ورتالىق سايلاۋ كوميسسياسىندا 2012-2013 جىلدارى جاستاردى قۇقىقتىق وقىتۋ جونىندەگى جوبانى ىسكە اسىرۋ ناتيجەلەرىن شىعارۋ جانە قازاقستان رەسپۋبليكاسىنىڭ جوعارى وقۋ ورىندارى ستۋدەنتتەرى مەن ماگيسترانتتارى اراسىندا وتكەن قازاقستان رەسپۋبليكاسىنداعى سايلاۋ قۇقىعى جانە سايلاۋ ۇدەرىسى ماسەلەلەرى جونىندەگى ۇزدىك جۇمىس كونكۋرسىنىڭ جەڭىمپازدارىن ماراپاتتاۋ ءراسىمى ءوتتى.
ورتالىق سايلاۋ كوميسسياسىندا 2012-2013 جىلدارى جاستاردى قۇقىقتىق وقىتۋ جونىندەگى جوبانى ىسكە اسىرۋ ناتيجەلەرىن شىعارۋ جانە قازاقستان رەسپۋبليكاسىنىڭ جوعارى وقۋ ورىندارى ستۋدەنتتەرى مەن ماگيسترانتتارى اراسىندا وتكەن قازاقستان رەسپۋبليكاسىنداعى سايلاۋ قۇقىعى جانە سايلاۋ ۇدەرىسى ماسەلەلەرى جونىندەگى ۇزدىك جۇمىس كونكۋرسىنىڭ جەڭىمپازدارىن ماراپاتتاۋ ءراسىمى ءوتتى.
راسىمگە جينالعان جاستارعا قاراپ ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ: «ورتسايلاۋكوم 2012-2013 جىلدارى ىسكە اسىرعان جاستاردى قۇقىقتىق وقىتۋ ءجونىندەگى جوبا مەن ستۋدەنتتەر مەن ماگيسترانتتار اراسىندا وتكىزىلگەن كونكۋرستى مەملەكەتتىك مەرەكە – تۇڭعىش پرەزيدەنت كۇنى قارساڭىندا قورىتىندىلاۋىمىز تەگىن ەمەس. مەملەكەت باسشىسى نازارباەۆ ۋنيۆەرسيتەتى جاستارىنىڭ الدىندا سويلەگەن سوزىندە: «سەندەر تاۋەلسىز قازاقستاننىڭ كەلەشەگى ءۇشىن تاريحي جاۋاپكەرشىلىك ارقالايتىن ازاماتسىڭدار. سەندەر تاۋەلسىز قازاق ەلىنىڭ ءبىلىمدى جاستارى, ءوز سوقپاقتارىڭدى سالىپ, ونى ەلدى دامۋعا باستايتىن داڭعىلعا اينالدىرۋعا تيىستىسىڭدەر!» دەگەنىن سىزدەر جاقسى بىلەسىزدەر دەپ ويلايمىن. ورتسايلاۋكوم ۇيىمداستىرعان كونكۋرس تاپ وسى مۇمكىندىكتەردىڭ ءبىرى بولدى. بۇل – ءبىز جىل بويى ءجۇرگىزگەن ۇلكەن, جۇيەلى جانە كوپجوسپارلى جۇمىستىڭ شەشۋشى كەزەڭى», دەدى.
مۇنان سوڭ ءسوز العان وسك ءمۇشەسى, كونكۋرستى ۇيىمداستىرۋ ءجونىندەگى باستاماشى ءلاززات سۇلەيمەن ونى وتكىزۋدىڭ باستى ماقساتىنا توقتالدى. ونىڭ ايتۋىنشا, سايلاۋدى جاستار اراسىندا تانىمال ەتۋدى, بولاشاق جاس سايلاۋشىلاردىڭ دەموكراتيالىق ۇدەرىستەرگە قاتىسۋى تاجىريبەسىن جيناقتاۋدى نيەت ەتكەن جوباعا ەلىمىزدىڭ 11 اۋماعىنان 50-گە جۋىق جوعارى وقۋ ورنى, 780 مەكتەپ, 135 كوللەدج, 5 كاسىپتىك ليتسەي, 10 بالالار ءۇيى جانە 2 وندىرىستىك ۇيىم قاتىسقان.
جاستار قاشاندا جاڭالىققا قۇمار. وسىنداي جاڭاشىلدىق ناتيجەسىندە ءتۇرلى فلەشموبتار ۇيىمداستىرىلدى, اعا بۋىن ءۇشىن دوڭگەلەك ۇستەلدەر, كونفەرەنتسيالار ءتارىزدى ءداستۇرلى جيىندار ۇيرەنشىكتى بولسا, جاستار ءوز جاڭالىعىن الىپ كەلدى, دەگەن وسك مۇشەلەرى بۇدان بىلاي دا وقۋ ورىندارى مەن مەكتەپتەردىڭ وقۋ باعدارلامالارىندا سايلاۋ قۇقىعى جونىندە ارنايى كۋرس, سونداي-اق, جاستاردىڭ ەلەكتوراتتىق بەلسەندىلىگىن ارتتىرۋ بويىنشا جۇمىس جۇرگىزۋ ءۇشىن ۇلگى-جوسپارلار مەن ءادىستەمەلىك قۇرالداردى بەلسەنە قولدانۋدى ۇسىندى.
نەگىزىنەن ەكى كەزەڭدە وتكىزىلگەن كونكۋرستىڭ وتە مازمۇندى دا ءماندى بولعانىنا توقتالعان وسك مۇشەسى, قازىلار القاسىنىڭ توراعاسى, پروفەسسور, زاڭ عىلىمدارىنىڭ دوكتورى مارات سارسەمباەۆ كونكۋرسقا قاتىسۋ ءۇشىن ەلىمىزدىڭ 38 جوعارى وقۋ ورنىنان ستۋدەنتتەر مەن ماگيسترانتتاردىڭ 200-دەن استام جۇمىسى ۇسىنىلعانىن, ونىڭ ىشىنەن 42 عىلىمي جۇمىس, 7 سلوگان جانە 7 بەينەروليك وڭىرلىك كەزەڭنىڭ جەڭىمپازدارى اتانىپ, رەسپۋبليكالىق كونكۋرسقا قاتىسۋ ءۇشىن ورتسايلاۋكومعا كەلىپ تۇسكەنىن جەتكىزدى. بۇعان قوسا, ورتسايلاۋكومنىڭ وزىنە دە تاعى 16 عىلىمي جۇمىس, 8 سلوگان جانە 9 بەينەروليك كەلىپ ءتۇسىپتى.
«كونكۋرسقا ۇسىنىلعان ءاربىر جۇمىس تالدانىپ, مۇقيات تالقىلاندى جانە ارقايسىسىنا ارنايى رەتسەنزيا دايىندالدى. ءناتيجەسىندە «قازاقستان رەپۋبليكاسىنداعى سايلاۋ قۇقىعى مەن سايلاۋ ۇدەرىسىنىڭ ماسەلەلەرى جونىندەگى عىلىمي جۇمىس», «سايلاۋ ناۋقانىنىڭ ۇزدىك سلوگانى», «سايلاۋ تاقىرىبىنا ۇزدىك بەينەروليك» اتتى 3 نوميناتسيادا 12 كونكۋرس جەڭىمپازى انىقتالدى», دەدى م.ءسارسەمباەۆ.
بۇدان باسقا, قازىلار القاسىنىڭ كوتەرمەلەۋى مەن ورتالىق سايلاۋ كوميسسياسىنىڭ العىس حاتتارىنا تاعى 8 كونكۋرسانت يە بولدى.
ورتسايلاۋكوم باسشىسى ق.تۇرعانقۇلوۆ استانا جانە الماتى قالالارى, اقمولا, اتىراۋ, شىعىس قازاقستان, باتىس قازاقستان, قاراعاندى, قوستاناي جانە وڭتۇستىك قازاقستان وبلىستارى جوعارى وقۋ ورىندارىنان كەلگەن كونكۋرس جەڭىمپازدارى مەن نومينانتتارىنا ەستەلىك سىيلىقتاردى, سونداي-اق, ماراپاتتاۋ قاعازدارى مەن العىس حاتتاردى تاپسىردى.
انار تولەۋحانقىزى,
«ەگەمەن قازاقستان».