نۇر-سۇلتاندا جەدەل جاردەم كولىكتەرى ەكى ەسە ارتتى

"مەديتسينالىق جەدەل جاردەم ستانتسياسى مەن پوليتسيا دەپارتامەنتىنە 114 كولىك ساتىپ الىندى. ونىڭ 65-ءى پوليتسەيلەرگە, 14-ءى جەدەل جاردەم قىزمەتىنە بەرىلدى.

ال جىل سوڭىنا دەيىن ستانتسيانىڭ مەدقىزمەتكەرلەرىنە تاعى 35 اۆتوكولىك بەرىلەدى. بۇعان دەيىن 50-دەن استام رەانيموبيلدەر الىپ بەرگەنبىز.

وسىلايشا جەدەل مەديتسينالىق جاردەم ستانتسياسىنىڭ اۆتوپاركى جىلعا جەتپەي ەكى جارىم ەسە ۇلعايدى. (وتكەن جىلى جەلتوقساندا اۆتوپاركتە 64 ماشينا بولسا, قازىر ەندى 165 بولدى).

مەملەكەت باسشىسىنىڭ تاپسىرماسى بويىنشا مەديتسينالىق جەدەل جاردەم, پوليتسيا دەپارتامەنتى, كوممۋنالدىق قىزمەتتەر, قوعامدىق كولىك جانە ت.ب. اۆتوپاركتەرىن جاڭارتىپ, تولىقتىرىپ وتىرۋعا بارىنشا كوڭىل ءبولىپ كەلەمىز.

ماسەلەن, تۇرعىندار ءبىرىنشى كەزەكتە جەدەل جاردەم قىزمەتىنە حابارلاسادى, ولاردىڭ ءاربىر مينۋتى قىمبات. مەديتسينا قىزمەتكەرلەرى مىنە, بىرنەشە ايدىڭ ءجۇزى بولدى كوروناۆيرۋسپەن كۇرەستە الدىڭعى شەپتە ءجۇر. ءاربىر جاننىڭ ءومىرى ءۇشىن جانىن سالىپ, جۇمىس ىستەپ كەلەدى. جاڭا رەانيموبيلدەردە العاشقى مەديتسينالىق كومەك كورسەتۋگە ارنالعان جاساندى تىنىس الۋ اپپاراتى, ينگالياتسيالىق وتتەگى جۇيەسىنىڭ جيناعى; مونيتور-دەفيبريللياتور; ەلەكتروسورعىشتار; ارتەريالىق قىسىم, قىزۋ, تىنىس الۋ جيىلىگىن ولشەيتىن فۋنكتسياسى بار رەانيماتسيالىق-انەستەزيولوگيالىق مونيتور سىندى بارلىق قاجەتتى جابدىق بار.

ماۋسىمدىق اۋرۋلار مەن Covid-19 ۆيرۋسىن جۇقتىرۋ قاۋپىن ەسكەرسەك, بۇل اۆتوكولىكتەر ءبىزدىڭ تۇرعىندارعا بارىنشا ساپالى قىزمەت كورسەتۋگە مۇمكىندىك بەرەدى. ىندەتتىڭ ورشىگەن تۇسىندا جەدەل جاردەم قىزمەتىنە كۇنىنە 3 مىڭنان استام شاقىرتۋ ءتۇسىپ وتىردى. اۆتوپارك ماشينالارىنىڭ 2,5 ەسە ارتقانى جەدەل كومەك كورسەتۋمەن قاتار مەديتسينا قىزمەتكەرلەرىنىڭ دە جۇمىسىن ايتارلىقتاي جەڭىلدەتەدى. مەديتسينا ماماندارىن رەزيدەنتۋرادا وقىتۋعا جارتى ميلليارد تەڭگە ءبولىندى, ياعني بۇل 300-دەي گرانت.

پوليتسيا قىزمەتىنىڭ دە اۆتوپاركى 65 ماشينامەن تولىقتى (بۇعان دەيىن قوسىمشا 13 اۆتوماشينا بەرىلگەندى). تج رەجيمى كەزىندە پوليتسيا دەپارتامەنتى قىزمەتكەرلەرى ەكى اي بويى بلوكبەكەتتەردە تاۋلىكبويى كەزەكشىلىكتە بولدى, كۇندىز دە, تۇندە دە ءتارتىپتىڭ ساقتالۋىن قامتاماسىز ەتىپ كەلەدى. بارلىعى دا تۇرعىندارىمىزدىڭ قاۋىپسىزدىگى ءۇشىن جاسالىپ وتىر", دەپ جازدى التاي كولگىنوۆ.

اكىمدىك تاراپىنان ساتىپ الىنعان اۆتوكولىكتەردى "استانا موتورس" كومپانياسى الەۋمەتتىك جاۋاپكەرشىلىكتى ەسكەرە وتىرىپ, مەرزىمىنەن بۇرىن جەتكىزىپ بەردى.