«زامانىڭ تۇلكى بولسا – تازى بوپ شال» دەمەكشى سولتۇستىك قازاقستان وبلىسىنداعى ەرىك اسقاروۆ اتىنداعى اقىندار مەكتەبى ۇمىتكەرلەردىڭ شابىتى سۋىپ قالماس ءۇشىن كارانتيندىك جاعدايعا بەيىمدەلگەن ايتىستىڭ جاڭا فورماتىن ويلاپ تاۋىپتى. ول - تەلەۆيزيالىق اقىندار ايتىسى.
«قىزىلجار الامانى» دەگەن اتاۋ العان بۇل ايتىسقا ەكى اقىن عانا قاتىسىپ, كورەرمەندەردىڭ قولداۋىنسىز ءوتىپ, سارى كۇزگە دەيىن جالعاسپاقشى. ونى ۇيىمداستىرىپ جۇرگەن جارقىن جۇپارحاننىڭ ايتۋىنا قاراعاندا قازىردىڭ وزىندە 14 جۇپ دايىندالعان. ء«بىز سونىڭ ىشىندە سەگىز جۇپتى فينالدىق كەزەڭدە ايتىستىرامىز. وعان قازىلار القاسىنىڭ تاراپىنان كوپ داۋىس العاندار وتەتىن بولادى», دەدى ول.
بۇگىن العاشقى جۇپ ءۇش ادامنان تۇراتىن قازىلار القاسىنىڭ الدىندا وزدەرىنىڭ ونەرلەرىن كورسەتتى. ولاردىڭ ءبىرى – جانتىلەۋ راحىموۆ اسكەري قىزمەتشى, تالاي الامانعا قاتىسقان تىسقاققان اقىن. ال ونىڭ قارسىلاسى دياس اياعان بولسا بيىل عانا مەكتەپ بىتىرگەلى وتىرعان ونەرپاز جەتكىنشەك. بىراق ول ازۋلى اعاسىنان ءبىر مىسقال دا كەم تۇسپەي, بارلىق قىرىنان تەڭ كوسىلدى. ەكى اقىن دا قىزىلجار ءوڭىرىنىڭ ءتول تۋمالارى. اتى جامان ىندەتتى دە شارپىپ وتكەن ولاردىڭ قامتىعان تاقىرىپتارى دا كەڭ قۇلاشتى بولدى. سونىڭ ىشىندە ابايدىڭ 175 جىلدىعى مەن ءسابيت مۇقانوۆتىڭ 120 جىلدىعىنىڭ تويلانۋى, ەل مەن جەر ماسەلەلەرى, قىزىلجار اتاۋىنىڭ قالپىنا كەلۋى, ماقتارال پروبلەماسى ءبارى-ءبىرى نازاردان تىس قالمادى. ويلارى ۇتىمدى, سوزدەرى باپتى اقىندار ءتورت اياعى تەڭ تۇسكەن حاس شەبەرلەردەن كەم تۇسپەدى.
از ۋاقىتتا سولتۇستىكتە وسىنداي اقىنداردىڭ ءوسىپ شىققانىنا, شىنىمىزدى ايتساق, تاڭىرقاۋمەن عانا قاراپ وتىردىق. «ات اۋناعان جەردە تۇك قالار» دەگەن سول ەكەن-اۋ. ءبىر كەزدە مۇندا اقىن شىقپايدى, حالقىنىڭ نەگىزگى بولىگى ورىستىلدەستەر دەپ سىن ايتىپ جۇرگەندەردىڭ ءوزى مىنا ايتىستى كورسە تاڭ قالار ەدى. ايتىستى دامىتۋدىڭ كىلتىن تاۋىپ, جاتپاي-تۇرماي ۇلى ونەرگە قىزمەت قىلىپ جۇرگەن جارقىن جۇپارحان باۋىرىمىزعا دا ايتار العىسىمىز شەكسىز. ونىڭ باستامالارىن قولداپ, ايتىستىڭ دامۋىنا ىقپال ءبىلدىرىپ وتىرعان وبلىس اكىمىنىڭ ورىنباسارى رۋسلان الىشەۆ پەن مادەنيەت باسقارماسىنىڭ باستىعى قۇرالبەك اتامۇراتوۆقا دا حالىقتىڭ ريزاشىلىعى شەكسىز بولارى ءسوزسىز. ايتىسقا تورەلىك بەرگەن قازىلار القاسىن جازۋشى, جۋرناليست, قوعام قايراتكەرى جاراسباي سۇلەيمەنوۆ اعامىز باستادى. وعان جەرگىلىكتى ونەرپاز, ايتىس اقىنى, ديريجەر قايروللا عافۋروۆ پەن وسى جولداردىڭ اۆتورى كومەك بەردى.
ءاربىر ايتىس وبلىستىق تەلەديداردان ارناۋلى ءبىر كۇنى حالىققا كورسەتىلىپ تۇراتىن بولىپتى. جامان ىندەتتىڭ جابىرقاتۋىمەن رۋحاني جاعىنان جۇدەپ تۇرگەن قىزىلجارلىقتار ونى كورىپ ءبىر سەرپىلىپ قالارى داۋسىز. ونەردى ورلەتۋدەگى وسىنداي ەپتىلىكتەر ارتا بەرسە – نۇر ۇستىنە نۇر بولار ەدى.
سولتۇستىك قازاقستان وبلىسى