كوروناۆيرۋستىڭ سالدارىنان بۇل كۇندەرى بارلىق سپورتتىق شارالاردىڭ توقتاتىلعانى بەلگىلى. سولاردىڭ قاتارىندا دزيۋدو دا بار. ەڭ باستىسى, كۇرەستىڭ بۇل ءتۇرى بويىنشا بالۋانداردىڭ وسىعان دەيىن جيعان ۇپايلارى تولىقتاي ساقتالىپ قالادى. ەندى پاندەمياعا بايلانىستى وسى ءۇزىلىستى پايدالانا وتىرىپ, الەمدىك رەيتينگكە تاعى ءبىر كوز جۇگىرتۋ ارتىق ەتپەيدى دەپ ويلايمىز. سول ارقىلى قاي مەملەكەت وكىلدەرىنىڭ قارقىنى كۇشتى نەمەسە كىمدەردىڭ تەگەۋرىنى باياۋ ەكەنىن انىق بايقاۋعا بولادى.
اڭگىمەمىزدىڭ «القيساسىن» ءوز ورەندەرىمىزدەن باستايىق. ايدىن سماعۇلوۆ جەتەكشىلىك ەتەتىن قازاقستاننىڭ ەرلەر قۇراماسى ساپىنداعى ەكى قانداسىمىز عانا قازىرگى كەزدە الەمدىك رەيتينگتە «توپ-10» دزيۋدوشىنىڭ قاتارىنا ەنىپ وتىر. ولار – ەلدوس سمەتوۆ پەن عۇسمان قىرعىزباەۆ. بۇل بالۋانداردىڭ ەكەۋى دە 60 كيلو سالماق دارەجەسىندە ونەر كورسەتەدى. قازىرگى كەزدە ەلدوس ءۇشىنشى, ال عۇسمان التىنشى ورىندا ورنالاسقان. العاشقىسى 5018 ۇپايدى, ەكىنشىسى 3932 ۇپايدى ەنشىلەپ وتىر.
66 كيلو سالماق دارەجەسىندەگى جەرلەستەرىمىز دە اياقالىسى جاقسى. قورجىنىندا 3135 ۇپايى بار ەرلان سەرىكجانوۆ 11 ورىندا تۇرسا, 2179 ۇپايدى يەمدەنگەن ەلدوس جۇماحانوۆ 20 ساتىعا جايعاستى. وسى ورايدا, وليمپيا ويىندارىندا ءبىر سالماقتا ءبىر مەملەكەتتەن ءبىر عانا بالۋان كۇش سىناسۋعا قۇقىلى ەكەنىن ەسكەرگەن ءجون. سوندىقتان دا جوعارىدا ەسىمدەرى اتالعان ءتورت دزيۋدوشىنىڭ اراسىنان الەمدىك رەيتينگتە جوعارى تۇرعان ەكى سپورتشى عانا توكيوعا ساپار شەگەدى.
90 كيلو سالماقتاعى يسلام بوزباەۆتىڭ دا قارقىنى ءتاۋىر. وليمپيا ويىندارىنا قاتىسۋعا مۇمكىندىك بەرەتىن ليتسەنزيالىق دودالاردا دارالانا الماسا دا ول ايتەۋىر قالىڭ توپتىڭ بەل ورتاسىندا ءجۇرىپ, وسى كۇنگە دەيىن 2146 ۇپايدى قورجىنىنا سالىپ ۇلگەردى. بۇگىنگى تاڭدا بوزباەۆ 19-ورىندى يەلەنۋدە.
قالعان سالماق دارەجەلەرىندە كۇش سىناساتىن جىگىتتەرىمىز سەنىم ۇدەسىنەن شىعا الماي جۇرگەنى جاسىرىن ەمەس. ماسەلەن, وسىعان دەيىن اسقان شەبەرلىك تانىتىپ, بىرقاتار بايراقتى باسەكەدە جەڭىس تۇعىرىنا كوتەرىلگەن 81 كيلو سالماقتاعى ديدار حامزا قازىرگى كەزدە نەبارى 32-ورىندى قاناعات تۇتۋدا. ونىڭ 1720 ۇپايى بار. ءبىراز ۋاقىتتان بەرى 73 كيلو سالماقتا سايىسقا ءتۇسىپ جۇرگەن جانساي سماعۇلوۆ ەندى عانا ەڭسە تىكتەگەندەي. ۇستىمىزدەگى جىلدىڭ اقپان ايىندا پاريجدە وتكەن تۋرنيردە كۇمىس مەدالدى يەلەنگەن سوڭ قانداسىمىز 24-ورىنعا كوتەرىلدى – ەنشىسىندە 2454 ۇپاي بار.
ال الىپتارىمىزدىڭ جاعدايى وتە مۇشكىل. اتاپ ايتساق, ەلىشىلىك جارىستارداعى 100 كيلو سالماقتىڭ ۇزدىگى ايبەك سەرىكباەۆ نەبارى 51-ورىندى قاناعات تۇتۋدا. +100 كيلو سالماقتا سەنىم ارتقان سەركەمىز ەراسىل قاجىباەۆ 38-ساتىعا جايعاسقان.
وزگە مەملەكەت وكىلدەرىنىڭ ناتيجەسىن سارالايتىن بولساق, بۇگىنگى تاڭدا جاپونداردىڭ قارقىنى وتە كۇشتى ەكەنى بايقالادى. كۇنشىعىس ەلىنىڭ 12 ورەنى «توپ-10» دزيۋدوشىنىڭ ساناتىندا. ارينە, وعان تاڭدانۋعا بولماس. ويتكەنى, بۇل كۇرەس ءتۇرىنىڭ وتانى – جاپونيا. ولار وزدەرى ويلاپ تاپقان ونەردە اركەز الدارىنا جان سالماۋعا تىرىسادى.
گرۋزيانىڭ دا تەگەۋرىنى قۋانتارلىق. قاپ تاۋىنىڭ التى قىرانى جوعارىدا اتالعان مەجەدەن كورىنىپ وتىر. سونداي-اق نيدەرلاند پەن رەسەيدىڭ – 5, يزرايل مەن ازەربايجاننىڭ – 4, يسپانيا, وڭتۇستىك كورەيا, موڭعوليا, برازيليا, كانادا, تۇركيانىڭ – 3, گەرمانيا مەن قازاقستاننىڭ – 2, وزبەكستان, تايپەي, يتاليا, كوسوۆو, شۆەتسيا, بەلگيا, سەربيا, كۋبا, ماجارستان, پورتۋگاليا, چەحيا جانە ۋكراينانىڭ 1 وكىلى الەمدەگى «توپ-10» دزيۋدوشىنىڭ قاتارىنا ەنىپ وتىر.
مىنە, قازىرگى كەزدەگى ەرلەردىڭ الەمدىك رەيتينگىندەگى جاعداي وسىنداي.
الەمدىك رەيتينگتەگى ەڭ ۇزدىك دزيۋدوشىلاردىڭ العاشقى ۇشتىگى
60 كيلو: 1. ريۋدزيۋ ناگاياما (جاپونيا), 2. ناوحيسا تاكاتو (جاپونيا), 3. ەلدوس سمەتوۆ (قازاقستان).
66 كيلو: 1. مانۋەل لومباردو (يتاليا), 2. حوشيرو مارۋيامو (جاپونيا), 3. حيفۋمي اببە (جاپونيا).
73 كيلو: 1. سويشي حاشيموتو (جاپونيا), 2. رۋستام ورۋدجەۆ (ازەربايجان), 3. توحار بۋتبۋل (يزرايل).
81 كيلو: 1. ماتتياس كااس (بەلگيا), 2. ساگي مۋكي (يزرايل), 3. دومينيك رەسسەل (گەرمانيا).
90 كيلو: 1. نيكولوز شەرزاداديشۆيلي (يسپانيا), 2. نەمانيا مايدوۆ (سەربيا), 3. نوەل ۆان ’ت ەند (نيدەرلاند).
100 كيلو: 1. مايكل كوررەل (نيدەرلاند), 2. چو گۋحام (وڭتۇستىك كورەيا), 3. ۆارلام ليپارتەلياني (گرۋزيا).
+100 كيلو: 1. لۋاش كرپالەك (چەحيا), 2. حيسايۋشي حاراساۆا (جاپونيا), 3. گۋرام تۋشيشۆيلي (گرۋزيا).