىق «نۇرلى بولاشاق» بالاباقشاسى 2 قاباتتى عيماراتتا ورنالاسقان, جالپى كولەمى 6884 شارشى مەتر. وسىنىڭ ارقاسىندا اۋىلدا مەكتەپكە دەيىنگى مەكەمەلەرگە دەگەن سۇرانىس تولىعىمەن جابىلدى. بۇل دا بولسا جەرگىلىكتى تۇرعىنداردىڭ مەرەيىن ۇستەم ەتتى.
ەلباسى ن.نازارباەۆ «بار جاقسىلىق – بالالارعا» ۇرانى بارلىق اتا-انا ءۇشىن قاعيداعا اينالۋى ءتيىس» دەگەن بولاتىن «2050» ستراتەگياسىندا. مىنە, زاماناۋي قۇرال-جابدىقتارمەن جاراقتاندىرىلعان بىرەگەي بالاباقشانى اۋىلدىق جەردەن كورەمىز دەگەن ارمان ەدى عوي؟ پرەزيدەنتتىڭ تاپسىرماسىنا سايكەس اۋىلعا قول سوزعان كاسىپكەر يسلامبەك سالجانوۆقا قوبدالىقتاردىڭ ريزاشىلىعى زور.
ەلباسىنىڭ ستراتەگيادا اتاپ كورسەتكەنىندەي «سونداي-اق, بالالارعا, جالپى جەتكىنشەك ۇرپاقتىڭ فۋنكتسيونالدى ساۋاتتىلىعىنا زور كوڭىل ءبولۋ قاجەت» دەگەن قاعيداسى دا وسكەلەڭ ۇرپاقتىڭ ەرتەڭىن ويلاعاندىق بولاتىن. مۇنىڭ دا قولجەتىمدىلىگى ايقىن كورىنىپ وتىر. بالاباقشانىڭ ماتەريالدىق-تەحنيكالىق بازاسى بالالاردىڭ جاسىنا ساي دامۋىنىڭ ەرەكشەلىگىن ەسكەرە وتىرىپ, ارنايى جابدىقتالعان.
مەكتەپكە دەيىنگى مەكەمەدە بالالاردىڭ رۋحاني-پاتريوتتىق ءبىلىم الىپ, تاربيەلەنۋى «دانالىق ءالىپپەسى» اتتى جوبا ارقىلى ىسكە اسۋدا. بۇل ءونىم «ينتەراكتيۆ قازاقستان» كومپانياسىنىڭ بازاسىندا جاپوننىڭ جاڭا تەحنولوگياسى بويىنشا جاسالعان. ءبىلىم جانە عىلىم مينيسترلىگى ساراپتاماسىنان وتكەن. سونىمەن قاتار, مەكتەپكە دەيىنگى تاربيە مەن وقىتۋدىڭ مەملەكەتتىك جالپىعا مىندەتتى ستاندارتى بويىنشا ءتالىم وشاعىندا ءبىلىم بەرۋ 5 نەگىزگى سالا بويىنشا ۇيىمداستىرىلادى.
بۇگىنگى كۇنى بالاباقشادا 17 پەداگوگ جۇمىس ىستەيدى. پەداگوگتار اداپتيپتىك باعدارلامالار نەگىزىندە جۇمىس جۇرگىزۋدە, سونىمەن قاتار, «شىعارماشىلىق توپ», «جاس تاربيەشىلەر», «انا مەن بالا», «شاحمات پاتشالىعى», «قۇقىق ءبىلگىشتەر» كلۋبتارى بار. ءار اپتانىڭ بەيسەنبىسى كۇندەرى «ەرتەگى اەروبيكاسى», «شاحمات پاتشالىعى», «تەاتر الەمى», «E-BLOCKS-پەن ساياحات» ۇيىرمەلەرى جۇرگىزىلەدى. بالالاردى سالاماتتى ءومىر سالتىنا تارتۋ ماقساتىندا ءداستۇرلى ەمەس جۇمىس تۇرلەرى ەنگىزىلگەن, كۇندەلىكتى ەرتەڭگىلىك جاتتىعۋ اەروبيكا, قارا جورعا بي ەلەمەنتتەرىمەن وتكىزىلەدى.
ستراتەگيادا ءۇش تۇعىرلى ءتىل تۋرالى ماسەلە كوتەرىلگەنى بەلگىلى. مىنە, ءبىزدىڭ جاڭا بالاباقشادا تاربيەلەنۋشىلەر قازاق, ورىس جانە اعىلشىن تىلدەرىن ۇيرەنەدى. «قازاقستان-2050» ستراتەگياسىندا اۋقىمدى مىندەتتەر العا قويىلعانى راس. الايدا, ولاردىڭ بارلىعىن دا ورىنداۋعا ەلىمىزدىڭ مۇمكىندىگى جەتەدى. مۇنى جىل وتكەن سايىن وركەندى وزگەرىستەرگە تولى ءوز ومىرىمىزدەن دە اڭعارىپ وتىرمىز.
رايگۇل ەنشىباي,
«نۇرلى بولاشاق» بالاباقشاسىنىڭ ادىسكەرى.
اقتوبە وبلىسى,
قوبدا اۋدانى.
وتباسىمىزبەن ۇلەس قوسىپ ءجۇرمىز
قازاقتىڭ جەرى تابيعي بايلىقتان كەندە ەمەس. الايدا, الەمدىك رىنوكتا التىنمەن پارا-پار مۇناي مەن گازدىڭ قادىرىن ەلىمىز تاۋەلسىزدىك العانعا دەيىن سەزىنە المادىق. تۇڭعيىقتا تۇنعان ەن بايلىعىمىزدىڭ يگىلىگىن كورۋ ءوڭىمىز تۇگىلى تۇسىمىزگە دە كىرگەن ەمەس. مول بايلىقتى يگەرۋگە بىلەك سىبانا كىرىسكەن مۇنايشىلارىمىز جازدىڭ مي قايناتار اپتابى مەن قىستىڭ قاقاعان ايازىندا دامىلسىز جۇمىس جاساسا دا, ەڭبەگىنىڭ راحاتىن كورە الماپ ەدى. مۇنايشىلار تەمىر ۆاگونداردا تۇراتىن, كۇندەلىكتى تاماقتى دا سونداي ۆاگونداردا ىشەتىن. ارناۋلى كولىكتەر بۇگىنگىدەي ءجيى جاڭارمايتىن. بۇعان سوناۋ 1979 جىلى اقمولا قۇرىلىس ينستيتۋتىن كولىك ينجەنەرى ماماندىعى بويىنشا ءبىتىرىپ, مۇنايلى وڭىردە العاشقى ەڭبەك جولىمدى باستاعان ساتىمدە تالاي كۋا بولعان ەدىم. تاۋبە دەيىك, دەربەس ەل بولعالى بەرى, اسىرەسە, وتاندىق مۇنايشىلاردىڭ كوڭىلى ءبىر سەرپىلدى.
بۇرىنعى ۆاگون ۇيشىك ورنىندا, جانعا جايلى ۆاحتالىق قالاشىقتار بوي كوتەردى. مۇناي ءوندىرۋ تەحنولوگياسى جاڭاردى. كوڭىلگە قونىمدى جالاقى تولەنەتىن بولدى. ءوز ەلىمىزدە ءوز مۇنايشىلارىمىزدىڭ قاجىرلى ەڭبەگىمەن وندىرىلگەن مۇناي مەن گازدىڭ يگىلىگىن بارشا جۇرت كورە باستادى. بۇعان تاۋەلسىز قازاقستاننىڭ تۇڭعىش پرەزيدەنتى نۇرسۇلتان نازارباەۆ ۇستانعان «قازاقستان-2030» ستراتەگياسىنداعى باسىم باعىتتار وڭ ىقپال ەتكەنى داۋسىز. جاھانداعى دامىعان 50 ەلدىڭ قاتارىندا لايىقتى ورىن الۋ ماقساتىن كوزدەگەن قازاقستاننىڭ ەكونوميكاسى قارقىندى وركەندەدى. باسەكەگە قابىلەتتى ساپالى ونىمدەر ءوندىرىلىپ, زاۋىت-فابريكالار كوپتەپ اشىلدى. جاستارىمىز شەتەلدەردەگى ەڭ تاڭداۋلى وقۋ ورىندارىندا بىلىمدەرىن جەتىلدىرىپ, قازىر بىلىكتىلىگى جاعىنان شەتەل ماماندارىن الماستىراتىنداي دەڭگەيگە كوتەرىلدى.
الەم ەلدەرى ەكونوميكاسىنىڭ دامۋ, وركەندەۋ تاريحىنا كوز جىبەرسەك, بىردە-ءبىر مەملەكەت ءبىر بەلەسكە قول جەتكىزۋمەن شەكتەلگەن ەمەس. بەلەستەن بەلەسكە يەك ارتۋ ءۇشىن الدىنا ۇلكەن ماقساتتار قويعانىن بىلەمىز. ءتىپتى جەكەلەگەن كومپانيالاردىڭ وزىندە كوپجىلدىق ستراتەگيالىق ماقساتتار الدىن الا ايقىندالادى. مۇنى وتاندىق مۇناي كومپانياسىنداعى كوپجىلدىق تاجىريبەمنەن جاقسى بىلەمىن. وسى تۇرعىدان ايتقاندا, «قازاقستان-2050» ستراتەگياسىنداعى باستى باعىتتاردىڭ ءبىرى رەتىندە الەمدەگى ەڭ قۋاتتى 30 ەلدىڭ قاتارىنا قوسىلۋ ماقساتىنىڭ كوزدەلگەنى تاۋەلسىز قازاقستانىمىزدىڭ ەكونوميكاسىن بۇگىنگىدەن بيىك بەلەسكە كوتەرەدى. ارينە, بۇل ماقساتقا جەتۋ ءۇشىن ءار قازاقستاندىق ازامات وتانشىلدىق سەزىممەن ۇلەس قوسۋى ءتيىس.
ءار ازاماتتىڭ, اسىرەسە, جاستاردىڭ ءوز وتانىمىزدىڭ يگىلىگى ءۇشىن ەڭبەك ەتۋى وتباسىلىق تاربيەدەن باستاۋ الادى. ءوزىم مۇناي-گاز ونەركاسىبى سالاسىنداعى كاسىپورىندا 1979 جىلدان بەرى ۇزدىكسىز جۇمىس جاساپ كەلەمىن. زايىبىم جۇماعىز دا وسى سالانىڭ ەكونوميسى بولسا, وتباسىمىزداعى ەكى قىزىمىز دا قازىر ەڭبەككە ارالاستى. ۇلكەنىمىز دينارا «شەۆرونتەحساكو» كومپانياسىنىڭ اتىراۋدا پوليەتيلەن قۇبىرلارى زاۋىتىندا مەنەدجەرلىك جۇمىس اتقارادى. ال ەكىنشى قىزىمىز ميرا اتىراۋداعى كارديولوگيالىق ورتالىقتىڭ كارديولوگ-دارىگەرى بولىپ ابىرويلى ەڭبەك ەتىپ كەلەدى.
مىنە, ءبىزدىڭ وتباسىمىزداعى ءار سالانىڭ ماماندارى ەلىمىزدىڭ جاڭا ءداۋىر تالابىمەن وركەندەپ, جاھان جۇرتى قىزىعاتىنداي قۋاتتى مەملەكەتكە اينالۋىنا ۇلەسىمىزدى قوسۋدى كوزدەدىك.
مۇحتار ميزامعاليەۆ,
«ەمبىمۇنايگاز» اق كولىك
ءبولىمىنىڭ اعا ينجەنەرى.
اتىراۋ وبلىسى.
ناقتىلى ىستەردىڭ باعىت-باعدارى
ەلباسىنىڭ ءداستۇرلى جولداۋلارى بىزگە تىڭ سەرپىن بەرەتىنى انىق. بىلتىر تاۋەلسىزدىك مەيرامى الدىندا تاريحنامانى تەرەڭ بويلاپ, حالىقتىڭ كوكەيىندەگى كوپ ويدى ءدوپ باسىپ, قۇندىلىعى ارتىپ, جاقسى قابىلدانعان قازاقستان رەسپۋبليكاسى پرەزيدەنتى – ەلباسى نۇرسۇلتان نازارباەۆتىڭ قازاقستان حالقىنا جولداۋى, ناقتىلى ىستەردىڭ باعىت-باعدارى كەلەشەككە باعدارشام بولىپ وتىر.
جاڭا جولداۋدىڭ جاڭاشىلدىعى – مارەنىڭ الىستان كورىنەتىندىگىندە, ءمانىنىڭ تەرەڭ, مازمۇنىنىڭ بولەكتىگىندە. بۇل سونىسىمەن دە قۇندى. الىسقا تالپىنۋ, بيىكتەگىنى ارمانداۋ – ادام بالاسىنا ءتان قاسيەت قوي. قازاقستان پرەزيدەنتىنىڭ بۇل جولعى جولداۋى دا مەنى ماقسات-مۇددەسىنىڭ كەڭدىگىمەن, ويىنىڭ تەرەڭدىگىمەن, العا قويعان مىندەتتەرىنىڭ ايقىندىعىمەن, جوسپار-جوبالارىنىڭ ناقتىلىعىمەن, كەرەمەت وپتيميستىك سارىنىمەن ءسۇيسىندىردى. ءبىر سوزبەن ايتقاندا, جولداۋدىڭ بارلىق تارماعىنان گۋمانيزمنىڭ لەبى ەسەدى. بۇل – قۋانىشتى جاعداي.
تۇڭعىش پرەزيدەنتىمىزدىڭ باعدارلامالىق ءسوزىن وبلىستاعى ەتنومادەني بىرلەستىكتەردىڭ جەتەكشىلەرى بىرگە تىڭداعان ەدىك. «قازاقستان-2030» ستراتەگياسىنىڭ باسىم بولىگى جۇزەگە اسىرىلعانى ءمالىم. ەندى, مىنە, ودان دا ارعى اسۋلار مەن شىڭدارعا كوز تىگۋ – ءومىر زاڭدىلىعى. ەلباسىمىز, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ تاعى دا بىرلىكپەن جۇمىلۋ اۋاداي قاجەت ەكەندىگىن شەگەلەپ ايتتى. قاي سالا بولسىن بىرىگىپ, باسقوسىپ اتقارىلعان ءىس باياندى بولارى حاق.
ادام ساناسىنا تاعى دا ءبىر ءسىلكىنىس تۋدىرعان جولداۋ ەلدىڭ دامۋ باعىت-باعدارىن ايقىنداعان, ەلىمىزدىڭ 2050 جىلعا دەيىنگى بولاشاعىن ەڭ الدىمەن: باياندى بەيبىتشىلىكتىڭ نەگىزى – ەلىمىزدەگى ساياسي تۇراقتىلىق, ەتنوسارالىق بىرلىك پەن تامىرىن تەرەڭگە جايعان تاريح قۇندىلىعى – ىشكى تاتۋلىقتى ساقتاۋعا, تورتەۋ تۇگەل بولسا توبەدەگى كەلەدى دەمەكشى, اۋىزبىرشىلىكتى نىعايتۋعا, ءار ۇلتتىڭ مادەنيەتىن, ءتىلىن, ءدىنىن تەڭ دارەجەدە دامىتۋعا نەگىزدەلگەنى ۇلكەن جاۋاپكەرشىلىك جۇكتەيدى.
نۇرسۇلتان ءابىش ۇلى اتاپ ايتقانداي, قازاقستاننىڭ دامۋىنا, ءوسىپ-وركەندەۋىنە ىشكى ساياسي تۇراقتىلىق پەن ۇلتارالىق تۇتاستىق نەگىز قالاپ وتىرسا, دوستىق پەن بىرلىكتى ودان سايىن بىرىكتىرۋ مەملەكەتتىك باستى ماقسات-مۇددە بولا بەرەتىندىگى كوڭىلىمىزگە تاعى ءبىر ءسۇيسىنىس ۇيالاتتى. بۇكىل ۇلتتى ۇيىستىراتىن مەملەكەتتىك ءتىلدىڭ مەرەيى ۇستەم بولارىنا اسسامبلەيا مۇشەلەرى, ەتنومادەني بىرلەستىكتەر ءبىر اتانىڭ بالاسىنداي ۇلەس قوسىپ, تىلەگى ءبىردىڭ ءتىلى دە ءبىر بولۋىن ءىس جۇزىندە دالەلدەي ءبىلەتىنىنە سەنىمىم مول. ويتكەنى, ول ءۇشىن بىزدەرگە بارلىق جاعداي جاسالعان.
قازاقستان پرەزيدەنتىنىڭ جۇرگىزىپ كەلە جاتقان ۇلتتىق مۇددەلەردى جۇزەگە اسىرۋعا, ەلدىڭ حالىقارالىق ارەناداعى بەدەلىن كوتەرۋگە جانە ۇلتتىق, ايماقتىق, جاھاندىق قاۋىپسىزدىكتى قامتاماسىز ەتۋگە باعىتتالعان بەلسەندى, پراگماتيكالىق جانە تەڭ قىرلى سىرتقى ساياساتىنىڭ قاۋىپسىزدىك ماسەلەلەرىنىڭ نەگىزىن قالايتىن كونسەنسۋستىق الاڭدى كەڭەيتىپ, نىعايتا تۇسۋگە ىقپال ەتەتىندىگىنە كۇمان جوق. اسسامبلەيا مەملەكەت باسشىسىنىڭ بۇل ساياساتىن تولىق قولدايدى جانە ونىڭ ەلىمىزدى ودان ءارى دامىتۋ جونىندەگى باستاماسى مەن ءىس-ارەكەتىنە قىزۋ ءۇن قوسادى. وسىنىڭ ءبارى كورەگەن باسشىنىڭ كوسەمدىگىن بىلدىرسە كەرەك.
بىرلىك بولعان جەردە عانا جاراسىمدى تىرلىك بولارىن ءومىردىڭ سانعاسىرلىق تاجىريبەسى دالەلدەپ كەتكەن. بۇگىندە الەمنىڭ قاي قيىرىنا كوز تاستاساڭىز دا قىرعيقاباق سوعىستان كوز اشپاعان حالىقتىڭ ازاپتى تۇرمىسى الدىڭنان شىعادى. ءدۇنيەدە تىنىشتىق پەن بەيبىتشىلىكتەن اسقان باقىت جوق دەسەك, ءار ۇيدە باقىت شامى جارقىراپ جانۋى ءۇشىن بىرلىگىمىزدى نىعايتۋعا اتسالىسايىق, اعايىن.
راسىندا, جەرىمىز كەڭ, ەلىمىز باي. ەڭ باستىسى, بارلىق ۇلت وكىلدەرى ءبىر-بىرىمەن ءتىل تابىسىپ, تاتۋلىقتا ءومىر ءسۇرىپ جاتىر. بەيبىتشىلىك پەن كەلىسىم سالتانات قۇرعان جەرگە باق تۇراقتايدى دەسەك, ەلىمىزدىڭ ەندىگى دامۋىندا وسى فاكتور ۇلكەن ءرول ايتقاراتىنىن اڭعارامىز. تىنىشتىق, تاتۋلىق بولسا, الەۋمەتتىك جاعداي دا ودان ءارى جاقسارادى. جاڭا جولداۋ بولاشاقتى باعامداۋعا ارنالعان. ءبىز بارلىعىمىز سول بولاشاققا ارنالعان جوسپارلاردىڭ ورىندالارىنا كامىل سەنەمىز.
ءاسيا احمەتوۆا,
قازاقستان حالقى اسسامبلەياسىنىڭ مۇشەسى, الماتى وبلىستىق ۇيعىر
ەتنومادەني بىرلەستىگىنىڭ ءتورايىمى.
الماتى وبلىسى.