باتىس قازاقستان وبلىسىنداعى ءبورلى اۋداندىق تاۋارلار مەن كورسەتىلگەن قىزمەتتەر ساپاسى مەن قاۋىپسىزدىگىن باقىلاۋ باسقارماسىنىڭ لاۋازىمدى قىزمەتكەرى جەكە تۇلعادان زاڭسىز سىيلىق العانى انىقتالدى.
جاقىندا باتىس قازاقستان وبلىسى بويىنشا سىبايلاس جەمقورلىققا قارسى قىزمەت باسشىسى رۋستام اقمىرزاەۆ ءبورلى اۋداندىق تاۋارلار مەن كورسەتىلگەن قىزمەتتەر ساپاسى مەن قاۋىپسىزدىگىن باقىلاۋ باسقارماسىنىڭ لاۋازىمدى تۇلعاسىنا قاتىستى قىلمىستىق ءىس بويىنشا ەنگىزىلگەن ۇسىنىستى قارادى. ول قىزمەتكەر جاڭا جىل قارساڭىندا جەكە تۇلعادان كامپيت, تورت تۇرىندە ءتاتتى سىيلىق جانە ىشىندە نە بارى بەلگىسىز كونۆەرت العان. «قىزمەتكەر سىياقىدان باس تارتپاعان, وسىلايشا جەكە تۇلعا تاراپىنان زاڭسىز ارەكەت جاساۋعا جاعداي تۋدىرعان», - دەيدى انتيكور ماماندارى.
قىلمىستىق ءىستى تەرگەۋ بارىسىندا الگى قىزمەتكەردىڭ بيزنەس وكىلىمەن قىزمەتتەن تىس بايلانىسى دا بايقالعان. ياعني قىزمەتكەر مەن كاسىپكەر كەزدەسىپ, ءوزارا قاعازعا جازىپ سويلەسىپتى. «بۇل كاسىپكەردىڭ بيزنەس قىزمەتىن جانداندىرۋ ءۇشىن مۇددەسىن قورعايتىنداي ارەكەت بولۋى مۇمكىن», - دەيدى تەرگەۋشىلەر.
ارينە, ناقتى دالەلدەر بولماعاندىقتان قىلمىستىق ءىس توقتاتىلدى. الايدا لاۋازىمدى تۇلعانىڭ ءىس-ارەكەتىندە ءوزىنىڭ قىزمەتتىك جاعدايىن پايدالانۋ بەلگىلەرى بايقالىپ تۇر.
- مەكەمە باسشىلىعى تاراپىنان باعىنىستى قىزمەتكەرلەرىنە سىبايلاس جەمقورلىقتىڭ الدىن الۋ بويىنشا ءتيىستى دەڭگەيدە باقىلاۋدىڭ جوقتىعى, اكىمشىلىك عيماراتىندا كەلۋشىلەر مەن قىزمەتكەرلەردىڭ ەركىن كەزدەسۋى, بايلانىسا الۋى, سونداي-اق كەلۋشىلەردىڭ كۇماندى زاتتارمەن وتكىزبەۋگە جاۋاپتى تۇلعانىڭ ءوز قىزمەتىن ورىنداماۋى جوعارىدا كورسەتىلگەن فاكتىلەردى جاساۋعا جول بەرگەن, - دەيدى رۋستام اقمىرزاەۆ.
وسىلايشا ءبورلى اۋداندىق تاۋارلار مەن كورسەتىلگەن قىزمەتتەر ساپاسى مەن قاۋىپسىزدىگىن باقىلاۋ باسقارماسىندا سىبايلاس جەمقورلىقتىڭ الدىن الۋ جۇمىستارى جەتكىلىكسىز دەپ تانىلدى. كەلەڭسىز جاعدايدا كوزگە ءتۇسىپ, مەملەكەتتىك قىزمەتكە كىر كەلتىرگەن قىزمەتكەردى جۇمىستان بوساتۋ, ال ونىڭ باسشىسىن تارتىپتىك جاۋاپكەرشىلىككە تارتۋ ۇسىنىلدى.
باتىس قازاقستان