الماتى وبلىسى: كوكسۋ قانت زاۋىتىنىڭ جۇمىسى جاندانادى

بيىل زاۋىتتاردىڭ مۇمكىندىگىن ودان ءارى ارتتىرىپ, دايىن ءونىم كولەمىن 58 000 تونناعا دەيىن جەتكىزۋ جوسپاردا تۇر. قانت وندىرىسىنە قاجەتتى ءتاتتى ءتۇبىر ەگىستىگىنىڭ كولەمى دە كوبەيىپ, 16 100 گەكتاردى قۇرادى.

قازىر زاۋىتتاردى جاڭا جۇمىس ماۋسىمىنا دايىنداۋ ءجۇرىپ جاتىر. ماسەلەن, كوكسۋ قانت زاۋىتىنداعى جاڭعىرتۋ جۇمىسى 20-ساۋىردە باستالىپتى. ءوندىرىستىڭ 8 تسەحىندا 170 ادام وڭدەۋ جەلىسىنىڭ نەگىزگى توراپتارىنا اعىمداعى جوندەۋ مەن قالپىنا كەلتىرۋ جۇمىستارىنا قىزۋ كىرىسكەن ەكەن. بارلىق شارۋا قىركۇيەك ايىنا دەيىن تولىقتاي تياناقتالىپ, زاۋىت بيىلعى ءتاتتى ءتۇبىر ءونىمىن قابىلداۋعا ساقاداي-ساي بولماقشى.

- جالپى قانت قىزىلشاسىن قابىلداۋ پۋنكتتەرى مەن زاۋىتتىڭ ىشكى جوندەۋ جۇمىسى 15 قىركۇيەككە دەيىن اياقتالۋى ءتيىس. ول ءۇشىن قارجىلىق مۇمكىندىكتەر دە, ەڭبەك رەسۋرستارى دا جەتكىلىكتى. قازىر 170 ادام جۇمىسپەن قامتىلدى. ولار وندىرىستىك توراپتاردى اعىمداعى جوندەۋدەن وتكىزەدى. سول سياقتى وسى ماۋسىمدا زاۋىت قامىستان قانت وڭدەيتىن جاڭا جەلىنىڭ قۇرىلىسىن اياقتاپ, ىسكە قوسپاق, - دەيدى كوكسۋ قانت زاۋىتىنىڭ ديرەكتورى التىنبەك اباتوۆ.

ايتپاقشى, وتكەن جىلى وسى كوكسۋ قانت زاۋىتىن 260 000 توننا شيكىزات وڭدەپ, 32 مىڭ توننا قانت العان. ال بيىل وڭدەيتىن قىزىلشا كولەمىن 285 مىڭ تونناعا دەيىن ارتتىرىپ, تازا قانت ءوندىرىسىن 38 مىڭ تونناعا جەتكىزۋدى ماقسات ەتىپ وتىر.