جامبىل وبلىسىندا 359,3 مىڭ ادام دەنە شىنىقتىرۋ جانە سپورتپەن جۇيەلى تۇردە اينالىسادى. بۇل تۇرعىنداردىڭ 31,7 پايىزى. بيىل اتالعان سالادا 120 جوبا ىسكە اسىرىلىپ, ناتيجەسىندە سپورتپەن شۇعىلدانۋشىلار سانى 10 460-قا جەتەدى دەپ كۇتىلۋدە.
بۇل تۋرالى كەشە جامبىل وبلىسى اكىمدىگى دەنە شىنىقتىرۋ جانە سپورت باسقارماسىنىڭ باسشىسى نۇربول جۇنىسبەكوۆ وڭىرلىك كوممۋنيكاتسيالار قىزمەتىنىڭ اقپارات الاڭىندا وتكەن بريفينگ بارىسىندا بايانداپ بەردى.
– وبلىس بويىنشا 2594 سپورت نىسانى تۇراقتى تۇردە حالىققا قىزمەت كورسەتسە, ونىڭ ىشىندە, 23 دەنە شىنىقتىرۋ-ساۋىقتىرۋ كەشەنى, 17 ستاديون, 1 سپورت سارايى, 436 فۋتبول الاڭى, 652 سپورت زال, 1429 سپورت الاڭشاسى جانە 36 باسقا دا نىساندار بار, – دەدى سپيكەر ءوز سوزىندە.
سونىمەن قاتار وبلىستىڭ باس سپورتشىسى نۇربول ءابدىماجيت ۇلى حالىقتى سپورتتىق ينفراقۇرىلىممەن قامتاماسىز ەتۋ ارقىلى دەنە شىنىقتىرۋ جانە سپورتپەن جۇيەلى تۇردە شۇعىلدانۋشىلار سانىن ارتتىرۋ ماقساتىندا ارنايى ينديكاتور ەنگىزىلگەنىن, باعدارلاما اياسىندا 2020 جىلى 120 جوبا, ونىڭ ىشىندە 13 دەنە شىنىقتىرۋ ساۋىقتىرۋ كەشەندەرىنىڭ قۇرىلىسى, 2 نىساندا كۇردەلى جوندەۋ, 1 نىساندا قايتا جاڭعىرتۋ, 12 نىساندا اعىمداعى جوندەۋ جانە 92 سپورت الاڭشاسىن ورناتۋ جۇمىستارى ىسكە اسىرىلىپ, ناتيجەسىندە شۇعىلدانۋشىلار سانى 10 460 ادامعا ارتاتىنىنا دا توقتالدى.
تارازدىڭ بالمۇزداعى
وبلىس ورتالىعىندا «يمپەريا» جك بالمۇزداق شىعاراتىن تسەحىنىڭ قۇرىلىسى اياقتالۋعا تاياۋ. بۇل جوبانى جۇزەگە اسىرۋعا جەرگىلىكتى اتقارۋشى ورگانداردىڭ قولداۋى كوپ بولدى.جۋىردا جامبىل وبلىسىنىڭ اكىمى بەردىبەك ساپارباەۆ وسى تسەحقا ارنايى بارىپ, تەحنولوگيالىق جەلىمەن تانىستى. تسەح باسشىسى پاتوحبەردي تاليپوۆ تسەح ىسكە قوسۋعا دايىن تۇرعانىن, ينفراقۇرىلىمدى جۇرگىزۋ ماسەلەلەرىن شەشۋ قاجەت ەكەنىن ايتتى. ءوڭىر باسشىسى وعان جان-جاقتى قولداۋ كورسەتىلەتىنىنە سەندىردى. ول كاسىپكەرلىك جانە يندۋستريالدى-يننوۆاتسيالىق دامىتۋ باسقارماسىنا ءتيىستى تاپسىرما جۇكتەدى.
– «بيزنەستىڭ جول كارتاسى-2025» باعدارلاماسى شەڭبەرىندە وبلىسىمىزعا اۋقىمدى قارجى بولىنۋدە. ماسەلە جوبالاردىڭ ازدىعىندا بولىپ وتىر. بيزنەس-يدەيالاردى قولداۋ ءۇشىن بارلىق مۇمكىندىكتەر بار. تەك ماسەلەلەردى دەر كەزىندە كوتەرە ءبىلۋ كەرەك, – دەدى وبلىس اكىمى.
جوبا قۇنى 800 ميلليون تەڭگەنى قۇرايدى. قۋاتى تاۋلىگىنە 8000 توننا ءتاتتى ءونىم شىعارۋعا شاقتالعان. مۇندا بالمۇزداقتىڭ 30 ءتۇرىن شىعارۋ جوسپارلانۋدا. سەرىكتەستىكتىڭ باسقارۋشى ديرەكتورى راحات ءاشىموۆتىڭ ايتۋىنشا, كاسىپورىندا جۇزدەن استام جاڭا جۇمىس ورنى اشىلادى دەپ كۇتىلۋدە.
– جازدا ۇزدىكسىز ءونىم وندىرۋگە مۇمكىندىك بار, – دەيدى ول.
ءونىم شىعارۋعا قاجەتتى ءسۇت شيكىزاتىن جاقىن ماڭداعى شارۋالاردان الۋعا نيەتتى. ايتا كەتەيىك, قازىر «يمپەريا» جك شۇجىقتار مەن كونديتەرلىك ونىمدەردى ساقتاۋمەن جانە تاسىمالداۋمەن اينالىسادى.
جامبىل وبلىسى