ورتالىق كوممۋنيكاتسيالار قىزمەتىندە دەنساۋلىق ساقتاۋ ءمينيسترى الەكسەي تسوي كوروناۆيرۋستىق ينفەكتسيانى تۇراقتاندىرۋ جونىندەگى شارالار تۋرالى بايانداپ, الداعى ۋاقىتتا اتقارىلاتىن جۇمىستارعا توقتالدى.
جيىن بارىسىندا مينيستر قازىرگى ۋاقىتتا جاعداي ينفەكتسيانىڭ ۇيدە تارالۋ دەڭگەيىنە ءوتىپ كەتكەنىن اتاپ ءوتتى.
«كوروناۆيرۋس پاندەمياسى قازاقستاندىقتاردىڭ ومىرىنە ۇلكەن اسەرىن تيگىزىپ جاتىر. كورشىلەس ەلدەردەگى قيىن جاعدايلارعا قاراماستان مەملەكەتتىڭ شەكاراداعى سانيتارلىق كۇزەتىنە باعىتتالعان كۇش-جىگەرى – ينفەكتسيانىڭ سىرتتان كەلەتىن جاعدايلاردىڭ بارىنشا الدىن الۋعا مۇمكىندىك بەردى. قازىرگى ۋاقىتتا جاعداي ينفەكتسيانىڭ ۇيدە تارالۋ دەڭگەيىنە ءوتىپ كەتتى. ۆيرۋس حالىق ىشىنە تارادى. ءار وتباسى وسىناۋ قيىندىقپەن بەتپە-بەت كەلىپ وتىر. 30 ماۋسىمداعى جاعداي بويىنشا قازاقستاندا كوروناۆيرۋس جۇقتىرعانداردىڭ سانى 40 مىڭعا جەتتى. كەيىنگى ايلاردا مەديتسينالىق ۇيىمدار كۇشەيتىلگەن رەجىمدە جۇمىس جۇرگىزۋدە. مەديتسينالىق قىزمەتكەرلەر ينفەكتسيا جۇقتىرعان ادامداردى ەمدەپ, ولارمەن ۇنەمى قارىم-قاتىناستا ءجۇر. سول سەبەپتى ولار دا اۋىرىپ جاتىر. بۇل – كادرلىق تاپشىلىعى ماسەلەسىن كۇردەلەندىرۋدە. بىراق رەسۋرس جەتكىلىكتى. ءبىز ونى دا ەڭسەرىپ كەلەمىز. ۇكىمەتتىك شارالاردىڭ جاڭا پاكەتى جاعدايدى تۇراقتاندىرادى. دەنساۋلىق ساقتاۋ جۇيەسى – الەۋمەتتىك-ەكونوميكالىق جايلىلىقتىڭ بارومەترى بولىپ قالا بەرەدى. اتاپ وتەتىن تاعى ءبىر ماڭىزدى ماسەلە, قازىرگى ۋاقىتتا ەلىمىزدىڭ كەدەندىك قويمالارىندا قاجەتتى ءدارى-دارمەكتەردىڭ كوتەرمە پارتيالارى بويىنشا قۇجاتتاردى راسىمدەۋ جۇرگىزىلۋدە, ولار الداعى ۋاقىتتا ءدارىحانالاردىڭ سورەلەرىنە تۇسەدى», دەدى ول.
سونىمەن قاتار ا.تسوي ۇكىمەت 1,2 ملن پتر-تەست تەست ساتىپ الۋ ءۇشىن 1 ملرد تەڭگە بولىنگەنىن مالىمدەدى.
«ەلدە وكپەنى كومپيۋتەرلىك توموگرافيادان وتكىزۋ جاعىنان كەزەكتەر پايدا بولدى. بۇگىنگى تاڭدا قازاقستاندا 135 توموگراف بار. پنەۆمونيانى سونىمەن بىرگە ارزانىراق ءارى قولجەتىمدى تسيفرلى رەنگتگەن اپپاراتتار ارقىلى انىقتاۋعا بولادى. دياگنوستيكانىڭ بۇل ادىستەمەسى COVID-2019 بويىنشا ەم-دوم كلينيكالىق حاتتاماسىنا ەنگىزىلەدى. نارىقتا وتاندىق وندىرۋشىلەر دە شىعارعان بىرنەشە دياگنوستيكالىق تەست بار. ۇكىمەت 1,2 ملن تەست ساتىپ الۋ ءۇشىن 1 ملرد تەڭگە ءبولدى. تەستتەر قورى ءاردايىم تولىعىپ وتىرادى. قازاقستاندا قازىرگى تاڭدا 46 دياگنوستيكالىق زەرتحانا بار. نۇر-سۇلتان قالاسىندا كۇنىنە 10 مىڭ تەست جۇرگىزۋگە بولادى. زەرتحانالاردىڭ قۋاتىن ارتتىرۋ ماقساتىندا تامىز ايىنىڭ سوڭىنا دەيىن تاعى 20 پتر-اناليزاتور ساتىپ الۋ جوسپارلانىپ وتىر», دەدى مينيستر.
ءمينيستردىڭ ايتۋىنشا, امبۋلاتورلىق-ەمحانالىق كومەك كورسەتۋ قاشىقتان جۇمىس ىستەۋ فورماتىنا كوشىرىلەدى. وسىلايشا ۋچاسكەلەر دەڭگەيىندە شامامەن 3 مىڭ ءموبيلدى بريگادا قۇرۋ جوسپارلانۋدا. ولار مەديتسينالىق قىزمەتكەرلەردىڭ پاتسيەنتتەرگە ۇيگە بارۋىن, COVID-19-عا تەست الۋىن قامتاماسىز ەتەدى. ەمدەلۋشىلەرگە كەڭەس بەرىپ, ەم تاعايىندايدى, ەڭبەككە ۋاقىتشا جارامسىزدىق پاراعىن راسىمدەيدى, سونداي-اق پاتسيەنتتىڭ جاعدايىنا قاشىقتان مونيتورينگ جاسايدى.
«بۇل ۆيرۋستىڭ اعىمىنىڭ ەرەكشەلىكتەرى پاتسيەنتتەر ءجيى ستاتسيونارلىق ەمدەۋدى جانە تىنىس الۋدى جاساندى قولداۋدى قاجەت ەتەدى. بۇگىندە ەل بويىنشا ادامدار جاتقان ستاتسيونارلىق توسەك-ورىن سانى 60%-دى قۇرايدى, نۇر-سۇلتان, الماتى قالالارىندا ول 90%-عا جەتتى. ەل بويىنشا 348 مەديتسينالىق ۇيىمدا COVID-19 بار پاتسيەنتتەردى ەمدەۋ ءۇشىن 26 مىڭ توسەك-ورنى ۇيىمداستىرىلعان, تامىز ايىنىڭ سوڭىنا دەيىن ستاتسيونارلاردا قوسىمشا 10 مىڭ توسەك-ورنىن اشۋ جوسپارلانۋدا. ولاردىڭ قۇرىلىمىندا جابدىقتالعان رەانيماتسيالىق بولىمدەر مەن ءوجج اپپاراتتارى بار قارقىندى تەراپيا پالاتالارى بولادى. قولدانىستاعى ءوجج اپپاراتتارىنىڭ جالپى سانى 3294 بىرلىكتى قۇرايدى, سوڭعى اي ىشىندە 978 اپپارات ساتىپ الىندى. قوسىمشا 1 مىڭعا جۋىق ءوجج اپپاراتىن ساتىپ الۋ جوسپارلانۋدا. ايتا كەتەتىن تاعى ءبىر جايت, كوز جۇمعان ادامداردى جەرلەۋ ءتارتىبى ماڭىزدى بولىپ وتىر. قازىرگى تارتىپكە وزگەرىستەر ەنگىزىلدى: ەندى قايتىس بولعان ادامدى سانيتارلىق-ەپيدەميالىق جانە گيگيەنالىق نورمالاردى ساقتاي وتىرىپ, كەز كەلگەن زيراتقا جەرلەۋگە بولادى», دەدى ا.تسوي.
سونداي-اق ول حالىق اراسىندا ينفەكتسيانىڭ وسۋىنە قاراماستان, ۇكىمەتتە قالىپتاسقان جاعدايدان جوسپارلى تۇردە شىعۋ بويىنشا ناقتى كوزقاراس بار ەكەنىن جانە COVID-19 بويىنشا جاعدايدى تۇراقتاندىرۋدىڭ شۇعىل شارالارىنىڭ ەگجەي-تەگجەيلى جوسپارى جاسالعانىن اتاپ ءوتتى.
«مەن وسى رەتتە مەديتسينا قىزمەتكەرلەرىنىڭ جانقيارلىق ەڭبەگىن اتاپ وتكىم كەلەدى. وسىنداي قيىن ۋاقىتتا, ءوز وتباسىلارى مەن جاقىندارىن قالدىرىپ, ولار ءوز دەنساۋلىعى ءۇشىن قاۋىپتى جاعدايدا ەمدەلۋشىلەرگە مەديتسينالىق كومەك كورسەتۋدى جالعاستىرۋدا. بۇل كاسىپ جانقيارلىق پەن ادالدىقتى تالاپ ەتەتىن كۇردەلى ءھام قاۋىپتى جۇمىس. وسىعان بايلانىستى, سىزدەردەن بىزبەن تىعىز قارىم-قاتىناس جاساپ, مەديتسينا قىزمەتكەرلەرىنىڭ قيىن ەڭبەگىنە قولداۋ كورسەتۋلەرىڭىزدى سۇرايمىز», دەدى ا.تسوي.