الماتى پوليتسياسى كۇشەيتىلگەن قىزمەتكە كوشتى. بۇل تۋرالى قالالىق پوليتسيا دەپارتامەنتىنىڭ ءباسپاسوز قىزمەتى حابارلادى, دەپ جازادى Egemen.kz.
"ەكى كۇندىك ءىس-شارا (22-24 قىركۇيەك ارالىعىندا) جول-كولىك وقيعالارىنىڭ الدىن الۋعا جانە ازايتۋعا, ولاردىڭ سالدارىنىڭ اۋىرلىعىنا باعىتتالعان. ونىڭ ماقساتى - الدىن-الۋ جۇمىستارىن كۇشەيتۋ جانە جول پايدالانۋشىلارى اراسىندا جول قاۋىپسىزدىگى تالاپتارىنىڭ ساقتالۋىن باقىلاۋ, ءتيىستى قوعامدىق ءتارتىپتى, جول قاۋىپسىزدىگىن قامتاماسىز ەتۋ جانە جول-كولىك وقيعالارىن ازايتۋ. ءجاىش كۇندەرى جەكە قۇرام كۇشەيتىلگەن نۇسقادا قىزمەت ەتەدى. سونداي-اق, "قاۋىپسىز جول" ناۋقانى اياسىندا جولاۋشىلار مەن جۇكتەردى اۆتوكولىكتەرمەن تاسىمالداۋدى جۇزەگە اسىرۋدا جول قاۋىپسىزدىگىن باقىلاۋعا ەرەكشە نازار اۋدارىلاتىن بولادى", دەپ حابارلادى الماتى قالالىق پد اكىمشىلىك پوليتسيا باسقارماسىنىڭ باستىعى, پوليتسيا پولكوۆنيگى جاندوس مۇراتاليەۆ.
سونىمەن قاتار, بولىمشەدە جاۋىنگەرلىك قىزمەتتىڭ جەكە قۇرامىنا جۇكتەلگەن نەگىزگى مىندەت- جول ءجۇرۋ ەرەجەلەرىن بۇزۋشىلىقتاردى انىقتاۋ جانە جولىن كەسۋ.
"سونداي-اق, جۇرگىزۋشىلەر مەن جاياۋ جۇرگىنشىلەر اراسىندا جول قوزعالىسى ەرەجەلەرىن ساقتاۋ بويىنشا قۇقىقتىق ءتۇسىندىرۋ جۇمىستارى جۇرگىزىلەتىن بولادى. كوبىنە جول اپاتىنا تەك جۇرگىزۋشىلەر عانا ەمەس, جاياۋ جۇرگىنشىلەر دە كىنالى. سوندىقتان مەن جول قوزعالىسىنىڭ بارلىق قاتىسۋشىلارىنا جۇگىنگىم كەلەدى, كوشەلەردى قاتاڭ بەلگىلەنگەن جاياۋ جۇرگىنشىلەر وتكەلدەرىنەن جانە تەك جاسىل باعدارشامنان وتىڭىزدەر. جۇرگىزۋشىلەر وتە مۇقيات بولۋى , جول ەرەجەسىن بۇزباۋى جانە جىلدامدىقتى ساقتاۋى كەرەك", دەدى پولكوۆنيك مۇراتاليەۆ.