بارشانىڭ قوزعالىسىن شەكتەگەن كارانتين اتىراۋدا 8 ماۋسىمعا دەيىن سوزىلعان ەدى. الايدا, ەندى كارانتيندى 1 ماۋسىمدا ساعات 00:00-دە مەرزىمىنەن بۇرىن الىپ تاستاۋعا ۇيعارىم جاسالىپ وتىر. وسىعان وراي وبلىستىڭ باس مەملەكەتتىك سانيتارلىق دارىگەرى تەمىربەك مۇساعاليەۆ ارنايى قاۋلىعا قول قويدى. ول بۇل قاۋلىعا قول قوياردا سوڭعى جەتى كۇندە اتىراۋ وبلىسىنىڭ تۇرعىندارى اراسىندا كوروناۆيرۋس ينفەكتسياسىنىڭ 7 پايىزدان تومەن تىركەلۋىن نەگىزگە الىپتى.
اتالعان قاۋلىعا سايكەس اتىراۋ وبلىسى اۋماعىندا جانە اتىراۋ قالاسىندا شەكتەۋ شارالارى ساقتالا بەرەدى. سونداي-اق, ماقات اۋدانىنىڭ ماقات پوسەلكەسىندە, جىلىوي اۋدانى مەن تەڭىز كەنىشىندە, «تەڭىزشەۆرويل» كومپانياسىنىڭ ۆاحتالىق پوسەلكەلەرىندە جانە مەردىگەر كومپانيالاردا ەپيدەميولوگيالىق جاعداي تولىق تۇراقتانعا دەيىن سوزىلادى.
ءدال وسى كۇنى, ياعني 1 ماۋسىمدا اتىراۋ قالاسىنىڭ ءتورت باعىتىنا قويىلعان بلوك-پوستتار الىنىپ تاستالادى. ال, ازاماتتارعا الەۋمەتتىك قاشىقتىقتى 1,5-2 مەترگە دەيىن ساقتاپ, ماسكانى تاعىپ ءجۇرۋ مىندەتتەلە وتىرىپ, تۇرعىلىقتى جەرىنەن شىعۋعا جانە قوزعالۋعا رۇقسات بەرىلىپ وتىر.
الايدا, اۋقىمدى دۋماندى, سپورتتىق, وزگە دە بۇقارالىق, سونىمەن بىرگە, وتباسىلىق, ەسكە الۋ شارالارىن, سونىڭ ىشىندە ۇيدە وتكىزۋگە سالىنعان تيىم كۇشىن جويعان جوق. سونداي-اق, تۇنگى كوڭىل كوتەرۋ ورىندارىنىڭ قىزمەتىنە, كاليان, ادام كوپ شوعىرلاناتىن وزگە نىسانداردىڭ جۇمىسىنا ءالى دە رۇقسات بەرىلمەدى.