«قايرات» فۋتزال كلۋبىنىڭ برازيليالىق باس باپكەرى پاۋلو ريكاردو فيگەيرا سيلۆا الداعى ماۋسىمدا دا الماتى كومانداسىن جاتتىقتىراتىن بولدى.
جانكۇيەرلەرگە كاكا ەسىمىمەن تانىمال 43 جاستاعى برازيليالىق مامان «قايرات» كومانداسىن 2018 جىلدىڭ ساۋىرىنەن بەرى جاتتىقتىرىپ كەلەدى. اتاقتى باپكەر ەكى جىلدىڭ ىشىندە الماتى كلۋبىمەن ءبىرتالاي جەتىستىككە جەتتى. اتاپ ايتار بولساق, وتكەن ماۋسىمدا قازاقستان چەمپيوناتى مەن قازاقستان كۋبوگىندا توپ جاردى. سونىمەن قاتار 2018-2019 جىلى چەمپيوندار ليگاسىنىڭ ءفيناليسى جانە ۋەفا كۋبوگىنىڭ كۇمىس جۇلدەسىن ولجالادى. كوروناۆيرۋس پاندەمياسىنا بايلانىستى ۋاقىتشا توقتاتىلعان بيىلعى ەل چەمپيوناتىندا دا «قايرات» ءبىرىنشى ورىندا كەلەدى.
برازيليا جانە ازەربايجاننىڭ ازاماتتىعىن العان كاكا بۇعان دەيىن 2010-2012 جىلدارى ازەربايجاننىڭ «نەفتچي», 2012-2018 جىل ارالىعىندا رەسەيدىڭ «گازپروم-يۋگرا» كومانداسىن جاتتىقتىرعان. قازىرگى تاڭدا «قايرات» كلۋبىمەن بىرگە فۋتزالدان قازاقستان ۇلتتىق قۇراماسىن دا باپتايدى.