اتىراۋ وبلىسىنىڭ اكىمى ماحامبەت دوسمۇحامبەتوۆ تەڭىز كەنىشىندەگى احۋالمەن تانىسىپ, شۇعىل جيىن وتكىزدى.
– اتىراۋ وبلىسىندا جاعداي تۇراقتانعانىمەن, تەڭىز كەنىشىندەگى احۋال ءالى دە الاڭداتىپ وتىر, - دەپ ءمالىم ەتتى ايماق باسشىسى ماحامبەت دوسمۇحامبەتوۆ. – قازىرگى كەزدە تەڭىز كەنىشىندە ورنالاسقان 25 جاتاقحانادا تۇراتىن 42 مەكەمەنىڭ 709 جۇمىسشىسىنان COVID-19 ينفەكتسياسى انىقتالدى. 20 مامىرداعى مالىمەت بويىنشا, 615 ناۋقاستىڭ 594-ءى ستاتسيونارعا جاتقىزىلدى. جاعداي ءالى دە كۇردەلى كۇيىندە قالىپ وتىر.
جيىن بارىسىندا وبلىس اكىمدىگى تاراپىنان قۇرىلعان ارنايى شتابتىڭ اتقارۋشى باسشىسى اسلان بەكجانوۆ, جىلىوي اۋدانىنىڭ باس سانيتارلىق دارىگەرى تالعات حابيبۋللين, دەنساۋلىق ساقتاۋ مينيسترلىگى كوميتەت توراعاسىنىڭ ورىنباسارى نۇرحان سادۋاقاسوۆ, «تەڭىزشەۆرويل» جشس ءوندىرىس وپەراتسيالارى جونىندەگى مەنەدجەرى گارري ەنك قالىپتاسقان جاعداي تۋرالى باياندادى.
جيىندى قورىتىندىلعان وبلىس اكىمى ماحامبەت دوسمۇحامبەتوۆ تەڭىز قالاشىعىنداعى وبلىستىق شتاب فيليالى مەن «تەڭىزشەۆرويل» كومپانياسىنىڭ باسشىلارىنا ناقتى تاپسىرمالار بەردى. اتاپ ايتقاندا, كارانتينگە جابىلعان ۆاحتالىق قالاشىقتارعا قاتاڭ باقىلاۋ جاساۋ, سانيتارلىق-دەزينفەكتسيالىق رەجيمدى باقىلاۋ, تۇسىندىرمە جۇمىستارىن بارىنشا ارتتىرۋ, پروۆيزورلىق ستاتسيوناردى مەديتسينالىق ماماندارمەن قامتاماسىز ەتۋدى جەدەلدەتۋ بار.
سونداي-اق «تەڭىزشەۆرويل» كومپانياسىنا مەردىگەر مەكەمەلەرمەن بىرلەسە جۇمىس مەرزىمى اياقتالعان قىزمەتكەرلەردى تەڭىز كەنىشىنەن كەلىسىلگەن تالاپتارعا سايكەس شىعارۋ جوسپارىن ازىرلەۋدى جۇكتەدى.