ءبىلىم جانە عىلىم مينيسترلىگىنىڭ قولداۋىمەن سىبايلاس جەمقورلىققا قارسى ءىس-قيمىل اگەنتتىگىنىڭ باستاماسىمەن ءبىلىم كۇنىنە وراي ەلىمىزدىڭ بارلىق وقۋ ورىندارىندا بىرىڭعاي ونلاين رەجىمدە جالپىرەسپۋبليكالىق «ادالدىق ساعاتى» ءوتتى.
ءىس-شارانىڭ نەگىزگى ماقساتى – وسكەلەڭ ۇرپاقتىڭ بويىنا سىبايلاس جەمقورلىققا قارسى مادەنيەتتى قالىپتاستىرۋ جانە ادالدىق, ادىلدىك, پاراساتتىلىق جانە سەنىم سىندى ماڭىزدى ادامگەرشىلىك قۇندىلىقتاردى ءسىڭىرۋ.
ونلاين-ءدارىس تۇران دالاسىنىڭ ۇلى ويشىلى قوجا احمەت ياساۋيدىڭ ادالدىق قاعيدالارىن تۇسىندىرۋگە ارنالعان. تۇركى الەمىنىڭ دامۋىنداعى ياساۋي ءرولى ءسوزسىز وزەكتى, ونىڭ مۇراسى تۇركى مەملەكەتتەرى اراسىنداعى دوستىق قارىم-قاتىناستاردىڭ قالىپتاسۋىندا ۇلكەن ءرول اتقاردى.
ەلباسى ن.ءا.نازارباەۆ «قوجا احمەت ياساۋي ورتالىق ازياداعى ونىڭ ىشىندە قازاقستاندا دا, بارلىق تۇركى حالىقتارىنىڭ ۇلتتىق رۋحاني ءىلىم جۇيەسىن ورنەكتەپ بەردى», دەپ اتاپ وتكەن.
بەينەدارىستەردە وقۋشىلار مەن ستۋدەنتتەر «اقىل كىتابى» – «ديۋاني-حيكمەتتە» جيناقتالعان ادالدىق, ادىلدىك, پاراساتتىلىق, قاراپايىمدىلىق پەن مەيىرىمدىلىك سياقتى ادامي قۇندىلىقتارعا شاقىراتىن ۇلى ويشىلدىڭ سوزدەرىمەن تانىسادى.
اقپارات جانە قوعامدىق دامۋ مينيسترلىگىنىڭ قولداۋىمەن بەينەساباق رەسپۋبليكالىق جانە وڭىرلىك تەلەارنالار ەفيرىندە كورسەتىلىپ, سونداي-اق اگەنتتىكتىڭ Youtube-ارناسىندا جانە الەۋمەتتىك جەلىلەردە ورنالاستىرىلدى.