«تانك ماكەتىنىڭ ۇزىندىعى – 30 سم, بيىكتىگى – 15 سم, ەنى – 17 سم. قالدىق ماتەريالدار, تەمىر جينادىم. دوڭگەلەكتەرى مويىنتىرەكتەن, ال تابانىنا «جيگۋلي» اۆتوكولىگىنىڭ شىنجىرىن قولداندىم. مۇناراسىنداعى قاڭىلتىر 360 گرادۋسقا بۇرىلادى. زەڭبىرەگى, تارتاتىن ارقانى, كۇرەك, اراسى, جارىقشام, باك جانە تاعى باسقا بولشەكتەرى سۋرەتتەن كورىنەدى», دەيدى ازامات سۇلەيمەنوۆ.
«ەرلىك – ەلگە مۇرا, ۇرپاققا ۇران». ەكىنشى دۇنيەجۇزىلىك سوعىستىڭ اياقتالۋىنىڭ 75 جىلدىعىنا وراي ول ءوزى جاساعان تانك جوباسىن جەرلەس باتىر ابىلقايىر ءبايمولديننىڭ رۋحىنا ارناعان ەكەن.
جاۋىنگەر ابىلقايىر بايمولدين تاقىر اۋىلىندا تۋعان. 1944 جىلدىڭ قاڭتارىندا نەۆەل قالاسىن جاۋدان قورعاپ, ەرلىكپەن قازا تاپتى. بايمولدين باسقارعان ۆزۆود قاتارىندا مانشۇك مامەتوۆا بولعان. نەۆەلدى جاۋدان بوساتقان سوڭ, ءا.بايمولدين قالا كومەندانتى بولىپ تاعايىندالادى.
ازامات باتىرعا ارناعان تانك ماكەتىن جاساۋدا ءاربىر بولشەگىنە ەرەكشە كوڭىل ءبولىپتى.
– ماڭگىلىك وت تەمىر قاڭىلتىردان 1 مم كەسىلىپ دانەكەرلەندى. وتتىڭ ءوزى دە تەمىردەن جانە بەينەسى بەيبىتشىلىك قۇسى كوگەرشىنگە ۇقساس جاسالدى, – دەيدى ول.
تانك ورنالاسقان تەمىر تۇعىردىڭ اينالاسىنداعى ماڭگىلىك وتتىڭ جانىندا ەكى قالامپىر گ ۇلى جۇقا قاڭىلتىردان, ءشوپ قاعازدان كەسىلىپ, جاسىل تۇسكە جەلىمدەلگەن. قورشاۋى شاعىن شەگەمەن دانەكەرلەنىپ, سارى جىبەك جىپپەن ىلىنگەن.
ال ازامات اۋىلداعى تاقىر نەگىزگى ءبىلىم بەرۋ مەكتەبىنىڭ تەحنولوگيا ءپانىنىڭ مۇعالىمى. ماماندىعى ينجەنەر-پەداگوگ, فيزيك-ينفورماتيك. اۋىل مەكتەبىندە 17 جىلدان بەرى قىزمەت ەتىپ كەلەدى. شاعىن جيناقتى اۋىل مەكتەبىندە 39 وقۋشى عانا قالىپتى.
توتەنشە جاعداي ۋاقىتىنا دەيىن وقۋشىلارىمەن بىرگە ءتۇرلى جوبالار قۇراستىراتىن. ولارعا دا قىزىقتى, وزدەرى دە ىزدەنىپ, ءتۇرلى بۇيىمدار, زات جاسايدى. اسكەري تەحنيكالاردىڭ ماكەتىن جاساۋ – وقۋشىلاردى مەكتەپ بىتىرگەن سوڭ, وتان قورعاۋعا, اسكەر قاتارىنا بارۋعا قىزىقتىرادى, پاتريوتتىق تاربيە بەرەدى.
جۋىردا اۋداندىق ءبىلىم ءبولىمىنىڭ قاشىقتان جاريالاعان بايقاۋى بارىسىندا ازامات سۇلەيمەنوۆتىڭ جاساعان تانك جوباسى 1-ورىن الدى.
پاۆلودار وبلىسى,
اققۋلى اۋدانى