قازاقستان پرەزيدەنتى پاندەمياعا قاتىستى مالىمدەمە جاسادى. ول ءوز سوزىندە حالىقتىڭ ءجۇرىپ-تۇرۋىنا قاتىستى نۇسقاۋلىقتار بەرىپ, قارىم-قاتىناستىڭ جاڭا فيلوسوفياسىن قالىپتاستىرۋ ماسەلەسىن قوزعادى.
ويتكەنى ەلىمىزدە ۆيرۋس تارالۋىنىڭ ديناميكاسى تومەن بولعانىمەن, جۇقتىرعاندار سانى ارتىپ جاتىر. تۇپتەپ كەلگەندە, ۆيرۋس تولىقتاي جوعالعان جوق. پرەزيدەنت ۆيرۋستىڭ الدىن الۋ ءۇشىن ازاماتتارىمىزعا ماسكا كيىپ, انتيسەپتيكتەر قولدانۋ كەرەكتىگىن ايتىپ, الەۋمەتتىك ارا-قاشىقتىقتىڭ ماڭىزدىلىعىن تاعى ءبىر ەسكە سالدى. بۇل, بىلاي قاراساڭىز, جاڭا مادەنيەتتى قالىپتاستىرماق. ازاماتتارىمىز تەك ءوزىنىڭ عانا ەمەس, اينالاسىنداعى ادامداردىڭ دا دەنساۋلىعىنا جاۋاپتى ەكەنىن تۇسىنەتىن كەز كەلدى.
پاندەميا ادام يندەكسىن دامىتۋ ماسەلەسىن وزەكتەندىرەدى. ەلىمىزگە تارتىلاتىن ينۆەستيتسيانىڭ دا كولەمى ازاياتىنى بەلگىلى. وسى ورايدا ينۆەستيتسيا تارتۋدىڭ جاڭا تاسىلدەرى قاراستىرىلماق. ەكونوميكانى ءارتاراپتاندىرۋدىڭ ماڭىزدى ەكەنىن نازارعا الۋ كەرەك. دۇنيەجۇزىلىك رەتسەسسيا كەزىندە ەل ەكونوميكاسىن دامىتۋ, حالىقتى جۇمىسپەن قامتۋ شارالارى قولعا الىنباق. نە دەگەنمەن, ەڭ الدىمەن, ادام ءوزىن وزگەرتۋى ءتيىس.
توتەنشە جاعداي كەزىندە كوپتەگەن شەشىمدەر حالىقتىڭ پىكىرىنە نەگىزدەلىپ قابىلداندى. بۇل دا پرەزيدەنت ايتىپ وتكەندەي, «حالىق ۇنىنە قۇلاق اساتىن مەملەكەت» تۇجىرىمداماسىنىڭ ورىندالۋىنىڭ ماڭىزدى كەزەڭىنە اينالدى.
ەرلان سايروۆ,
ۇلتتىق قوعامدىق سەنىم كەڭەسىنىڭ مۇشەسى