اراقتىڭ قىزۋىنا بۋلانعان پەتروپاۆل قالاسىنىڭ 43 جاسار تۇرعىنى اكە-شەشەسىنىڭ ۇيىنە كەلسە, ەكەۋى دە ءوز شارۋالارىمەن شىعىپ كەتكەن ەكەن. ەسىرىك بۋعان ەركەك باسىنا باسقا دۇنيە كەلمەي, پوليتسياعا حابارلاسىپ, ءۇيدىڭ مەكەن-جايىن ايتىپ, وسىندا ەكى ادامنىڭ ءولىپ جاتقانىن ايتادى.
مۇنداي ورەسكەل وقيعا شاعىن قالادا سيرەك بولادى. سوندىقتان ول جەرگە بىرنەشە ادامدىق تەرگەۋ توبى 2-3 ماشينامەن بارلىق دابىلدارىن سارناتىپ جەتەدى. اۋلادا جۇرگەن تۇرعىندار تۇگىلى ودان كوشەدە كەتىپ بارا جاتقان قالالىقتار دا شوشىنىپ, ۇركىپ قالادى. «ەكى بىردەي ادام ءولىپ جاتقان» ءۇيدىڭ ەسىگى بىتەۋلى بولادى. پوليتسيا ونى بۇزىپ كىرسە, ەشقانداي ءمايىت جوق, ءۇي بوس تۇر ەكەن. كورشىلەرىنەن انىقتاعاندا ءۇي يەسى ساياجايعا, ايەلى دۇكەنگە كەتكەن بولىپ شىعادى. پوليتسيا ولاردىڭ ورالۋىن توسىپ, ءتىرى بولعاندارىنا كوزدەرىن جەتكىزگەن سوڭ دابىلدىڭ جالعان ەكەندىگىن حابارلايدى.
قازىرگى زاماندا داۋىستىڭ ءدىرىلى مەن ىرعاعىنان-اق تەلەفون سوعۋشىنىڭ كىم ەكەندىگى وپ-وڭاي انىقتالادى عوي. ءسويتىپ, 43 جاستا بولسا دا اراقتىڭ الەگىمەن اقىماقتىق قىلعان ەركەك قولعا تۇسەدى. «ەندى وعان 80 مىڭ تەڭگەگە دەيىن ايىپپۇل سالىنۋى مۇمكىن. قازىر ءىستىڭ ماتەريالدارى سوتقا دايىندالۋدا», دەيدى قالالىق پوليتسيانىڭ ءبىرىنشى ءبولىمىنىڭ باستىعى, پودپولكوۆنيك بالابەك جاحين.
جىل باسىنان بەرى پەتروپاۆلدا ارناۋلى قىزمەتتەرگە وسىنداي 95 جالعان دابىل تۇسكەن ەكەن. ولاردىڭ كوبى انىقتالىپ, 30 اەك كولەمىندە ايىپپۇل تولەگەن.
پەتروپاۆل