بۇدان ءبىراز ۋاقىت بۇرىن قىزىلوردادا قازاقستاننىڭ ءبىرىنشى دەربەس پروكۋرورى, بەلگىلى قوعام قايراتكەرى سۇلەيمەن ەسقاراەۆتىڭ تۋعانىنا 115 جىل تولۋى كەڭ كولەمدە اتاپ ءوتىلدى. وسى سالتانات شاراسىنىڭ اياسىندا وبلىستىق پروكۋراتۋرا عيماراتىنىڭ الدىندا تۇڭعىش پروكۋروردىڭ تاستۇعىرعا قونعان ەسكەرتكىشى اشىلدى.
بۇدان ءبىراز ۋاقىت بۇرىن قىزىلوردادا قازاقستاننىڭ ءبىرىنشى دەربەس پروكۋرورى, بەلگىلى قوعام قايراتكەرى سۇلەيمەن ەسقاراەۆتىڭ تۋعانىنا 115 جىل تولۋى كەڭ كولەمدە اتاپ ءوتىلدى. وسى سالتانات شاراسىنىڭ اياسىندا وبلىستىق پروكۋراتۋرا عيماراتىنىڭ الدىندا تۇڭعىش پروكۋروردىڭ تاستۇعىرعا قونعان ەسكەرتكىشى اشىلدى.
قايسىبىر ىزگى نيەتتى ىستە دە ونىڭ ىلكى يدەياسىن كوتەرىپ, كەرەگەسى كەرىلۋىنە مۇرىندىق بولىپ جۇرەتىن ءبىر ازاماتتار بولادى. بۇل جولى تاپ سونداي ىزگىلىك نىشانىن وبلىس پروكۋرورى, اعا ادىلەت كەڭەسشىسى ساپاربەك نۇرپەيىسوۆ كورسەتتى. ول ەڭ الدىمەن وبلىستا وسىنداي شارانىڭ ءوتۋىن زاڭداستىرۋعا قول جەتكىزدى. سودان كەيىن تۇڭعىش پروكۋرور تۋرالى ەستەلىك كىتاپ جازىلىپ, دەرەكتى فيلم ءتۇسىرىلۋىن قامتاماسىز ەتتى. بۇلارمەن قاتار, وبلىستىق پروكۋراتۋرا عيماراتىندا س.ەسقاراەۆ اتىنداعى ۆەدومستۆولىق مۇراجايدى دايىنداۋ جۇمىستارى قىزۋ ءجۇرىپ جاتتى.
اقىرىندا كوپتەن كۇتكەن كۇن دە كەلدى. شاراعا باس پروكۋراتۋرا مەن وبلىس باسشىلارىنان بولەك, تۇڭعىش دەربەس پروكۋروردىڭ قىزى ماريەتتا ەسقاراەۆا, نەمەرەسى مارات بايمۇحانوۆ جانە باسقا دا تۋىستارى, سونداي-اق, پروكۋراتۋرا ورگاندارىنىڭ ارداگەرلەرى قاتىستى. وسى القالى توپ الدىمەن سۇلەيمەن ەسقاراەۆ ەسكەرتكىشىنىڭ اشىلۋ ءراسىمىن وتكىزدى. مۇنىڭ ءوزى جان تەبىرەنتەرلىك ساتتەرگە تولى بولدى. ونى «ۇلتتىڭ رۋح تۇلعاسى» اتتى تەاترلاندىرىلعان قويىلىم باستاپ بەردى. بۇدان سوڭ باس پروكۋروردىڭ ورىنباسارى نۇرماحانبەت يساەۆ باس پروكۋروردىڭ شاراعا قاتىسۋشىلارعا ارنالعان ىزگى لەبىزىن جەتكىزدى. وبلىس اكىمى قىرىمبەك كوشەرباەۆ, وبلىستىق ارداگەرلەر كەڭەسىنىڭ توراعاسى سەيىلبەك شاۋحامانوۆ ءسوز الىپ, سۇلەيمەن ەسقاراەۆ ەڭبەگىنىڭ تاريحتان ەش وشپەيتىن ونەگەسى تۋرالى تولعامدى اڭگىمەنىڭ ارقاۋىن تارقاتتى.
قازاقستان سۋرەتشىلەر وداعىنىڭ مۇشەسى, «مادەنيەت سالاسىنىڭ ۇزدىگى» توسبەلگىسىنىڭ يەگەرى مۇراتباي ۇمبەتوۆتىڭ قولىنان شىققان ءمۇسىن جينالعانداردىڭ كوڭىلىنەن شىقتى. جيىنعا قاتىسۋشىلار وسىنداي كوتەرىڭكى كوڭىل كۇيمەن تۇڭعىش پروكۋرور اتىنداعى ۆەدومستۆولىق مۇراجايدىڭ دا اشىلۋ راسىمىنە اتسالىستى.
مەرەيتويدىڭ كەلەسى نەگىزگى بولىگى قورقىت اتا اتىنداعى مەملەكەتتىك ۋنيۆەرسيتەتتىڭ ستۋدەنتتەر سارايىندا وتكەن «س.ەسقاراەۆ: تاۋەلسىز قازاقستان پروكۋراتۋراسىنىڭ قالىپتاسۋى مەن دامۋى» اتتى عىلىمي-تاجىريبەلىك كونفەرەنتسيا تۇرىندە قانات جايدى. كونفەرەنتسيا اياسىندا ءبىرىنشى پروكۋروردىڭ ءومىرى مەن قىزمەتىنە ارنالعان «تارلانبوز» كىتابى مەن دەرەكتى ءفيلمنىڭ تۇساۋكەسەرى وتكىزىلدى.
سەرىك ءپىرنازار,
«ەگەمەن قازاقستان».
قىزىلوردا.