«سەرپىندى سىرداريا» اتانعان قىزىلوردا وبلىسىنداعى داريا اتتاس اۋداندا باس-باسىنا اتاپ ايتارلىقتاي اۋقىمدى ىستەر جەتەرلىك. ءار اۋىلى ءوزىنىڭ ايرىقشا ۇلگىلى ىستەرىمەن ەرەكشەلەنىپ, اۋدان اتىن اسقاقتاتىپ كەلەدى. سونىڭ ءبىرى – شاعان اۋىلى.
بەس مىڭنان استام تۇرعىنى بار ىرگەلى مەكەندە بوي كوتەرىپ كەلە جاتقان ءزاۋلىم عيماراتتار اۋىلدىڭ اجارىن ايشىقتايدى. الەۋمەتتىك تە, ەكونوميكالىق تا الەۋەتى جاقسارىپ كەلە جاتقان ەلدى مەكەن جىل سايىن قانات جايىپ, ۇلعايىپ كەلەدى. وعان سەبەپ – ۋربانيزاتسيا ديناميكاسىنىڭ بۇل اۋىلعا جات ەكەندىگى. جۇمىسى بار جاستار اۋىلدا قالىپ, قارا شاڭىراقتىڭ قاسىنان ءوز الدارىنا وتاۋ كوتەرۋدە. وزەن ۇستىنە سالىنعان الىپ كوپىر ارقىلى اۋدان ورتالىعىنا بارىپ قىزمەت ىستەپ, كەشكە شاڭىراعىندا شالقىپ وتىراتىندار دا وسى جاستار. بۇل ءوز كەزەگىندە دەموگرافيانىڭ دامۋىنا, اۋىلدىڭ وركەندەۋىنە وڭ اسەرىن تيگىزەدى. كوشەلەر كوسىلە ءتۇسىپ, ولارعا بەلگىلى تۇلعالاردىڭ ەسىمى بەرىلەدى. ارينە كۇللى قازاققا تانىمال ۇلىلاردى ايتپاسا دا بىلگەنىمىزبەن, ەڭبەگىمەن ەلگە تانىلىپ اۋىلدىڭ بۇگىنىن جاساعان ەرلەرىمىزدى بىرەۋ بىلسە, بىرەۋ بىلمەۋى مۇمكىن. سوندىقتان اۋىل اكىمدىگى كوپكە ۇلگى بولارلىق وڭ شەشىم تاپقان. ۇيلەردىڭ قاس بەتىنە ىلىنەتىن كوشە اتاۋلارىنا ارنايى OR كود ورنالاستىردى. ەندى وسى اۋىلعا قادىرلى قوناق بولىپ كەلسەڭىز, كوشەگە ەسىمى بەرىلگەن تۇلعانىڭ كىم ەكەنىن ۇيالى تەلەفونىڭىزعا شتريح كودتى سكانەرلەۋ ارقىلى بىلە الاسىز. ءارى ەشكىمنەن سۇراماي-اق اۋىل تۋرالى مالىمەتكە قانىعاسىز.
اياداي اۋىلدىڭ وسى يگى ءىسى كۇللى ەلگە ۇلگى بولسا, ۇتارىمىز كوپ.
تىلەگەن بەكارىستانوۆ,
شاعان اۋىلىنىڭ تۇرعىنى
قىزىلوردا وبلىسى,
سىرداريا اۋدانى