ددۇ اقپاراتتىق قىزمەتىنىڭ جەتەكشىسى بەرناردو ماريانو بۇگىن ءتۇس اۋا جۋرناليستەرمەن كەزدەسكەن كەزدە ۇيىم دەرتتىڭ بەلگىلەرى باعالاۋ جانە ۆيرۋس تاسىمالداۋشىلارمەن بايلانىسىن باقىلاۋ ءۇشىن قوسىمشانى ازىرلەۋدى جوسپارلاپ وتىرعانىن ايتتى.
قوسىمشا كوروناۆيرۋستىڭ تارالۋى قازىر قانداي كەزەڭدە ەكەنىن جانە بيلىك شەكتەۋ شارالارىن قاتايتۋ نەمەسە جۇمسارتۋ كەرەك ەكەنىن تۇسىنۋگە كومەكتەسىپ, وسىعان بايلانىستى قابىلدانعان شەشىمدەردى ۇيلەستىرىپ وتىرادى.
ماريانونىڭ ايتۋىنشا, دۇنيەجۇزىلىك دەنساۋلىق ساقتاۋ ۇيىمىنىڭ باستاماسى, ەڭ الدىمەن, قاجەتتى باعدارلامالىق جاساقتامانى دەربەس جاساي المايتىن مەملەكەتتەرگە كومەكتەسۋگە باعىتتالعان. «كەز كەلگەن ۇكىمەت ءبىزدىڭ قوسىمشامىزدىڭ باستاپقى كودىن قولدانا الادى, ءار ايماققا قاجەتتى فۋنكتسيالاردى قوسىپ, تۇرعىندار ءۇشىن قوسىمشانىڭ ءوز نۇسقاسىن شىعارا الادى. ونىڭ كومەگىمەن بيلىك كارانتين شارالارىن قاتايتۋ نەمەسە جۇمسارتۋ ارقىلى پاندەميا جاعدايىنا تەزىرەك جاۋاپ بەرە الادى», دەدى ماريانو.
ول ددۇ قوسىمشانى شىعارۋ مامىر ايىنىڭ سوڭىندا جوسپارلانعانىن اتاپ ءوتتى. ددۇ شىنداپ كىرىسكەن تەحنولوگيا كەم دەگەندە بەس مينۋت ءبىر-بىرىمەن جاقىننان ارالاسقان ازاماتتاردىڭ تەلەفوندار اراسىنداعى ۆيرتۋالدى «قول الماسۋعا» نەگىزدەلگەن دەپ بولجانادى. سمارتفونداردىڭ كەزدەسۋلەردى ۇيالى تەلەفوننىڭ دەرەكتەر بازاسىنىڭ ءانونيمدى جۋرنالىندا ساقتايدى, كەيىن تەست ناتيجەسى وڭ بولىپ شىققان ازاماتتار تۋرالى مالىمەتتەردى ونىمەن جاقىن بايلانىستا بولعان نەمەسە ءجيى ارالاستانىن كونتاكتىلەرگە حابارلاما جىبەرۋگە مۇمكىندىك بەرەدى.
سونداي-اق ددۇ Apple جانە Google كومپانياسىمەن بىرلەسكەن تەحنولوگيانى قولدانۋ تۋرالى كەلىسسوزدەر جۇرگىزىپ جاتىر. بۇعان دەيىن بۇل كومپانيالار دەرەكتەردىڭ انونيمدىلىگىن ساقتايتىن جۇيەنى ەنگىزەتىندەرىن ايتقان بولاتىن.
ەستەرىڭىزگە سالا كەتەيىك, ءۇندىستاندا مەملەكەتتىك جانە جەكە سەكتور ۇيىمدارىنىڭ بارلىق قىزمەتكەرلەرىنە Aarogya Setu ءموبيلدى قوسىمشاسىن سمارتفوندارعا ورناتۋ مىندەتتەلدى.
قوسىمشادا Bluetooth جانە GPS جۇيەلەرى قولدانىلادى. بۇل پايدالانۋشىنى ىقتيمال جۇقتىرعان ادامدارمەن بايلانىسۋ تۋرالى ەسكەرتەدى.