الداعى 5-10 جىلدا كومپانيا قىزمەتكەرلەرىنىڭ 50%-ى قاشىقتان جۇمىس ىستەيدى. بۇل تۋرالى مارك تسۋكەربەرگ Facebook پاراقشاسىندا حابارلادى.
العاشقى كەزەڭدە كومپانيا قاشىقتان جۇمىسقا قىزمەتكەرلەردى Facebook كەڭسەسى جوق اقش قالالارىنان قابىلدايدى. جۇمىسقا جاڭادان كىرگەن قىزمەتكەرلەرگە كوماندا باسشىسىنىڭ رۇقساتىمەن ۇيدەن جۇمىس ىستەۋ ۇسىنىلادى. قازىرگى تاڭدا Facebook-ءتىڭ جۇمىس ىستەپ جۇرگەن قىزمەتكەرلەرى پاندەميا اياقتالعاننان كەيىن قاشىقتان جۇمىس فورماتىنا كوشە الادى. بىراق ول جۇمىس ساپاسىنىڭ كورسەتكىشتەرىنە بايلانىستى بولماق.
الدىمەن كومپانيا ۇنەمى ۇيدەن جۇمىس ىستەۋگە رۇقسات بەرەدى. ەگەر ولار كوشكىسى كەلسە, وندا ول تۋرالى 2021 جىلدىڭ 1 قاڭتارىنا دەيىن حابارلاۋى ءتيىس.
«جاڭا تۇرعىلىقتى جەرىنە بايلانىستى قىزمەتكەرلەردىڭ جالاقىسى مەن وتەماقىلارى وزگەرۋى مۇمكىن — بۇل سالىق جانە ەسەپ ءۇشىن قاجەت», دەپ ءتۇسىندىردى Facebook باسشىسى.
كومپانيا باسشىسى قىزمەتكەرلەر كوشۋ تۋرالى شەشىمدەرىن جاسىرعان جاعدايدا سوڭى جاقسىلىققا اپارمايتىنىن ەسكەرتتى.
سونداي-اق كومپانيا قاشىقتان جۇمىس ىستەيتىن جاڭا قىزمەتكەرلەردىڭ قاتارىن كوبەيتۋدى جوسپارلاپ وتىر. مۇنداي جۇمىس ورىندارىن قۇرۋ تۋعان قالاسىنان جۇمىس ءۇشىن كوشكىسى كەلمەيتىن تالانتتاردى تارتۋعا مۇمكىندىك بەرمەك.
قازىر Facebook قىزمەتكەرلەرىنىڭ 95%-ى قاشىقتان جۇمىس ىستەيدى. كومپانيادا جۇرگىزىلگەن ساۋالناما بويىنشا, 50% قىزمەتكەر «ۇيىندە دە جۇمىستاعىداي بەلسەندى جۇمىس ىستەيتىنىن» ايتقان. ساۋالناماعا قاتىسقانداردىڭ 75%-ى قاشىقتان جۇمىس فورماتىنا اۋىسسا, تۇرعىلىقتى جەرىن اۋىستىرۋعا دايىن ەكەنىن ايتتى. ستاتيستيكا دەرەكتەرى بويىنشا 2019 جىلى Facebook-تە 44,9 مىڭ ادام جۇمىس ىستەدى.