ءار سەكتور قاجەتتى قۇرالدارمەن جابدىقتالعان, كەلۋشىلەر ەلەكتروندىق ۇكىمەت پورتالى مەن باسقا دا مەملەكەتتىك رەسۋرستارعا كىرە الادى. مەكەنجايىڭىزعا جاقىن ورنالاسقان سەكتورلاردى 2gis باعدارلاماسى ارقىلى تابۋعا بولادى.
بۇل قىزمەت ءتۇرى «ازاماتتارعا ارنالعان ۇكىمەتتىڭ» شىمكەنت فيليالىنىڭ, قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ شىمكەنت قالاسىنداعى دەپارتامەنتى وكىلدەرىنىڭ جانە 2gis ماماندارىنىڭ بىرلەسكەن جۇمىسىنىڭ ارقاسىندا جۇزەگە استى.
ەلىمىزدە تج ءتارتىبى الىنىپ تاستالعالى حقو-دا قىزمەت كورسەتۋ ءتارتىبى وزگەردى.
بۇگىنگى تاڭدا حالىققا قىزمەت كورسەتۋ ورتالىقتارىنان ەلەكتروندىق فورماتتا قولجەتىمسىز «قاعاز» قىزمەتتەردى جانە egov.kz پورتالىندا الدىن الا راسىمدەلگەن دايىن قۇجاتتاردى عانا الۋعا بولادى. قازاقستاندا مەملەكەتتىك قىزمەتتەردىڭ 80%-دان استامىن ەلەكتروندى فورماتتا الۋعا بولادى.ولاردىڭ بارلىعى egov.kz پورتالىندا قولجەتىمدى.
«ەندى ازاماتتار مەملەكەتتىك قىزمەتتەردى ۇيدەن شىقپاي-اق نەمەسە حقو عيماراتتارىنان وزگە اكىمدىكتەر جانىنداعى فرونت - كەڭسەلەردە, وقۋ ورىندارىندا جانە مەديتسينالىق ۇيىمداردا ورنالاساتىن وزىنە-ءوزى قىزمەت كورسەتۋ سەكتورلارىندا ءوز بەتىنشە الۋعا بولادى», - دەدى شىمكەنت قالاسى بويىنشا «ازاماتتارعا ارنالعان ۇكىمەت» مك كەاق فيليالىنىڭ ديرەكتورى دانابەك يسابەكوۆ.
ەلەكتروندىق ۇكىمەت بۇرىشتارىندا ەتسق نەمەسە ءبىر رەتتىك ءپارولدى قولدانا وتىرىپ, ءارتۇرلى ەلەكتروندى انىقتامالاردى الۋعا, نەكەنى تىركەۋ ءۇشىن ءوتىنىش بەرۋگە, بالانى بالاباقشا كەزەگىنە قويۋعا, زاڭدى تۇلعا رەتىندە مەملەكەتتىك تىركەۋدەن (قايتا تىركەۋدەن) وتۋگە, اۆتوكولىكتى تىركەپ, جۇرگىزۋشى كۋالىگىن اۋىستىرۋعا, مەملەكەتتىك باجدى تولەۋگە جانە تاعى باسقا قىزمەتتەردى الۋعا بولادى.
شىمكەنت