الەمدى ابىگەرگە سالعان كوروناۆيرۋس ىندەتىنىڭ الدىن الۋ ماقساتىندا ەلىمىزدىڭ ءاربىر وڭىرىندە ءتيىستى شارۋالار قولعا الىنىپ, بىرقاتار شارالار قابىلدانعان بولاتىن.
قاراپايىم حالىقتى قاۋىپتى ىندەتتەن قۇتقارۋ, ولاردى قولداۋ ماقساتىندا كوپشىلىك قولدان كەلگەن كومەكتەرىن دە ۇيىمداستىرعان ەدى. ءتىپتى جومارت جانداردىڭ قولداۋىمەن كارانتين كەزىندە كوپشىلىككە ازىق-ت ۇلىك تاراتىلىپ, تۇرعىندار قاجەتتى تاۋارلارمەن دە قامتىلۋدا. مۇنىڭ ءبارى دە حالقىمىزدىڭ قايىرىمدىلىق قاعيداتتارىنا بەرىك, كومەك قولىن سوزۋعا بەيىم ەكەنىن كورسەتەدى.
كوپشىلىكتى كوروناۆيرۋس ىندەتىنەن قورعاۋ جۇمىسىنا تارازدىق قىز-كەلىنشەكتەر دە وزىندىك ۇلەسىن قوسقان بولاتىن. تارازدىق 30 قىز-كەلىنشەك مەديتسينالىق ماسكا تىگۋگە تەگىن اتسالىسىپ, ناتيجەسىندە ولار 10 مىڭعا جۋىق بەتپەردە تىككەن. ولار قالا تۇرعىندارىنا تەگىن تاراتىلىپ بەرىلگەن ەدى. بۇل سىناق تا حالقىمىزدىڭ ءاردايىم بىرلىكتە ەكەنىن كورسەتتى. قىز-كەلىنشەكتەردىڭ بۇل باستاماسىن كونە شاھار تۇرعىندارى دا قۋانا قولداعان بولاتىن. ەڭبەك ەسكەرىلىپ, تاراز قالاسىنىڭ اكىمى ايتقازى قارابالاەۆ قالانىڭ قوعامدىق ومىرىنە بەلسەنە ارالاسىپ, توتەنشە جاعداي كەزىندە تەگىن مەديتسينالىق ماسكا تىگۋگە اتسالىسقان ارۋلارعا العىس ءبىلدىردى. اكىمنىڭ العىس حاتىن قالالىق ىشكى ساياسات ءبولىمىنىڭ باسشىسى ۇلانا سلامبەكوۆا ءاربىر قىز-كەلىنشەكتىڭ ۇيىنە بارىپ, تابىستادى. ال تارازدىق نازىك جاندىلار قالا اكىمىنە ريزاشىلىعىن بىلدىرە كەلىپ, وسىنداي قيىن كەزەڭدە كوپشىلىككە قولدان كەلگەن كومەگىن بەرۋ ءاربىر ازاماتتىڭ بورىشى ەكەنىن جەتكىزدى.
جامبىل وبلىسى