«قامقور» ەرىكتىلەر كلۋبىنىڭ وكىلدەرى پوليتسەيلەرمەن بىرگە حالىققا وڭاي ولجا ىزدەۋشىلەردىڭ قىلمىستىق ءادىس-تاسىلدەرى تۋرالى ەسكەرتەتىن جادىنامالار تاراتتى.
«قىلمىسكەر الەمنىڭ كەز-كەلگەن تۇكپىرىندە وتىرىپ, ارام ويىن جۇزەگە اسىرا الادى. اڭقاۋ سولتۇستىكقازاقستاندىقتار الاياقتاردىڭ قۇرىعىنا وLX, Kolesa.kz سايتتارىندا ورنالاستىرىلعان جالعان حابارلاندىرۋلار, الەۋمەتتىك جەلىلەردەگى جالعان پاراقشالار ارقىلى ءتۇسىپ جاتادى, قاسكويلەر وزدەرىن ساتىپ الۋشىمىن دەپ تانىستىرىپ, ساتىلۋعا ءتيىستى زات ءۇشىن الدىن الا تولەم جاساۋ ءۇشىن بانك كارتالارىنىڭ نومەرىن سۇرايدى», – دەيدى سقو پوليتسيا دەپارتامەنتى كريمينالدىق پوليتسيا باسقارماسىنىڭ اعا جەدەل ۋاكىلى پوليتسيا كاپيتانى ۆيتالي پودچەرنين.
بۇدان كەيىن قاسكوي ساتۋشىعا حابارلاسىپ, تەلەفونىنا بانكىدەن اقشانىڭ تۇسكەنىن بىلدىرەتىن كودى بار SMS-حابارلاما كەلەتىنىن جانە اقشا ەسەپشوتقا ءتۇسۋ ءۇشىن ونىڭ نومەرىن راستاۋ كەرەكتىگىن ايتادى. مۇندايدا كەيدە الاياق ءوزىن بانكتىڭ قاۋىپسىزدىك قىزمەتىنىڭ قىزمەتكەرىمىن دەپ تانىستىرىپ, بىرەۋلەر ءسىزدىڭ ەسەپشوتىڭىزعا تۇسكەلى تۇر, ونى بۇعاتتاۋ ءۇشىن SMS-حابارلامانى راستاڭىز دەپ الدايدى ەكەن. بۇل SMS-حابارلامانى باسقان بولساڭىز ول ءسىزدىڭ ەسەپشوتىڭىزدان اقشا ۇرلاي الاتىن كورىنەدى.
كريمينالدىق پوليتسيا باسقارماسىنىڭ باستىعى, پوليتسيا پولكوۆنيگى پەتر كليموۆتىڭ ايتۋىنا قاراعاندا الاياقتىڭ قۇربانىنا اينالماس ءۇشىن ەڭ باستىسى ساق بولۋ قاجەت, ينتەرنەتتە قارجى وپەراتسيالارىن جۇزەگە اسىرعان كەزدە اسىعىستىق تانىتپاي, ءار قادامدى وي ەلەگىنەن وتكىزگەن ءجون.
ينتەرنەت-الاياقتىڭ قۇرىعىنا ءتۇسىپ قالعان جاعدايدا دەرەۋ پوليتسياعا حابارلاسۋ قاجەت. جىل باسىنان بەرى سقو-دا ينتەرنەت-الاياقتىقتىڭ 145 فاكتىسى تىركەلدى.
سولتۇستىك قازاقستان وبلىسى