ءجۇز جاساعان جامبىلدىڭ سۇيىكتى شاكىرتىنىڭ ءبىرى, حالىق اقىنى ۇمبەتالى كارىباەۆتىڭ ساۋساق تابى قالعان بىرنەشە دومبىرا بار ەكەن. سول اسپاپتىڭ ءبىرى قازىر جامبىل اۋدانى, قاراقىستاق اۋىلىنداعى ءسۇيىنباي ارون ۇلىنىڭ مۋزەيىندە ساقتاۋلى تۇر.
رومب پىشىندەس اسپاپتى تۇتاس اعاشتان اسقان شەبەرلىكپەن شاۋىپ جاساعانى انىق بايقالادى. قىزىل- قوڭىر ءتۇستى دومبىرانىڭ شاناعى قوڭىر ءتۇستى ويۋمەن كومكەرىلگەن ەكەن. وكىنىشكە قاراي, ۇزىندىعى 70 سم بولاتىن ساز اسپابىنا بار ونەرىن سالعان اعاش شەبەرىنىڭ اتى-ءجونىن انىقتاۋ مۇمكىن بولماپتى.
جالپى, جامبىل جىراۋعا ءپىر بولعان ءسۇيىنباي اقىننىڭ مۇراجاي-ۇيىندە كونە زاماننان سىر شەرتەتىن جادىگەر كوپ-اق. مىسالى, حالىق اقىنى ابدىعالي ساريەۆتىڭ جەكە دومبىراسى دا – وسى مۋزەيدىڭ كوركىن كەلتىرىپ تۇرعان جادىگەردىڭ ءبىرى. بۇل اسپاپتى دا اقىننىڭ قىزى شايىمقان ساريەۆا 1996 جىلى سىيعا تارتقان ەكەن. حح عاسىردىڭ باسىنداعى قازاقتىڭ مادەني ءومىرىنىڭ كۋاسىندەي بولىپ تۇرعان قىزىل-قوڭىر ءتۇستى دومبىرانىڭ ولشەمى 80ح25 سم شاماسىندا. جادىگەردىڭ ۇزاق جىل بويىنا قولدان تۇسپەي, ءان مەن جىرعا ارقاۋ بولعانى ونىڭ ءتۇسىنىڭ وڭىپ, شاناعىنىڭ سىرىلعانىنان اڭعارىلادى.
– ءسۇيىنباي اتامىزدىڭ ايتىس ونەرىندەگى ەڭ تاڭداۋلى دۇنيەسى قازاق-قىرعىز دوستىعىن جىرلاپ, بۇگىنگە قالپىن بۇزباي جەتكەن ء«سۇيىنباي مەن قاتاعاننىڭ ايتىسى» ەكەندىگى انىق. سول ايتىستا ءسۇيىنباي اقىن دومبىرانى سەرىك ەتسە, قاتاعان قىرعىزدىڭ ۇلتتىق اسپابى قومىزدى قولىنا الادى. وتكەن كۇندەردىڭ بەلگىسى رەتىندە ءسۇيىنباي ارون ۇلىنىڭ ادەبي-ەسكەرتكىش مۋزەيىندە قىرعىز حالقىنىڭ شەرتپەلى مۋزىكالىق اسپابىن ساقتاۋدى پارىز سانادىق. قازىر بىزگە قىمبات جادىگەرلەر اراسىندا 1996 جىلى مۋزەي قورىنا الىنعان سارى ءتۇستى كونە كومىز بار. قىرعىز حالقىنىڭ ۇلتتىق اسپابى تۇتاس اعاشتان ويىپ جاسالعان ەكەن, ءۇش ىشەگى بار, پەرنەلەرى جوق. ءىح-ح عاسىردىڭ مادەني مۇراسى سانالاتىن جادىگەردىڭ ولشەمى 120ح25 سم. اسپاپ جاقسى ساقتالعان, شاناعى, موينى زاقىمدانباعان. مۋزەي قىزمەتكەرلەرى بارلىق جادىگەردى كوزدىڭ قاراشىعىنداي ساقتاپ, كەلەر ۇرپاققا كوزايىم رەتىندە ۇسىنۋدى پارىز سانايدى, – دەيدى ءسۇيىنباي ارون ۇلى ادەبي-مەموريالدى مۋزەيىنىڭ ديرەكتورى مۇرات مۇقاش ۇلى.
الماتى وبلىسى