سولتۇستىك قازاقستان وبلىسىنىڭ ەسىل اۋدانىنداعى الەكساندروۆكا سەلوسىنىڭ ماڭىندا كۇدىكتىنىڭ كولىگىنەن ۋچاسكەلىك پوليتسيا ينسپەكتورلارى اسەت توقتاباەۆ پەن سەرگەي ەمەليانوۆ 8 مامىر كۇنى ءتۇندا اتىلعان مارالدىڭ ەتىن تاپتى. وقيعا ورنىنا ەسىل اۋدانىنىڭ پب جەدەل-تەرگەۋ توبى شاقىرىلىپ, 32 جاستاعى اۋىل تۇرعىنى مەن پەتروپاۆل قالاسىنىڭ 38 جاستاعى تۇرعىنىنا قاتىستى سوتقا دەيىنگى تەرگەپ-تەكسەرۋ باستالدى. كولىكتەن پاتروندار مەن سىرا شولمەكتەرى دە تابىلعان. قازىرگى ۋاقىتتا كۇدىكتىلەر مىندەتتى كەلۋ تۋرالى قولحاتپەن جىبەرىلدى.
جىل باسىنان بەرى سولتۇستىك قازاقستان وبلىسىندا زاڭسىز اڭشىلىقتىڭ 10 فاكتىسى انىقتالدى. 200-گە جۋىق سولتۇستىكقازاقستاندىق جانۋارلار دۇنيەسىن پايدالانۋ تالاپتارى مەن اڭ اۋلاۋ قاعيدالارىن بۇزعانى ءۇشىن اكىمشىلىك جاۋاپكەرشىلىككە تارتىلدى. رەيدتىك ءىس-شارالار بارىسىندا تايىنشا اۋدانىندا دا پەتروپاۆل تۇرعىنى ۇستالىپ, ونىڭ جول تالعامايتىن كولىگىنىڭ سالونىنان ەكى جابايى قازدىڭ ەتى الىندى. وعان 5 ايلىق ەسەپتىك مولشەرىندە ايىپپۇل, سونداي-اق كەلتىرگەن شىعىن ءۇشىن 50 مىڭ تەڭگە تولەۋىنە تۋرا كەلەدى.
«قازىر وبلىس اۋماعىندا اڭ اۋلاۋعا تىيىم سالىنعان. قۇستاردى, سونداي-اق جابايى جانۋارلاردى اتۋعا بايلانىستى بارلىق ءىس-ارەكەتتەر ءۇشىن اكىمشىلىك نەمەسە قىلمىستىق جاۋاپكەرشىلىك كوزدەلگەن», - دەدى سقو پد تابيعاتتى قورعاۋ پوليتسياسى توبىنىڭ اعا ينسپەكتورى, پوليتسيا كاپيتانى اسحات قوجاباەۆ.
سولتۇستىك قازاقستان وبلىسى