بۇل كۇندە اۋرۋدىڭ ءتۇرى كوپ. دەگەنمەن بۇگىنگىدەي مەديتسينانىڭ دامىپ, دارىگەرلەردىڭ بىلىكتىلىگى ارتقان ۋاقىتتا كوپتەگەن دەرتتىڭ ەمى تابىلۋدا. ادام ءومىرىن ساقتاپ قالۋ ماقساتىندا مەملەكەت تاراپىنان دا ءتيىستى مۇمكىندىكتەر جاسالۋدا. جۋىردا الماتى قالاسىندا ورنالاسقان ورتالىق كلينيكالىق اۋرۋحانا نەيروحيرۋرگيا ءبولىمىنىڭ مەڭگەرۋشىسى, بەلگىلى نەيروحيرۋرگ, ەلىمىزدە وتكەن «100 جاڭا ەسىم» جوباسىنىڭ جەڭىمپازى مىڭجىلقى بەردىقوجاەۆ تاراز قالالىق كوپبەيىندى اۋرۋحاناسىنا كەلىپ, «مي تامىرلارىنىڭ انەۆريزماسى مەن ارتەريوۆەنوزدى مالفورماتسياسىن ەمدەۋ» تاقىرىبىندا شەبەرلىك ساباعىن وتكىزدى.
جيىندا اتالعان قاۋىپتى دەرتتى ەمدەۋدىڭ ءادىس-تاسىلدەرى تالقىلاندى. بۇل شارا تاراز قالاسىندا العاش رەت وتكىزىلىپ وتىر. مىڭجىلقى بەردىقوجاەۆ اۋرۋحانانىڭ رەنتگەنەندوۆاسكۋليارلى حيرۋرگى قانات قۋاندىق ۇلى مەن نەيروحيرۋرگ دارىگەر الماس كۇرالباەۆپەن بىرىگىپ, ارنايى انگيوگرافيالىق كابينەتتە تاراز قالاسىنىڭ 24 جاستاعى تۇرعىنىنا وتا جاسادى.
وتا جاسالعان جىگىت قالالىق كوپبەيىندى اۋرۋحاناسىنا تسەرەبروۆوسكۋليارلىق اۋرۋ تۇرىمەن اۋىر دارەجەدەگى قايتالانعان گەمورراگيالىق ينسۋلت, وڭ جاق ماڭدايداعى جەدەل ميىشىلىك گەماتوما, ارتەريوۆەنوزدىق مالفورماتسيا دياگنوزىمەن اۋىر حالدە ءتۇسىپتى. بۇرىن مۇنداي ناۋقاسقا شالدىققاندار وتا جاساتۋ ءۇشىن ەلىمىزدەگى ارنايى كلينيكالىق ورتالىقتارعا نەمەسە شەت مەملەكەتتەرگە بارۋعا ءماجبۇر بولاتىن. ەندى مۇنداي ناۋقاس ءتۇرىن تاراز قالاسىندا دا ەمدەۋگە مۇمكىندىك تۋىپ وتىر. العاش رەت ۇيىمداستىرىلعان شەبەرلىك ساباعىندا جامبىل وبلىسىنىڭ دارىگەرلەرىنە وتانىڭ ءادىس-تاسىلدەرى, ودان كەيىنگى كۇتىم, ەم-شارا جولدارى تۋرالى ايتىلىپ, تاجىريبەلىك وتا كورسەتىلدى.
«مۇنداي اۋرۋمەن اۋىراتىن ناۋقاستاردىڭ 17-40 پايىزى ۇستاما بولىپ, ەسىنەن تانىپ, قۇلاپ قالۋ جاعدايىنا كوپ ۇشىرايدى. اياق-قولدارى جانسىزدانادى. ەپيلەپسيالىق ۇستامالار سەزىمتالدىقتىڭ بۇزىلۋى, جۇرەكتىڭ سوعۋى, بەت الپەتى ارقىلى دا كورىنۋى ىقتيمال. ءساتتى وتكەن وتادان ناۋقاس ايىعىپ كەتۋى ابدەن مۇمكىن», دەيدى م.بەردىقوجاەۆ.
تاراز قالالىق كوپبەيىندى اۋرۋحاناسىنىڭ باس دارىگەرى نۇرلان ابىلداەۆتىڭ ايتۋىنشا, ارتەريوۆەنوزدىق مالفورماتسيا – ميدا نەمەسە ج ۇلىندا رەتسىز تۇردە, ايقاسا ورنالاسقان تامىرلاردىڭ شۋماعى ءتارىزدى تۋا بىتكەن تامىرلى پاتولوگيا. بۇل تامىرلاردىڭ قابىرعاسى قالىپتى جاعدايداعى تامىرلارعا قاراعاندا وتە جۇقا بولعاندىقتان, ولاردىڭ جارىلىپ كەتۋى مۇمكىن ەكەن. سونىمەن قاتار مي مەن ج ۇلىننىڭ ارتەريوۆەنوزدىق مالفورماتسياسى سيرەك كەزدەسەتىن نوزولوگيالىق اقاۋ بولىپ تابىلادى. الايدا دەر كەزىندە مۇنىڭ الدىن الماسا, دارىگەرلەر كۇردەلى نەۆرولوگيالىق بۇزىلىستار مەن ءولىم جاعدايىنا الىپ كەلۋى مۇمكىن ەكەنىن ەسكەرتەدى. ونىڭ ەڭ ءجيى كەزدەسەتىن جانە قاۋىپتى كلينيكالىق كورىنىستەرى – باس اۋرۋى, ۇستامالار, قان كەتۋ. ال ۋاقىت وتكىزىپ العان ناۋقاستاردىڭ 50 پايىزى مۇگەدەكتىككە شالدىعۋى ىقتيمال. دەگەنمەن بىلىكتى دارىگەرلەر جۇمىسىنىڭ ناتيجەسىندە مۇنداي ناۋقاس تۇرىنە تاراز قالاسىندا العاش رەت جاسالعان وتا ءساتتى ءوتتى. ەندى الداعى ۋاقىتتا دا مۇنداي اۋرۋمەن اۋىرعان ازاماتتاردىڭ تاراز قالالىق كوپبەيىندى اۋرۋحاناسىندا ەمدەلۋگە مۇمكىندىگى بار. ول ءۇشىن بارلىق مۇمكىندىكتەر قاراستىرىلعان.
جامبىل وبلىسى