ەل تاريحىنداعى پاراليمپيادا ويىندارىنىڭ تۇڭعىش چەمپيونى, داڭقتى سپورتشى زۋلفيا گابيدۋللينا 55 جاسقا تولدى. بۇگىندە تاراز قالاسىندا تۇرىپ جاتقان ول ەلىمىزدىڭ داڭقىن دۇنيە جۇزىنە تانىتقان ساناۋلى ساڭلاقتاردىڭ ءبىرى. جامبىل وبلىسىنىڭ اكىمى بەردىبەك ساپارباەۆ ايگىلى سپورتشىنى مەرەيتويىمەن قۇتتىقتاپ, وعان مەملەكەت باسشىسى قاسىم-جومارت توقاەۆتىڭ ارنايى جولداعان حاتىن تابىس ەتتى.
«زۋلفيا گابيدۋللينا جولىندا كەزىككەن قيىندىقتارعا قاراماستان ءجۇزۋ سپورتىمەن بەلسەندى تۇردە اينالىسىپ, الەمدىك دەڭگەيدە ءوزىن مويىنداتقان جەرلەسىمىز. ول – جۇزۋدەن حالىقارالىق دەڭگەيدەگى سپورت شەبەرى, قازاقستاننىڭ پاراليمپيادا قۇراماسىنىڭ كاپيتانى, بىرنەشە دۇركىن الەم چەمپيونى. 150-دەن اسا مەدال ەنشىلەگەن ماقتانىشىمىز. ارباعا تاڭىلعانىنا قاراماستان, كۇش-جىگەرىنىڭ ارقاسىندا تولاعاي جەتىستىكتەرگە جەتىپ جۇرگەن زۋلفيا راۋحاتقىزىنىڭ ءومىرى وسكەلەڭ ۇرپاق ءۇشىن ۇلگى», دەدى بەردىبەك ساپارباەۆ.